列王纪上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
16:1 Siōng-chú ê ōe lîm-kàu Ha-na-nih ê kiáⁿ E-hú, kong-kek Ba-siah kóng,
16:2 " Góa í-keng tùi tîn-ai ê tiong-kan kā lí kí-khí, siat-li̍p lí chò Góa ê chú-bîn — I-su-la-el lâng ê kun-ông, lí kèng-jiân kiâⁿ Ia-lô-ba-am ê lō͘, hō͘ Góa ê chú-bîn — I-su-la-el lâng hoān chōe, tùi in ê chōe lâi kek Góa siū-khì.
16:3 Lí khòaⁿ, Góa ē kā Ba-siah kah i ê ke choân-pō͘ tû-bia̍t, Góa mā ē hō͘ lí ê ke chhin-chhiūⁿ Ne-bat ê kiáⁿ Ia-lô-ba-am ê ke ánne.
16:4 Hoān-nā sio̍k Ba-siah ê lâng, sí tī siâⁿ-.ni̍h ê, káu ē kā i chia̍h, sí tī chhân-iá ê, khong-tiong ê chiáu ē kā i chia̍h. "
16:5 Ba-siah kî-tha ê tāichì kah i só͘ kiâⁿ ê, í-ki̍p i ê lêng-le̍k, kám bô lóng kì tī I-su-la-el lia̍t ông ê kì-lio̍k?
16:6 Ba-siah kah i ê chó͘-sian tâng khùn, bâi-chòng tī Til-chah. I ê kiáⁿ E-la̍h sòa-chiap i chò ông.
16:7 Siōng-chú ê ōe koh lîm-kàu Ha-na-nih ê kiáⁿ, sian-ti E-hú, kong-kek Ba-siah mā kong-kek i ê ke, in-ūi i tī Siōng-chú ê ba̍k-chiu chêng só͘ kiâⁿ it-chhè ê pháiⁿ, ēng i ê chhiú ê só͘ chò ê lâi kek I ê siū-khì, chhin-chhiūⁿ Ia-lô-ba-am ê ke, mā in-ūi i phah-sí i ê choân ke.
16:8 I-su-la-el Ông E-la̍h
Iô-tah ông A-sah jī-cha̍p la̍k nî, Ba-siah ê kiáⁿ E-la̍h tī Til-chah chē-ūi chò I-su-la-el ông, kiōng nn̄g nî.
16:9 Koán-lí i chi̍t-pòaⁿ chiàn-chhia ê jîn-sîn Chim-lī pōe-poān i. Tng i tī Til-chah, to̍h-sī tī Til-chah ê koán-ke A-cha̍p ê chhù chia̍h-chiú-chùi ê sî,
16:10 Chim-lī chiū ji̍p-khì kā i phah-sí, chhoàn i ê ūi. Che sī Iô-tah ông A-sah jī-cha̍p chhit nî ê tāichì.
16:11 Chim-lī khai-sí chò ông. Tng i chē-ūi ê sî, chiū thâi-sí Ba-siah choân ke, bô-lūn chhin-lâng pêng-iú, lóng bô kā i lâu kah pòaⁿ-ê chapo͘ teng.
16:12 Chhin-chhiūⁿ ánne, Chim-lī bia̍t Ba-siah choân ke, tútú chiàu Siōng-chú thok sian-ti E-hú só͘ kóng hiahê kong-kek Ba-siah ê ōe.
16:13 Che sī in-ūi Ba-siah it-chhè ê chōe kah i ê kiáⁿ E-la̍h ê chōe; in nn̄g lâng só͘ hoān-.tio̍h ê mā hō͘ I-su-la-el lâng hoān-.tio̍h, in ēng hi-ké ê ngó͘-siōng lâi kek Siōng-chú — I-su-la-el ê Siōng-tè siū-khì.
16:14 E-la̍h kî-tha ê tāichì, kiàn-nā i só͘ kiâⁿ ê, kám bô lóng kì tī I-su-la-el chiahê ông ê kì-lio̍k?
16:15 I-su-la-el Ông Chim-lī
Iô-tah ông A-sah jī-cha̍p chhit nî, Chim-lī tī Til-chah chò ông chhit ji̍t. Hit sî, jîn-bîn tú-á chat iâⁿ ûi-kong Hui-lī-sū ê Gip-be-thòng.
16:16 Tī iâⁿ tiong ê jîn-bîn thiaⁿ tio̍h Chim-lī pōe-poān, koh thâi-sí ông, só͘-í, I-su-la-el jîn-bîn hit ji̍t chiū tī iâⁿ tiong siat-li̍p kun-tiúⁿ Om-lī chò I-su-la-el ông.
16:17 Om-lī kah I-su-la-el jîn-bîn, tùi Gip-be-thòng chiūⁿ-khì ûi-khùn Til-chah.
