创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
38:1 偤大kah她玛
Hit时，偤大离开伊ê兄弟，落去到一个亚杜兰人，名叫做Hi-la̍h ê家。
38:2 偤大tī hia看tio̍h一个迦南人，名叫做书亚ê chabó͘ kiáⁿ，就娶她，kah她同房。
38:3 她就怀孕生kiáⁿ，偤大to̍h kā伊号名叫做珥。
38:4 她koh再怀孕生kiáⁿ，老母kā伊号名叫做俄南。
38:5 她又koh生kiáⁿ，kā伊号名叫做示拉；她生示拉ê时，偤大tú-á tī Ku-chip。
38:6 偤大kā伊ê大kiáⁿ珥娶bó͘，名叫做她玛。
38:7 偤大ê大kiáⁿ珥tī上主ê面前行pháiⁿ，上主to̍h hō͘伊死。
38:8 偤大kā俄南讲：「你tio̍h kah你ê兄嫂同房，对她尽你做小弟ê本份，kā你ê阿兄立后嗣。」
38:9 俄南知所生ê kiáⁿ无归tī伊kakī ，所以，同房ê时，thiau故意遗泄tī地里，免得hō͘伊ê阿兄有后嗣。
38:10 伊ê所做，上主看做是pháiⁿ ・ê，to̍h hō͘伊mā死。
38:11 偤大心内想讲：「恐惊示拉mā ē死，kah伊两 个阿兄相siâng。」to̍h对伊ê新妇她玛讲：「你去tiàm lín老父hia守寡，thèng候我ê kiáⁿ示拉长成。」她玛to̍h tńg去，tòa tī in老父ê厝。
38:12 过真久，偤大ê bó͘书亚ê chabó͘ kiáⁿ死。偤大受安慰了后，to̍h kah伊ê朋友亚杜兰人希拉上去亭拿，到kā伊剪羊毛ê人hia。
38:13 有人kā她玛讲：「Lín ta-koaⁿ上去亭拿，去剪伊ê羊ê毛。」
38:14 她玛看tio̍h示拉已经长成，iáu无beh娶她做bó͘，就thǹg她守寡ê衫，用帕罩面，koh moa身躯，坐tī去亭拿ê路上ê E-ná-ìm城门口。
38:15 偤大看tio̍h她，掠做是娼妓，因为她有罩面。
38:16 to̍h oat去路边来见她，讲：「来，hō͘我kah你做伙困。」因为伊m̄知她是伊ê新妇。她应讲：「你beh kah我困，beh用啥物hō͘我？」
38:17 偤大讲：「我tùi羊群内掠一只山羊á，寄来hō͘你。」她讲：「你kám beh用啥物hō͘我做准当，thèng候你kā它寄来？」
38:18 偤大讲：「我tio̍h用啥物hō͘你做准当？」她to̍h讲：「你ê印，你ê带，kah你手里ê拐á。」偤大to̍h hō͘她，然后kah她困，她to̍h tùi偤大怀孕。
38:19 她玛起来离开去，thǹg她ê帕，犹原穿她守寡ê衫。
38:20 偤大托伊ê朋友亚杜兰人送一只山羊á，beh tùi hitê chabó͘人ê手the̍h准当，m̄ koh，chhōe bē tio̍h她。
38:21 伊to̍h问hit所在ê人讲：「Hitê E-ná-ìm路边ê娼妓tī tó位？」In讲：「Chia无娼妓。」
38:22 伊tńg去见偤大讲：「我chhōe无她，hit所在ê人mā讲：『Chia无娼妓。』」
38:23 偤大讲：「Chhut-chāi她the̍h去，免得咱见笑。你看，我beh kā chit只山羊á送hō͘她，你竟然chhōe无她。」
38:24 差不多过三月日，有人kā偤大讲：「你ê新妇她玛做娼妓，koh因为她行奸淫，续有娠孕。」偤大讲：「Kā她拖出来烧。」
38:25 她玛hō͘人拖出来ê时，to̍h差人去见她ê ta-koaⁿ，讲：「Chiahê物是啥人ê，我to̍h是tùi伊来怀孕。」
38:26 Koh讲：「请你认，看chitê印、带kah 拐á是啥人ê。」偤大认出来，to̍h讲：「她比我khah有理，因为我无kā她嫁hō͘我ê kiáⁿ示拉。」Τùi hit时起，偤大无koh亲近她。
38:27 她玛teh beh生ê时，知她腹肚内是双生á ê。
38:28 Teh生ê时，一个gín-á伸一支手出来，产婆the̍h红线缚tī伊ê手，讲：「Chitê是tāi先出世ê。」
38:29 后来，伊ê手kiu入去，第二个出世；产婆讲：「你ná ē chông出来？」所以，kā伊号名叫做法勒斯。
38:30 后来，hitê手缚红线ê mā生出来，to̍h kā伊号名叫做谢拉。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。