以赛亚书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
29:1 Ê-lú-sa-lèm ê Miā-ūn
Ai-ah! A-li-el （ Chù, Hi-bú-lâi bûn ê e̍k-im, ì-sù sī " Siōng-tè ê chè-tôaⁿ ". ） A-li-el, Ta-bi̍t chat iâⁿ ê siâⁿ! Lín chi̍t nî kòe chi̍t nî, cheh-kî chiàu-siông lûn-liû teh lâi.
29:2 Góa beh hō͘ A-li-el khùn-lân, i ē ū pi-siong ai-khàu, chóng-.sī, góa ē kā i khòaⁿ-chò sī A-li-el.
29:3 Góa ē sì-kho͘-ûi chat iâⁿ lâi kong-kek lí, khí thô͘-tui lâi phah lí, khí koân-tâi lâi kong-kek lí.
29:4 Lí ē siū kàng kē, tùi thô͘-kha kóng-ōe; lí kóng-ōe ê siaⁿ ē sè-sè, tùi tîn-ai chhut-.lâi. Lí ê siaⁿ-im tùi tē chhut-.lâi, ē chhin-chhiūⁿ hō͘ kúi hū-sin ê siaⁿ-im; lí ê giân-gí kiū-kiū háu, tùi tîn-ai chhut-.lâi.
29:5 Lí tùi-te̍k ê tōa tūi ē chhin-chhiūⁿ iù ê thô͘-soa hún; kiông-pō lâng ê tōa tūi ē chhin-chhiūⁿ teh poe ê chho͘-khng. Chit-ê tāichì ē tī chi̍t-sî-á ê tiong-kan hut-jiân lîm-kàu.
29:6 Bān-kun ê Siōng-chú ē ēng tân-lûi, tē-tāng, tōa-siaⁿ, kńg-lê-á hong, tōa hong kah thun-bia̍t ê hóe-iām lîm-kàu i.
29:7 Hit sî, kong-kek A-li-el chèng kok ê tōa tūi, to̍h-sī it-chhè kong-kek i kah i ê siâⁿ-pó, í-ki̍p kā i khó͘-to̍k ê lâng, ē chhin-chhiūⁿ bîn-bāng, chhin-chhiūⁿ àm-sî ê ī-siōng.
29:8 In ē chhin-chhiūⁿ iau-gō ê lâng bāng-kìⁿ teh chia̍h, kàu cheng-sîn ê sî, sim iû-goân chai pak-tó͘ sī khang-khang; á-.sī chhin-chhiūⁿ chhùi-ta ê lâng bāng-kìⁿ teh lim, kàu cheng-sîn ê sî, iû-goân ià-siān siūⁿ beh lim; chèng kok ê tōa tūi kah Si-óng soaⁿ kau-chiàn ê chêng-hêng mā ē chhin-chhiūⁿ ánne.
29:9 Bô Lâng Thiaⁿ Kéng-kò
Lín ē tio̍h-kiaⁿ kah gāng-.khì! Lín sī kakī jia-khàm lâi chheⁿmê! In chùi m̄-sī in-ūi chiú; in tian-lâi tian-khì m̄-sī in-ūi kāu chiú.
29:10 In-ūi Siōng-chú kā khùn tāng-bîn ê sîn-lêng koàn tī lín ê téng-bīn, hong ba̍t lín ê ba̍k-chiu, khàm ba̍t lín ê thâu-khak; lín ê ba̍k-chiu to̍h-sī sian-ti, lín ê thâu-khak to̍h-sī sian-kiàn ê.