16:18 Chim-lī khòaⁿ tio̍h siâⁿ í-keng phòa, chiū ji̍p-khì ông-kiong ê siâⁿ-pó, pàng hóe sio ông-kiong, kakī sí tī lāi-bīn.
16:19 Che sī in-ūi i só͘ hoān ê chōe, sī kiâⁿ Siōng-chú só͘ khòaⁿ-chò pháiⁿ ê, kiâⁿ Ia-lô-ba-am ê lō͘, chiàu ánne kiâⁿ só͘ hoān ê chōe, koh hō͘ I-su-la-el lâng hoān chōe.
16:20 Chim-lī kî-tha ê tāichì kah i só͘ kiâⁿ pōe-poān ê tāichì, kám bô kì tī I-su-la-el chiahê ông ê kì-lio̍k?
16:21 I-su-la-el Ông Om-lī
Hit sî, I-su-la-el jîn-bîn pun-chò nn̄g pêng; chi̍t-pòaⁿ tòe Ke-na̍t ê kiáⁿ Thê-pí-nî, beh kā i siat-li̍p chò ông; lēng-gōa chi̍t-pòaⁿ tòe Om-lī.
16:22 Chóng-.sī, tòe Om-lī ê jîn-bîn iâⁿ-kòe tòe Ke-na̍t ê kiáⁿ Thê-pí-nî ê lâng. Thê-pí-nî sí liáu-āu, Om-lī chiū chò ông.
16:23 Iô-tah ông A-sah saⁿ-cha̍p it nî, Om-lī chē-ūi chò I-su-la-el ông, kiōng cha̍p-jī nî; tī Til-chah chò ông la̍k nî.
16:24 Om-lī ēng nn̄g tha-lan-t ê gîn tùi Sal-má bé Sa-má-lī-a soaⁿ, tī soaⁿ téng khí-chō, chiū chiàu hit-ê soaⁿ ê goân chú Sal-má ê miâ, kā só͘ khí ê siâⁿ hō-miâ kiò-chò Sa-má-lī-a.
16:25 Om-lī kiâⁿ Siōng-chú khòaⁿ-chò pháiⁿ ê tāichì, pí i í-chêng só͘-ū ê ông koh khah pháiⁿ.
16:26 In-ūi i kiâⁿ Ne-bat ê kiáⁿ Ia-lô-ba-am ê lō͘, koh kiâⁿ i hō͘ I-su-la-el lâng só͘ hoān ê chōe, ēng hi-ké ê ngó͘-siōng lâi kek Siōng-chú — I-su-la-el ê Siōng-tè siū-khì.
16:27 Om-lī kî-tha só͘ kiâⁿ ê tāichì kah i só͘ hián-chhut ê lêng-le̍k, kám bô kì tī I-su-la-el chiahê ông ê kì-lio̍k?
16:28 Om-lī kah i ê chó͘-sian tâng khùn, bâi-chòng tī Sa-má-lī-a. I ê kiáⁿ A-hap sòa-chiap i chò ông.
16:29 I-su-la-el Ông A-hap
Iô-tah ông A-sah saⁿ-cha̍p peh nî, Om-lī ê kiáⁿ A-hap chē-ūi, chò I-su-la-el ông. Om-lī ê kiáⁿ A-hap tī Sa-má-lī-a chò I-su-la-el ông jī-cha̍p jī nî.
16:30 Om-lī ê kiáⁿ A-hap kiâⁿ Siōng-chú khòaⁿ-chò pháiⁿ ê tāichì, pí i í-chêng só͘-ū ê ông koh khah pháiⁿ.
16:31 I kiâⁿ Ne-bat ê kiáⁿ Ia-lô-ba-am ê chōe, iáu koh lia̍h-chò sī sió-khóa tāichì; i koh chhōa Si-tòng ông Iat-pa-le̍k ê chabó͘ kiáⁿ I-é-che-bel chò bó͘, khì ho̍k-sāi Ba-al, lâi kā i kèng-pài.
16:32 I tī Sa-má-lī-a khí Ba-al ê biō, tī biō lāi kā Ba-al khí tôaⁿ.
16:33 A-hap koh chō A-si-lah; A-hap só͘ kiâⁿ ê tāichì kek-khí Siōng-chú — I-su-la-el ê Siōng-tè ê siū-khì, pí i í-chêng ê I-su-la-el lia̍t ông koh khah siong-tiōng.
16:34 Tng i chē-ūi ê sî, ū Be-thel lâng Hi-el têng khí I-é-lī-kho siâⁿ; hē tē-ki ê sî, sí tōa-kiáⁿ A-mí-lâm, hē mn̂g ê sî, sí soah-bóe kiáⁿ Se-gup, tú chiàu Siōng-chú thok Nùn ê kiáⁿ Io-siú-ah só͘ kóng ê ōe.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。