创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
41:1 约瑟为王解梦
整整过了两年，法老眠梦，梦见伊khiā tī河边，
41:2 看tio̍h七只牛母tùi河里起来，súi koh肥，tī芦竹á内teh食草。
41:3 Tòe后koh有七只牛母tùi河里起来，khiap-sì koh瘦，kah前hiahê牛做伙khiā tī河边。
41:4 Chiahê khiap-sì koh瘦ê牛母kā hit七只súi koh肥ê牛全部食了了。法老就醒起来。
41:5 法老koh困，第二pái眠梦，梦见一欉麦出七穗，phauh koh好看。
41:6 后来，koh看tio̍h koh出七穗，冇冇（phàⁿ-phàⁿ）koh hō͘东风扫pháiⁿ。
41:7 Chiahê冇ê穗kā hit七穗phauh koh饱满ê吞落去。法老醒起来，chiah知是teh眠梦。
41:8 到天光，法老心无平安，to̍h差人召埃及所有ê术士kah星象家来；法老to̍h kā伊所梦见ê kā in讲，in无人ē晓kā法老解梦。
41:9 Hit时，酒政长kā法老讲：「我今á日想起我ê罪。
41:10 前法老受气人臣，kā我kah厨房长关tī侍卫长府内ê监。
41:11 我kah伊，两人siâng hit暝有梦见，阮各人ê梦有无仝ê意义。
41:12 Tī hia有一个希伯来ê少年人kah阮同在，伊是侍卫长ê奴仆。阮kā伊讲阮ê梦，伊to̍hka7阮解梦；伊是照阮ta̍k人ê梦来解梦。
41:13 后来，tāichì tútú照伊所kā阮解梦ê来实现：你hō͘我复职，hitê人受吊来死。」
41:14 法老to̍h差人去召约瑟来，in to̍h赶紧chhōa伊出监。伊to̍h剃头、换衫，来见法老。
41:15 法老kā约瑟讲：「我梦见一个梦，无人ē晓解梦；我听人讲你若听tio̍h梦to̍h ē晓解。」
41:16 约瑟应法老讲：「这m̄是在tī我；上主ē kā平安指示法老。」
41:17 法老kā约瑟讲：「我梦见我khiā tī河边，
41:18 有七只牛母tùi河里起来，肥koh súi，tī芦竹á内teh食草。
41:19 Tòe后koh有七只牛母起来，软chiáⁿ，真khiap-sì，koh真瘦。埃及全地，我m̄ bat看过chiah bái ・ê。
41:20 Chiahê瘦koh khiap-sì ê牛母kā hit七只肥ê牛母全部食了了。
41:21 In有吞落腹，m̄ koh，看bē出有吞落去，因为hitê khiap-sì ê款犹原kah以前仝款。然后，我to̍h醒。
41:22 我tī梦中koh看tio̍h一欉麦出七穗，饱满koh好看。
41:23 后来，koh出七穗，干干，冇冇，koh hō͘东风扫pháiⁿ。
41:24 Chiahê冇冇ê穗吞食hit七穗好ê。我讲hō͘术士听，mā无人ē晓kā我解明。」
41:25 约瑟kā法老讲：「法老ê两 个梦是一个意思；上主所beh行ê tāichì，有先指示法老。
41:26 七只好ê牛母是七年，七穗好ê，mā是七年；两 个梦是一个意思。
41:27 Hiahê tòe后起来ê七只瘦koh khiap-sì ê牛母，是七年；hiahê七穗空冇koh hō͘东风扫pháiⁿ ê，mā是七年；lóng表示ē有七年ê饥荒。
41:28 上帝所beh做ê tāichì，有显明tī法老；这是我对法老所讲ê。
41:29 你看，埃及全地会tú tio̍h大好年冬七年，
