但以理书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
11:1 Lâm-hong ê Ông kah Pak-hong ê Ông
Tng Ma-tái ông — Ta-lió-suh goân nî, góa khiā khí-.lâi, hō͘ i kian-kò͘ ióng-chòng.
11:2 Hitê thiⁿ-sài kóng, " Taⁿ góa kā chin-si̍t ê tāichì chí-sī lí. Lí khòaⁿ, Phel-siah ē koh ū saⁿ-ê ông heng-khí, tē-sì-ê ē chin hó-gia̍h, iâⁿ-kòe kî-tha hiahê ông. I túi i ê hó-gia̍h chiâⁿ-chò kiông-béng ê sî, chiū ē kek-tōng chèng lâng lâi kong-kek Hi-la̍h kok.
11:3 Jiân-āu ē ū chi̍t-ê ióng-béng ê ông khí-.lâi, ēng tōa-koân lâi tī-lí, chiàu kakī ê ì-sù lâi kiâⁿ.
11:4 I heng-khí ê sî, i ê kok ē hun-lia̍t, ǹg thiⁿ ê sì-bīn ê hong-hiòng hun-khui, chóng-.sī, bô kui i ê kiáⁿ-sun, mā bē pí-tit i í-chêng só͘ chiáng ê koân; in-ūi i ê kok ē tú tio̍h siū poe̍h khí-.lâi, kui tī i ê kiáⁿ-sun í-gōa ê pa̍t lâng.
11:5 " Lâm-hong ê ông ē kiông-béng, chóng-.sī, i ê tāi-sîn tiong-kan ē ū chi̍t-ê pí i khah kiông-béng, tit tio̍h koân, i ê koân ē chiâⁿ-chò chin tōa ê koân.
11:6 Kòe kúi-nā nî āu, in ē sio liân-ha̍p, lâm-hong ê kok ê chabó͘ kiáⁿ ē lâi kìⁿ pak-hong ê ông, ài beh li̍p bêng-iok; chóng-.sī, chit-ê chabó͘ kiáⁿ pang-chān ê la̍t bē tàng kú-tn̂g, chit-ê ông kah i pang-chān ê la̍t bē tàng chûn-chāi. Jî-chhiáⁿ chit-ê chabó͘ kiáⁿ kah chhōa i lâi ê, seⁿ i ê kah tong-sî hû-chō͘ i ê, lóng ē hông thâi-sí.
11:7 Chóng-.sī, chit-ê chabó͘ kiáⁿ ê pún-ke ē koh chhut chi̍t-ê lâi sòa-chiap ông-ūi, i ē chhōa kun-tūi lâi, chìn-ji̍p pak-hong ê ông ê hiám-iàu só͘-chāi, kong-kek in, koh thâi-iâⁿ in;
11:8 mā kā in ê sîn-bêng kah só͘ chù ê ngó͘-siōng, í-ki̍p gîn kim ê pó-khì chhiúⁿ-lia̍h kàu Ai-gi̍p. Kúi-nā nî kú, i lóng bô koh khì kong-kek pak-hong ê ông.
11:9 Pak-hong ê ông ē ji̍p-khì lâm-hong ê ông ê kok, chóng-.sī, ē iû-goân tò tńg-khì i ê pún só͘-chāi.
11:10 " I hiahê kiáⁿ ē khì kau-chiàn, chio-chi̍p chin chē kun-tūi. In ē chìn-chêng, chhin-chhiūⁿ chúi hoàn-lām tùi hia keng-kòe, jiân-āu koh khì kau-chiàn, ti̍t-kàu tùi-te̍k ê hiám-iàu só͘-chāi.
11:11 Lâm-hong ê ông ē tōa siū-khì, chhut-lâi kah pak-hong ê ông kau-chiàn; pak-hong ê ông ē pâi-lia̍t tōa kun-tūi, chóng-.sī, tōa kun-tūi ē kau-hù tī lâm-hong ê ông ê chhiú.
11:12 Lâm-hong ê ông tû-khì tōa kun-tūi liáu-āu, sim chiū kiau-ngō͘; i sûi-jiân hō͘ kúi-nā bān lâng tó lo̍h-.khì, kiù-kèng bô tit tio̍h khah iâⁿ.
11:13 " Pak-hong ê ông tò tńg-.lâi, beh koh pâi-lia̍t tōa kun-tūi, pí í-chêng ê koh khah chē. Kòe kúi-nā nî āu, i ē tòa tōa kun-tūi kah chin chē kun-sū chong-pī lâi.
11:14 Hit sî, ē ū chin chē lâng khí-lâi kong-kek lâm-hong ê ông, jî-chhiáⁿ lí ê jîn-bîn tiong-kan kiông-pō ê lâng mā ē khí-.lâi, ài beh hō͘ ī-siōng tit tio̍h èng-giām, chóng-.sī, in ē pāi-bông.
