申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 Iáu-bōe Kiat-àn ê Bô͘-sat Àn-kiāⁿ
" Tī Siōng-chú — lí ê Siōng-tè só͘ siúⁿ-sù hō͘ lí chò sán-gia̍p ê tē, nā tú tio̍h siū thâi ê lâng tó tī chhân-iá, m̄-chai sī siáⁿ lâng thâi-sí ê,
21:2 lí ê tiúⁿ-ló kah sím-phòaⁿ-koaⁿ tio̍h chhut-lâi niû, tùi siū thâi ê lâng hit tah, it-ti̍t kàu sì-kho͘-ûi hiahê siâⁿ,
21:3 khòaⁿ tó chi̍t-ê siâⁿ lī-khui siū thâi ê lâng siōng kīn, hit-ê siâⁿ ê tiúⁿ-ló chiū tio̍h tùi gû-kûn tiong chhú chi̍t chiah m̄ bat ēng i lâi chò-kang, m̄ bat kòa taⁿ ê gû-chéng-á.
21:4 Hitê siâⁿ ê tiúⁿ-ló tio̍h khan gû-chéng-á kàu ū tn̂g-lâu-chúi ê soaⁿ-kok, bô chèng bô choh ê, tī hit-ê soaⁿ-kok kòng-tn̄g gû-chéng-á ê ām-kún.
21:5 Chè-si Lē-bī lâng ê kiáⁿ-sun tio̍h kīn óa-.lâi, in-ūi Siōng-chú — lí ê Siōng-tè kéng-soán in lâi ho̍k-sāi I, thok Siōng-chú ê miâ chiok-hok, só͘-ū sio-kò, sio-phah ê tāichì, lóng tio̍h chiàu in ê ōe lâi phòaⁿ-toàn.
21:6 Hitê siâⁿ ê chèng tiúⁿ-ló, to̍h-sī lī-khui siū thâi ê lâng siōng kīn ê, tio̍h tī hit-ê soaⁿ-kok tiong, só͘ kòng-tn̄g ām-kún ê gû-chéng-á ê téng-bīn lâi sé-chhiú.
21:7 Mā tio̍h ìn kóng, ' Goán ê chhiú m̄ bat lâu chit-ê hoeh, goán ê ba̍k-chiu mā m̄ bat khòaⁿ-.tio̍h.
21:8 Siōng-chú ah, kiû Lí sià-bián Lí ê chú-bîn — I-su-la-el lâng, Lí só͘ sio̍k-hôe ê, m̄ thang hō͘ bô chōe ê hoeh kui tī Lí ê chú-bîn — I-su-la-el. '
21:9 Án-ne, lâu hit-ê hoeh ê chōe kah i bô koan-hē. Án-ne chiū tùi lín tiong-kan tû-khì lâu bô chōe ê hoeh ê chōe, sī in-ūi lí ū kiâⁿ Siōng-chú khòaⁿ-chò hó ê. "
21:10 Siū Lia̍h Bí-lí ê Kui-tēng
" Lí chhut-khì kah lí ê tùi-te̍k kau-chiàn ê sî, Siōng-chú — lí ê Siōng-tè kā in kau tī lí ê chhiú, lí mā lia̍h in khì.
21:11 Hit sî, tī siū lia̍h ê lâng ê tiong-kan, nā khòaⁿ tio̍h ū bí-lí, lí mā loân-bō͘ i, beh chhōa i chò bó͘,
21:12 chiū thang kā i chhōa kàu lí ê ke, i chiū tio̍h thì thâu-mn̂g, siu chéng-kah,
21:13 thǹg-khì i siū lia̍h ê sî só͘ chhēng ê saⁿ, tòa tī lí ê chhù lāi ai-khàu pē-bú chi̍t goe̍h-ji̍t, jiân-āu lí thang kah i tâng-pâng, lí chò i ê tiōng-hu, i chò lí ê bó͘.
21:14 Āu-lâi, lí nā bô hoaⁿ-hí i, chiū tio̍h hō͘ i chhut-chāi i ê ì-sù chhut-.khì, choa̍t-tùi m̄ thang bē chîⁿ, mā m̄ thang tòng-chò lú-pī kā i khoán-thāi, in-ūi lí í-keng kah i sêng-chhin. "
21:15 Tōa-kiáⁿ Kè-sêng-koân ê Kui-tēng
" Lâng nā ū nn̄g-ê bó͘, chi̍t-ê sī i só͘ thiàⁿ ê, chi̍t-ê sī i só͘ oàn ê, lóng ū kā i seⁿ kiáⁿ, chóng-.sī, tōa-kiáⁿ sī só͘ oàn ê bó͘ só͘ seⁿ ê.
21:16 Kàu hō͘ kiáⁿ sêng-chiap sán-gia̍p ê ji̍t, m̄ thang li̍p siū-thiàⁿ ê bó͘ só͘ seⁿ ê kiáⁿ chò tōa-kiáⁿ, pôaⁿ-kòe chin ê tōa-kiáⁿ, to̍h-sī siū oàn-ê bó͘ só͘ seⁿ ê kiáⁿ.
21:17 Chóng-.sī, tio̍h sêng-jīn só͘ oàn ê bó͘ ê kiáⁿ chò tōa-kiáⁿ, kā só͘-ū ê sán-gia̍p hō͘ i siang-hūn, in-ūi chit-ê sī i khùi-la̍t ê khí-thâu, tōa-kiáⁿ ê miâ-hūn sī i ê. "
21:18 Chhù-lí Ngó͘-ge̍k ê Kiáⁿ ê Kui-tēng
" Lâng nā ū bân-phôe koh ngó͘-ge̍k ê kiáⁿ, m̄-thiaⁿ in lāu-pē ê ōe á-.sī lāu-bú ê ōe, in sûi-jiân kā i kéng-kài, i iû-goân m̄-thiaⁿ in ê ōe.
21:19 I ê pē kah i ê bó tio̍h kā i lia̍h khí-.lâi, kā i thoa chhut-.khì, chhōa kàu pún-siâⁿ ê tiúⁿ-ló hia, to̍h-sī i pún só͘-chāi ê siâⁿ mn̂g,
21:20 kā hit-ê siâⁿ ê tiúⁿ-ló kóng, ' Goán chit-ê kiáⁿ bân-phôe koh ngó͘-ge̍k, m̄-thiaⁿ goán ê ōe, lāmsám khai-chîⁿ, tham-chia̍h koh hò͘ⁿ-chiú. '
21:21 Hitê siâⁿ ê kûn-chiòng chiū tio̍h ēng chio̍h-thâu tìm hō͘ i sí; ánne, chiū ē-tàng tùi lín tiong-kan tû-khì hit-ê pháiⁿ. I-su-la-el jîn-bîn lóng ē thiaⁿ tio̍h lâi kiaⁿ. "
21:22 Kî-tha Kok Chióng ê Kui-tēng
" Lâng nā hoān tio̍h eng-kai sí ê chōe, siū pān chōe sí, lí nā kā i tiàu tī chhâ-.ni̍h,
21:23 i ê sin-si m̄ thang tiàu tī chhâ-.ni̍h kòe-mê, it-tēng tio̍h tī hit ji̍t kā i bâi-chòng, bián-tit òe lahsap Siōng-chú — lí ê Siōng-tè siúⁿ-sù hō͘ lí chò sán-gia̍p ê tē, in-ūi hông tiàu-sí ê lâng sī siū Siōng-chú só͘ chiù-chó͘ ê. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。