历代志下 线上收听:中文和合本 现代中文译本修订版 现代台语 台语圣经 客语 希伯来文读经 下载档案 关于语音圣经
8:1 Só͘-lô-móng ê Sêng-chiū
( LOS 9: 10-28)
Kàu jī-cha̍p nî ê nî bóe, to̍h-sī Só͘-lô-móng khí Siōng-chú ê tiān kah ông-kiong oân-kang ê sî.
8:2 Só͘-lô-móng koh khí Hi-lâm só͘ hō͘ Só͘-lô-móng hiahê siâⁿ, hō͘ I-su-la-el lâng tòa tī hia.
8:3 Só͘-lô-móng khì-kàu Ha-mat-cho͘-bah, kā i cheng-ho̍k.
8:4 I koh tī khòng-iá khí Ta̍t-mo͘l kah tī Ha-mat só͘ khí hiahê kim-khò͘ ê siâⁿ,
8:5 koh khí téng Bia̍t-ho-lông kah ē Bia̍t-ho-lông, sī hiám-iàu ê siâⁿ, ū chhiûⁿ, ū mn̂g koh ū kông;
8:6 koh khí Ba-la̍h kah Só͘-lô-móng só͘-ū kim-khò͘ ê siâⁿ, kah hē chhia ê siâⁿ, kah bé-peng ê siâⁿ, kah Só͘-lô-móng tī Ê-lú-sa-lèm, tī Le-ba-nòng kah tī i só͘ tī-lí ê choân tē, ūi kakī ê khoài-lo̍k só͘ ài khí ê, lóng kā i khí.
8:7 Kóng tio̍h só͘ chhun lo̍h-.lâi ê jîn-bîn, Hiat lâng, A-mô͘-lī lâng, Pe-lí-ji lâng, Hi-bī lâng, I-é-bú-suh lâng, m̄-sī sio̍k tī I-su-la-el ê,
8:8 to̍h-sī tī chit tē-hng in só͘ chhun lo̍h-.lâi ê kiáⁿ-sun, I-su-la-el lâng bô kā in choân-pō͘ bia̍t ê, Só͘-lô-móng chiū phài in chò khó͘-kang kàu kin-á-ji̍t.
8:9 Chóng-.sī, Só͘-lô-móng bô hō͘ I-su-la-el lâng chò lô͘-po̍k, chò i ê kang, sī chò i ê chiàn-sū, kun-tiúⁿ ê siú-léng, chhia-tiúⁿ, bé-peng-tiúⁿ.
8:10 Só͘-lô-móng ông ê tōa-koaⁿ koán-lí jîn-bîn ê, nn̄g-pah gō͘-cha̍p lâng.
8:11 Só͘-lô-móng tòa Hôa-láu ê chabó͘ kiáⁿ tùi Ta-bi̍t ê siâⁿ lâi-kàu i só͘ kā i khí ê chhù; in-ūi kóng, " Góa ê bó͘ m̄ thang tòa tī I-su-la-el ông Ta-bi̍t ê chhù, in-ūi Siōng-chú ê kūi só͘ kàu ê só͘-chāi lóng sī sèng-tē. "
8:12 Só͘-lô-móng tī Siōng-chú ê tôaⁿ, to̍h-sī tī mn̂g-lông ê thâu-chêng só͘ khí ê, hiàn sio-chè hō͘ Siōng-chú;
8:13 chiàu Mô͘-se só͘ bēng-lēng ê, tī An-hioh-ji̍t, goe̍h ê chhe-it kah chi̍t nî saⁿ pái só͘ tiāⁿ tio̍h ê cheh, to̍h-sī Tû-kàⁿ-cheh, Chhit-chhit-cheh, Tòa-pêⁿ-cheh, chiàu ta̍k ji̍t só͘ eng-kai hiàn ê lâi hiàn.
8:14 Koh chiàu i ê lāu-pē Ta-bi̍t ê lē, tiāⁿ tio̍h chè-si ê pan-lia̍t lâi chò i ê kang, koh tiāⁿ tio̍h Lē-bī lâng chīn in ê chit, hō͘ in oló, koh tī chè-si ê bīn-chêng ho̍k-sāi, chiàu ta̍k ji̍t só͘ eng-kai chò ê, koh siat-li̍p kò͘-mn̂g ê, chiàu in ê pan-lia̍t, tī ta̍k-ê mn̂g. Che sī Siōng-tè ê lô͘-po̍k — Ta-bi̍t só͘ bēng-lēng ê.
8:15 Ông só͘ bēng-lēng hiahê chè-si kah Lē-bī lâng, bô-lūn koán kim-khò͘ á-.sī pa̍t hāng sū, in lóng bô ûi-pōe.
8:16 Só͘-lô-móng khí Siōng-chú ê tiān, tùi hē tē-ki kàu sêng-kong ê ji̍t, kang-liāu lóng tāi-seng chún-pī, ánne Siōng-chú ê tiān lóng khí hó.
8:17 Hit sî, Só͘-lô-móng khì E-tóm tē, kàu tī hái-hōaⁿ ê E-chióng-ge-bel kah Ê-no͘k.
8:18 Hi-lâm thok i ê lô͘-po̍k, chhe chûn-chiah kah chai-iáⁿ hái-lō͘ ê lô͘-po̍k, lâi-kàu i hia. In kah Só͘-lô-móng ê lô͘-po̍k kàu O͘-huil, tùi hia tit tio̍h kim sì-pah gō͘-cha̍p tha-lan-t, ūn kàu Só͘-lô-móng ông hia.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。