41:30 tòe后koh ētú tio̍h饥荒七年，甚至tī埃及地lóng ēbē记得以前ê好收成，全地lóngē hō͘饥荒灭掉。
41:31 因为以后ê饥荒siuⁿ伤重，to̍h m̄知以前地方ê好收成。
41:32 法老做两pái ê眠梦，是因为上主定tio̍h chitê tāichì，koh ē真紧来完成。
41:33 「所以，法老tio̍h拣一个聪明koh有智慧ê人，派伊治理埃及地。
41:34 法老tio̍h ánne行，koh设立官员管理chitê地。当七年好年冬ê时，tio̍h kā埃及地所收成ê，五份徵收一份，
41:35 hō͘ in tī将来ê好年冬，积聚一切ê米粮。Tio̍h聚集五谷，lóng归tī法老ê手头；收藏起来，thang做ta̍k个城ê食物。
41:36 所积聚ê米粮，thang做埃及地将来七年饥荒ê路用，免得chitê地hō͘饥荒所灭。」
41:37 约瑟受命管理埃及
法老kah伊所有ê人臣lóng赞成chitê做法。
41:38 法老对伊ê人臣讲：「咱kám ēchhōe tio̍h一个亲像伊chit款ê人，有上帝ê灵tī伊ê内面？」
41:39 法老对约瑟讲：「上帝已经kā chitê tāichì lóng指示你，可见无人亲像你有chit款ê聪明智慧。
41:40 你thang来管理我ê家，我ê人民lóng tio̍h听你ê话，hō͘你管理。独独tī宝座，我比你khah大。」
41:41 法老kā约瑟讲：「我举起你来管辖埃及全地。」
41:42 法老就剥伊手里做印ê手指，挂tī约瑟ê指头á，kā伊穿幼苎衫，koh kā金链á挂tī伊ê颔颈。
41:43 伊koh hō͘约瑟坐伊ê第二号车；开路ê大声hoah：「跪！」Án-ne，法老设立伊来治理埃及全地。
41:44 法老对约瑟讲：「我是法老，若无你出声指示，tī埃及全地，m̄准人随便动脚动手。」
41:45 法老钦赐约瑟ê名叫做Chap-nat-pa-né-ah，koh kā Ong城ê祭司Pho-ti-hoe-la̍h ê chabó͘ kiáⁿ A-se-nat hō͘伊做bó͘。约瑟to̍h出巡埃及地。
41:46 约瑟见埃及王法老ê时，hit年三十岁。约瑟tùi法老ê面前出去，遍行埃及全地。
41:47 七个好年冬ê内面，地ê出产非常丰盛。
41:48 约瑟聚集埃及地七个好年冬所有ê米粮，kā米粮积聚tī ta̍k个城；四箍围田地ê米粮，lóng积聚tī它ê本城。
41:49 约瑟积聚五谷极chē，亲像海边ê沙；伊算kah停止无算，因为算bē了。
41:50 饥荒ê年未到以前，Ong城ê祭司Pho-ti-hoe-la̍h ê chabó͘ kiáⁿ A-se-nat kā约瑟生两 个kiáⁿ。
41:51 约瑟kā大kiáⁿ号名叫做玛拿西，因为伊讲：「上主hō͘我bē记得我一切ê困苦kah我ê老父ê全家。」
41:52 伊kā第二kiáⁿ号名叫做以法连，因为伊讲：「上帝hō͘我tī我受苦ê所在兴旺。」
41:53 埃及第七年好年冬一下结束，
41:54 七年ê饥荒to̍h来。Τú-tú照约瑟所讲ê，ta̍k国lóng有饥荒；独独埃及全地有米粮。
41:55 到埃及全地有饥荒，众人对法老哀求米粮。法老对埃及ê人民讲：「Lín去chhōe约瑟，所有伊所讲ê，lín lóng tio̍h照做。」
41:56 当时饥荒遍满天下，约瑟开ta̍k所在ê粟仓，粜米粮hō͘埃及人；tī埃及地饥荒真伤重。
41:57 Ta̍k国ê人lóng去埃及，到约瑟hia籴米粮，因为天下饥荒真伤重。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。