29:11 Só͘-ū ê be̍k-sī tùi lín lâi kóng chhin-chhiūⁿ hong-.leh ê jī-iūⁿ. Lâng kā chit-ê jī-iūⁿ kau hō͘ bat jī ê lâng, kóng, " Chhiáⁿ tha̍k hō͘ góa thiaⁿ! " I kóng, " Góa bē tàng tha̍k, in-ūi hong-.leh. "
29:12 I koh kā chit-ê jī-iūⁿ kau hō͘ m̄ bat jī ê lâng, kóng, " Chhiáⁿ tha̍k hō͘ góa thiaⁿ! " I ē kóng, " Góa m̄ bat jī. "
29:13 Chú kóng, " In-ūi chiahê jîn-bîn chhin-kīn Góa, ēng chhùi, ēng chhùi-tûn chun-kèng Góa, sim khiok lī-khui Góa hn̄g-hn̄g. In chun-kèng Góa, chí-put-kò sī chun-thàn lâng só͘ kà-sī ê bēng-lēng niā-niā.
29:14 Só͘-í, Góa beh koh ēng kî-biāu ê tāichì khoán-thāi chiahê jîn-bîn, hit-ê tāichì to̍h-sī kî-biāu koh kî-ī ê. In tì-hūi lâng ê tì-hūi ē siau-bia̍t, in chhong-bêng lâng ê chhong-bêng ē khàm ba̍t. "
29:15 Tùi Chiong-lâi ê Ǹg-bāng
Ū chai-eh ah! Hiahê tùi Siōng-chú ún-chông in ê kè-bô͘ tī ke̍k chhim ê só͘-chāi, koh tī àm-tiong chò tāichì ê lâng; in siūⁿ kóng: Siáⁿ lâng khòaⁿ tio̍h goán? Siáⁿ lâng chai-iáⁿ goán?
29:16 Hāi ā, lín tò-thâu siūⁿ à! Kám thang kā sio-hûi ê lâng khòaⁿ-chò chhin-chhiūⁿ thô͘? Siū chō ê mi̍h kám thang lūn chō i ê Siōng-tè, kóng, " I bô chō góa "? Á-sī siū chò ê mi̍h-kiāⁿ, kám thang lūn chò i ê kóng, " I bô chhong-bêng "?
29:17 Kám m̄-sī chi̍t-sî-á kú ê sî-kan, Le-ba-nòng ē piàn-chò hó ê chhân, hó ê chhân ē khòaⁿ-chò ná chhiū-nâ?
29:18 Hit ji̍t, chhàu-hīⁿ-lâng ê ē thiaⁿ tio̍h chheh lāi ê ōe, chheⁿmê-.ê ê ba̍k-chiu ē tùi bông-bū o͘-àm tiong tit tio̍h khòaⁿ-kìⁿ.
29:19 Khiam-pi ê lâng ē in-ūi Siōng-chú lâi ke-thiⁿ in ê hoaⁿ-hí; sè-kan ê sànchhiah lâng ē in-ūi I-su-la-el ê sèng ê lâi khoài-lo̍k.
29:20 In-ūi kiông-pō ê lâng í-keng siau-sit, bú-bān ê lâng í-keng bia̍t-bông; só͘-ū chhōe ki-hōe chò pháiⁿ ê lâng mā lóng siū chián-tû.
29:21 In ūi tio̍h chi̍t kù ōe lâi kā lâng chek-chōe, siat oa̍h-tauh lâi hām-hāi tī siâⁿ mn̂g teh tok-chek ê lâng, koh ēng bô-iáⁿ ê tāichì lâi óng-khut gī lâng.
29:22 Só͘-í, kiù-sio̍k A-bu-la-hàm ê Siōng-tè lūn Iâ-kop ê ke ê sî, ánne kóng, " Iâ-kop taⁿ it-tēng bô koh kiàn-siàu, i ê bīn mā bô piàn-sek.
29:23 Tng i khòaⁿ tio̍h i ê chèng kiáⁿ, to̍h-sī Góa ê chhiú só͘ chò ê tī i ê tiong-kan, in ē chun Góa ê miâ chò sèng, ē chun Iâ-kop ê sèng ê chò sèng, ē kèng-ùi I-su-la-el ê Siōng-tè.
29:24 " Sim lāi hô͘-tô͘ ê lâng ē tit tio̍h bêng-pe̍k, m̄-kam-goān ê lâng ē siū kà-sī. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。