出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
6:1 上帝对摩西讲：「我所beh对付法老ê，taⁿ你ē看tio̍h，因为用权能ê手，伊ē准in去，koh用权能ê手，伊ē赶in出伊ê地。」
6:2 上主呼召摩西
上主koh对摩西讲：「我to̍h是上主。
6:3 我是全能上帝，出现tī亚伯拉罕、以撒、雅各；总是，我ê名叫做耶和华，我m̄ bat hō͘ in bat我。
6:4 我koh kah in立我坚固ê约，beh kā in所tòa过ê迦南地赏赐hō͘ in，to̍h是in寄脚ê地。
6:5 我mā有听tio̍h以色列人哀声吐气，to̍h是埃及人督in做苦工，我mā ē记念我ê约。
6:6 所以，你tio̍h kā以色列人讲：『我是上主，我ētùi埃及人所hō͘ lín担（taⁿ）ê重担chhōa lín出来，koh beh救lín脱离in所hō͘ lín做ê苦工。我mā ē用伸出来ê手kah大ê审判来救赎lín。
6:7 我mā ē掠lín做我ê子民，我mā ē做lín ê上帝。Lín 会知我是上主—lín ê上帝，是tùi埃及人所hō͘ lín担ê重担chhōa lín出来ê。
6:8 我chiùchōa应允beh hō͘亚伯拉罕、以撒、雅各hitê地，我beh chhōa lín koh入去hia，kā hitê地赏赐hō͘ lín做产业。我是上主。』」
6:9 摩西ánne对以色列人讲，总是，in为tio̍h心内忧闷，mā做苦工，soah m̄肯听摩西。
6:10 上主吩咐摩西讲：
6:11 「你入去kā埃及王法老讲，tio̍h准以色列人离开伊ê地。」
6:12 摩西tī上主ê面前讲：「祢看，以色列人都m̄听我ê话，法老ná ē beh听我chitê嘴舌tun ê人？」
6:13 上主吩咐摩西kah亚伦，tio̍h传令hō͘以色列人kah埃及王法老，thang chhōa以色列人出埃及地。
6:14 摩西kah亚伦ê家谱
以色列chiahê族长ê名记tī下底：以色列大kiáⁿ流便ê kiáⁿ是哈诺、法路、希斯仑、迦米，chiahê是流便hiahê家。
6:15 西缅ê kiáⁿ是E-mu-el、雅悯、O-hat、雅斤、琐辖，以及迦南地ê chabó͘ kiáⁿ所生ê扫罗，chiahê是西缅hiahê家。
6:16 利未chiahê kiáⁿ ê名照in ê世系记tī下底：革顺、哥辖、米拉利。利未活到一百三十七岁。
6:17 革顺ê kiáⁿ照in ê家族：立尼、示每。
6:18 哥辖ê kiáⁿ：暗南、以斯哈、希伯仑、乌薛。哥辖活到一百三十三岁。
6:19 米拉利ê kiáⁿ：抹利、母示。Chiahê是利未hiahê家，照in ê世系。
6:20 暗南娶伊ê阿姑Io-ke-biat做bó͘，她kā伊生亚伦kah摩西。暗南活到一百三十七岁。
6:21 以斯哈ê kiáⁿ：可拉、Ne-he̍k、细基利。
6:22 乌薛ê kiáⁿ：米沙利、以利撒反、Si-thu-lī。
6:23 亚伦娶亚米拿达ê chabó͘ kiáⁿ拿顺ê小妹E-lí-se-bah做bó͘，她kā伊生拿答、亚比户、以利亚撒、以他玛。
6:24 可拉ê kiáⁿ：亚惜、以利加拿、A-bi-a-sa̍h，chiahê是可拉hiahê家。
6:25 亚伦ê kiáⁿ以利亚撒娶Phu-thi-el ê一个chabó͘ kiáⁿ做bó͘，她kā伊生非尼哈。Chiahê是利未人ê族长，照in ê家族。
6:26 Chitê亚伦、摩西to̍h是上主对in讲：「Tio̍h chhōa以色列人照in ê军队出埃及地」ê。
6:27 对埃及王法老讲beh chhōa以色列人出埃及ê，to̍h是chitê摩西kah亚伦。
6:28 上主命令摩西kah亚伦
当上主tī埃及地对摩西讲话ê日，
6:29 上主对摩西讲：「我to̍h是上主，我对你所讲一切ê话，你lóng tio̍h kā埃及王法老讲。」
6:30 摩西tī上主ê面前讲：「你看，我是嘴舌tun ê人，法老ná ē beh听我？」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。