11:15 Pak-hong ê ông ē lâi, mā ē khí thô͘-tui lâi cheng-ho̍k kian-kò͘ ê siâⁿ; lâm-hong ê kun-tūi ē khiā bē tiâu, i só͘ kéng ê jîn-bîn mā bô la̍t thang khiā-tiâu.
11:16 Chóng-.sī, lâi kong-kek i ê ē chhut-chāi kakī ê ì-sù lâi kiâⁿ, bô lâng tī i ê bīn-chêng khiā ē tiâu. I ē khiā tī êng-iāu ê tē, i ê chhiú kiâⁿ châu-bia̍t.
11:17 " I koat-ì beh ēng choân kok ê la̍t lâi, mā ū chèng-ti̍t ê lâng kah i lâi, i ē chiàu kakī ì-sù kiâⁿ, koh ē ēng chabó͘ lâng ê chabó͘ kiáⁿ hō͘ lâm-hong ê ông, beh kā i pāi-hoāi, chóng-.sī, i ê kè-e̍k bē sêng-li̍p, mā bô chò i ê lī-ek.
11:18 Hit sî liáu-āu, i ē oa̍t tńg-sin ǹg hiahê tó-sū, chin chē ē hō͘ i cheng-ho̍k. Chóng-.sī, ē ū chi̍t-ê tāi-sîn tû-khì i só͘ si ê lêng-jio̍k, koh hō͘ hit-ê lêng-jio̍k kui i pún-sin.
11:19 Āu-lâi, i beh oa̍t tńg-sin ǹg kakī kok lāi ê hiám-iàu só͘-chāi, chóng-.sī, i ē kha that tio̍h lâi poa̍h-tó, kàu bóe bô koh hông khòaⁿ-.tio̍h.
11:20 " Hit sî, ē ū chi̍t-ê lâng khí-lâi sòa-chiap i ê ūi, hō͘ chi̍t-ê le̍k-sek ê piàn kiâⁿ kok lāi êng-iāu ê tē. Chóng-.sī, bô kúi ji̍t lāi i ē bia̍t-bông; m̄-sī tùi siū-khì, mā m̄-sī tùi kau-chiàn. "
11:21 Lâm-hong ê Pō-kun
Hitê thiⁿ-sài kè-sio̍k kóng, " Ē ū chi̍t-ê pi-chiān ê lâng khí-.lâi, sòa-chiap i ê ūi. Lâng m̄ bat ēng kok ê êng-kng hō͘ i, i sī thàn lâng bô thê-hông ê sî, ēng phô͘-tháⁿ lâi tit tio̍h kok.
11:22 Tōa tūi ê peng-la̍t ē tī i ê bīn-chêng siū húi-bia̍t, ná chhin-chhiūⁿ hō͘ tōa-chúi lâu-.khì; kāng hōe-bêng ê kun-ông mā ē ánne.
11:23 Li̍p-iok liáu-āu, i ē kiâⁿ kúi-chà, ēng chió-chió ê jîn-bîn chiâⁿ-chò kiông-béng.
11:24 Thàn lâng bô thê-hông ê sî, i ē lâi-kàu séng lāi ê pûi tē, mā ē kiâⁿ i ê chó͘-sian kah in ê chó͘-sian só͘ m̄ bat kiâⁿ ê; i ē ēng só͘ chhiúⁿ ê, só͘ kiap ê kah châi-bu̍t hun-sòaⁿ hō͘ lâng, koh ē siat kè-bô͘ lâi kong-kek chiahê hiám-iàu ê só͘-chāi, ti̍t-kàu i ê sî-kî.
11:25 " I ē phah-piàⁿ hùn-chì, ēng tōa-tīn ê kun-tūi kong-kek lâm-hong ê ông; lâm-hong ê ông mā ē ēng ke̍k tōa ke̍k kiông ê kun-peng kah i kau-chiàn, chóng-.sī, i khiā bē tiâu, in-ūi ū lâng siat kè-bô͘ beh lâi hāi i.
11:26 Chia̍h i ê hōng-lo̍k ê ē kā i bia̍t-tiāu; i ê kun-peng ē sì-sòaⁿ, jî-chhiáⁿ siū thâi ê chin chē.
11:27 Chit nn̄g-ê ông sim chûn pháiⁿ-ì, kāng toh ê sî kóng pe̍h-chha̍t; chóng-.sī, in ê kè-bô͘ bē chiâⁿ, in-ūi kàu tiāⁿ tio̍h ê kî, in ê chiong-kio̍k chiū ē kàu.
11:28 Pak-hong ê ông ē tòa chin chē châi-bu̍t tò tńg-khì i pún-kok. Chóng-.sī, i ê sim hoán-tùi sèng iok, i chiàu ē chiàu i kakī ê ì-sù kiâⁿ, jiân-āu tò tńg-khì pún-kok.
11:29 " Kàu tiāⁿ tio̍h ê kî, i ē tò tńg-lâi-kàu lâm-hong. Chóng-.sī, chit lō͘-bóe pái ê kiat-kio̍k ē bô chhin-chhiūⁿ téng-pái.
