历代志下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 Iô-sa-hoat kah i ê chó͘-sian tâng khùn, kah i ê chó͘-sian chòng tī Ta-bi̍t ê siâⁿ. I ê kiáⁿ Io-lâm sòa-chiap i chò ông.
21:2 Iô-tah Ông Io-lâm
( LOH 8: 17-24)
Io-lâm ū kúi-nā-ê sió-tī, to̍h-sī Iô-sa-hoat ê kiáⁿ A-cha-lí-ah, Ia-chi-el, Che-ka-lí-ah, A-cha-lí-ah, Mî-khá-el, Si-hoa-ti-ah, chiahê lóng sī I-su-la-el ông Iô-sa-hoat ê kiáⁿ.
21:3 In lāu-pē ēng chin chē sán-gia̍p hō͘ in, to̍h-sī kim, gîn, pó-pòe kah Iô-tah tē kian-kò͘ ê siâⁿ hō͘ in; chóng-.sī, kā kok-ūi hō͘ Io-lâm, in-ūi i sī tōa-kiáⁿ.
21:4 Io-lâm khí-lâi chē i ê lāu-pē ê ūi, kakī kiông-sēng, chiū ēng to thâi-sí i ê chèng sió-tī kah I-su-la-el kúi-nā-ê siú-léng.
21:5 Io-lâm chē-ūi ê sî saⁿ-cha̍p jī hòe, tī Ê-lú-sa-lèm chò ông kiōng peh nî.
21:6 I kiâⁿ I-su-la-el chiahê ông ê lō͘ kah A-hap ê ke bô koh-iūⁿ, in-ūi i chhōa A-hap ê chabó͘ kiáⁿ chò bó͘, kiâⁿ Siōng-chú só͘ khòaⁿ-chò pháiⁿ ê tāichì.
21:7 Chóng-.sī, Siōng-chú in-ūi kakī kah Ta-bi̍t li̍p ê iok, m̄-kam bia̍t Ta-bi̍t ê ke, chiàu I só͘ èng-ín ê, éng-oán siúⁿ-sù chi̍t pha teng hō͘ i kah i ê kiáⁿ-sun.
21:8 Tng Io-lâm ê nî-kan, E-tóm pōe-poān Iô-tah, thoat-lī i ê chhiú-thâu, kakī siat-li̍p chò ông.
21:9 Io-lâm chiū chhōa i hiahê kun-tiúⁿ kah só͘-ū ê chiàn-chhia kòe-.khì, thàu-mê khí-.lâi, phah hiahê kā i ûi-khùn ê E-tóm lâng kah hiahê chhia-tiúⁿ.
21:10 Án-ne, E-tóm lâng pōe-poān Iô-tah, thoat-lī i ê chhiú-thâu, kàu kin-á-ji̍t. Siâng hit sî, Lip-nah lâng mā pōe-poān, thoat-lī i ê chhiú-thâu, in-ūi Io-lâm khì-sak Siōng-chú — i ê chó͘-sian ê Siōng-tè.
21:11 I koh tī Iô-tah ê soaⁿ khí soaⁿ-thâu tôaⁿ, hō͘ tòa tī Ê-lú-sa-lèm ê jîn-bîn kiâⁿ siâ-îm, koh iú-he̍k Iô-tah lâng.
21:12 Sian-ti E-li-iah siá phoe kià hō͘ Io-lâm, kóng, " Siōng-chú — lí ê chó͘-sian Ta-bi̍t ê Siōng-tè ánne kóng, ' In-ūi lí bô kiâⁿ lí ê pē — Iô-sa-hoat ê lō͘ kah Iô-tah ông A-sah ê lō͘,
21:13 to̍h-sī kiâⁿ I-su-la-el chiahê ông ê lō͘, koh hō͘ Iô-tah kah Ê-lú-sa-lèm ê jîn-bîn kiâⁿ siâ-îm, chhin-chhiūⁿ A-hap ê ke kiâⁿ siâ-îm, jî-chhiáⁿ thâi lí ê lāu-pē ê ke pí lí khah hó ê hiahê sió-tī.
21:14 Só͘-í, Siōng-chú beh kàng tōa chai-hō lâi phah lí ê jîn-bîn kah lí ê kiáⁿ-jî, lí ê bó͘, í-ki̍p lí it-chhè só͘-ū ê.
21:15 Lí ê tn̂g-tō͘ ē hoān tio̍h tāng pēⁿ, ta̍k ji̍t ná tāng, tì-sú lí ê tn̂g-á thu̍t chhut-.lâi. '"
21:16 Siōng-chú kek-tōng Hui-lī-sū lâng kah óa-kīn Kú-si̍t ê A-la-puh lâng ê sim, lâi kong-kek Io-lâm.
21:17 In khí-lâi kong-kek Iô-tah, chhim-ji̍p kéng lāi, chhiúⁿ-toa̍t ông-kiong lāi só͘ tú-.tio̍h ê châi-bu̍t kah i hiahê kiáⁿ, hiahê bó͘, tû i ê soah-bóe kiáⁿ E-hoa-há-chuh í-gōa, bô kā i lâu kah chi̍t-ê kiáⁿ.
21:18 Chiahê tāichì í-āu, Siōng-chú kā i phah, hō͘ i ê tn̂g-á hoān tio̍h bē i-tit ê pēⁿ.
21:19 Án-ne chin kú, nn̄g nî āu, i ê tn̂g-á ūi tio̍h pēⁿ thu̍t chhut-.lâi, in-ūi chit-ê pēⁿ chin tāng chiū sí. I ê jîn-bîn bô kā i kiâⁿ sio ê lé-sò͘, chhin-chhiūⁿ chêng kā i ê chó͘-sian só͘ sio ê.
21:20 Io-lâm chē-ūi ê sî saⁿ-cha̍p jī hòe, tī Ê-lú-sa-lèm chò ông kiōng peh nî. I lī-khui sè-kan bô lâng siàu-liām i, lâng kā i bâi-chòng tī Ta-bi̍t ê siâⁿ, chóng-.sī, bô tī lia̍t ông ê bōng-hn̂g lāi.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。