11:30 In-ūi Kit-thê ê chûn ē lâi kong-kek i, tì-sú i sim iu-būn, chiū tò tńg-.khì. I koh thòng-hūn sèng iok, chiàu i kakī ê ì-sù lâi kiâⁿ; i ē tò tńg-lâi kah khì-sak sèng iok ê lâng chò-hóe kè-bô͘.
11:31 I ē hoat-tōng kun-peng, in ē kā hit-ê siâⁿ-pó ê sèng-só͘ òe lahsap, tû-khì ji̍t-ji̍t só͘ hiàn ê chè-sū, siat-li̍p hit-ê chân-hāi, khó-ò͘ⁿ ê mi̍h.
11:32 Kiâⁿ pháiⁿ pōe-iok ê lâng, i ē ēng phô͘-tháⁿ ê ōe ín-iú in; to̍k-to̍k bat in ê Siōng-tè ê chú-bîn, ē ióng-kám chò tāichì.
11:33 Jîn-bîn tiong-kan ū tì-hūi ê lâng ē kà-sī chin chē lâng; chóng-.sī, in ū chin chē ji̍t ē tùi to-kiàm, hóe-sio, siū lia̍h, siū chhiúⁿ lâi sit-pāi.
11:34 In sit-pāi ê sî, ē lio̍h-lio̍h-á tit tio̍h hû-chō͘, mā ū chin chē lâng ē ēng phô͘-tháⁿ lâi kah in kiat-liân.
11:35 Tì-hūi ê lâng ê tiong-kan ū ê ē sit-pāi, ēng ánne lâi toàn-liān in, hō͘ in chheng-khì, hō͘ in pe̍h-pe̍h, it-ti̍t kàu lō͘-bóe ê ji̍t; in-ūi kàu tiāⁿ tio̍h ê kî, chiong-kio̍k chiū kàu.
11:36 " Hitê ông ē chhut-chāi kakī ê ì-sù lâi kiâⁿ, ē kiau-ngō͘ chū-ko, pôaⁿ-kòe it-chhè ê sîn-bêng, koh ēng kî-ī ê ōe kong-kek chiahê sîn-bêng ê Siōng-tè. I ē heng-thong kàu tōa siū-khì liáu-āu, in-ūi só͘ tiāⁿ tio̍h ê tāichì it-tēng ē chiâⁿ.
11:37 I bô beh iàu-kín i ê chó͘-sian ê sîn-bêng kah chabó͘ lâng só͘ him-bō͘ ê, bô-lūn siáⁿ-mi̍h sîn-bêng i lóng bô teh iàu-kín; in-ūi i ē chū-ko, pôaⁿ-kòe it-chhè.
11:38 I ē tī i ê ūi kèng-pài siâⁿ-pó ê sîn-bêng kah i ê chó͘-sian só͘ m̄ bat ê sîn-bêng, i ē ēng kim, gîn, ge̍k-chio̍h kah pó-bu̍t lâi kèng-pài i.
11:39 I ē óa-khò pa̍t chióng ê sîn-bêng, lâi siat-hoat kian-kò͘ i ê siâⁿ-pó. Só͘-ū sêng-jīn i ê, i ē kā êng-kng hō͘ in, mā ē hō͘ in koán-hat chin chē lâng, koh ē pun thó͘-tē kā in pò-siúⁿ.
11:40 " Kàu lō͘-bóe ê sî, lâm-hong ê ông ē lâi chhiok-hoān i. Pak-hong ê ông ē kong-kek i, chhin-chhiūⁿ kńg-lê-á hong, ēng chhia, ēng bé-peng, koh ēng chin chē chûn-chiah, mā ē chìn-ji̍p hiahê kok, chhin-chhiūⁿ hoàn-lām ê chúi keng-kòe.
11:41 I koh ē chìn-ji̍p êng-iāu ê tē, chin chē kok hō͘ i chhia-tó; to̍k-to̍k E-tóm, Mô͘-ap kah Am-móng kiáⁿ-sun chun-kùi ê lâng ē-tàng thoat-lī i ê chhiú.
11:42 I ē chhun chhiú kong-kek lia̍t kok; Ai-gi̍p tē mā bē tàng thoat-lī i ê chhiú.
11:43 I ē chiáng-koán Ai-gi̍p ê kim-gîn châi-pó í-ki̍p só͘-ū ê pó-bu̍t; Li-bí-a kah Kú-si̍t lâng lóng ē lâi kin-tòe i.
11:44 Chóng-.sī, tùi tang tùi pak, ē ū siau-sit thoân kàu, lâi jiáu-loān i, i ē tōa siū-khì chhut-.khì, tû-bia̍t chin chē lâng.
11:45 I ē tī hái kah êng-iāu ê sèng-soaⁿ ê tiong-kan tah i kiong-tiān ê pò͘-pêⁿ; chóng-.sī, i teh beh kàu i ê chiong-kio̍k, jî-chhiáⁿ bô kā i pang-chān ê lâng. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。