Chit章记载先知撒迦利亚看见ê第五个异象。Ná亲像tī前一讲所提起ê，先知撒迦利亚所看tio̍h ê异象，每一个异象lóng有它特别ê意义。

第一个异象中，指出上帝ê赦免已经降临在伊ê子民中间。

第二个异象中，hō͘咱看tio̍h上帝ài beh进行审判ê工作，beh hō͘ hiah-ê欺负弱势族群者受tio̍h严厉ê制裁。

第三个异象thang看tio̍h上帝hō͘ in他ê子民有一个应允，就是beh成做in ê保护者，上帝beh用「火墙」围in所建造起来ê耶路撒冷城，并且beh hō͘ hit-ê城成做siōng繁荣ê城市，因为hit-ê城有上帝kah之同在。

第四个异象则讲tio̍h大祭司身上ê衫裤teh代表上帝ê子民，虽然是lah-sap到不堪入目的状况，m̄-koh上帝深爱chiah-ê苦难ê子民，m̄-nā beh kā大祭司身上ê lah-sap衫裤换做清气ê，而且iáu koh-khah tio̍h帮伊戴上荣耀ê冠冕，而且上帝iáu koh-khah beh垂听大祭司所献ê祈祷。

以上chiah-ê异象lóng说明了一个重要ê连接点：上帝已经赦免以色列人民，现tī上帝beh koh再成做in ê保护者，并且beh带领in重新建造耶路撒冷城，hō͘伊成做一个繁荣ê城市，一个以敬拜上帝做中心ê城市。

先知撒迦利亚ê异象中比较khah特别ê所在，就是一开始就传出上帝怜悯ê信息，这kah一般先知文献来比较khah真无仝款。若是翻阅先知文献，lóng会看tio̍h先有上帝ê忿怒之指控，然后呼吁以色列子民tio̍h认罪、悔改，以祈上帝ê怜悯kah赦免。M̄-koh先知撒迦利亚ê异象tùi开始就是传出上帝beh赦免in，然后续落来连续ê异象，lóng是好ê信息，chit对tú tùi奴役之地巴比伦回国ê以色列人民来讲，是非常大ê鼓励。即使teh整理家园了后已经感觉非常倦tah-tah，ē-sái讲是先知撒迦利亚chit种信息对in来讲，无疑是一针强心剂。原因是有上帝ê怜悯、赦免，而且beh成做in ê保护者，koh应允beh hō͘ in所teh beh重建ê耶路撒冷城kah圣殿，成做众人聚集ê城市，mā是万民敬拜ê圣殿，这听起来是jōa-ni̍h-á thang期待ê美景。

第1节，chia讲先知撒迦利亚看tio̍h chit-ê异象，是tùi眠梦中被天使叫醒起来ê。非常奇特ê是先知撒迦利亚看tio̍h ê异象，lóng会有一个天使来解析异象ê内容。这第五个异象，非常清楚写是tī困落眠中被天使叫醒起来ê而看tio̍h ê。

第2节，chit节提起chit-ê异象是有关灯台kah灯，而beh了解灯台kah灯chit方面ê事，thang参考出埃及记第廿五章31到39节，tī摩西法律中真清楚记载圣幕里ê灯台lóng是用纯金打造ê，而且整座灯台lóng是。仝款ê，chia ê灯台mā是有「七盏灯」，而且「每盏灯lóng有七个灯心」，tùi「七盏灯」到「七个灯心」，lóng teh凸显出「七」chit-ê数字ê意义。

第3节，tī chit异象中特别ê所在是tī灯台ê顶面有一个「碗」，而这碗ê两pêng各有一丛「橄榄树」。出埃及记第廿七章20节真清楚记载灯台ê油一定tio̍h是「siōng好ê橄榄油」。所以这已经teh表明这灯ê油是直接由橄榄树á顶ê橄榄滴出ê，án-ne，chiah-ê灯就永远bē熄灭。

第4到5节，天使问先知撒迦利亚，是m̄是明白chit种异象所beh说明ê意义？先知撒迦利亚ê回答是「m̄知」。Ná亲像头前ê异象仝款，每一个异象lóng是天使kah先知撒迦利亚teh对话，由先知提出问题，由天使回答。

第10节b句到14节，ài beh特别注意ê是chit段经文tī编辑上ê差别；亲像《台语汉字本》，就是照tio̍h希伯来文圣经本来ê编辑方式，kā《现代中文译本》ê第6到10节a句顺tio̍h第5节编排落去。Á中文《和合本》ê版本、《吕振中教授版本》ê译本mā lóng是án-ne。Koh再看英文ê《新国王钦订本（NKJV）》、《犹太人圣经（The Jewish Bible）》等版本都是án-ne ê编排方式。M̄-koh，《耶路撒冷版本（The Jerusalem Bible）》圣经则tī编辑上kah《现代中文译本》仝款，而天主教《思高圣经学会晓版本》mā是án-ne子编排。

第10节b句，chit节讲天使回答先知撒迦利亚，hō͘伊知影七盏灯乃是代表上帝ê「七个目睭」。Tī第四个异象中，提起上帝beh放一块石头tī大祭司约书亚ê面前，chit块石头壳顶有「七个面」（mā thang讲「七个目睭」）。意思就是ē-tàng看kah非常清楚，无法度隐瞒。

如果圣幕就是敬拜上帝ê所在，án-ne，tī圣幕里ê灯台有七盏灯，而这七盏灯teh表示上帝ê七个目睭，án-ne就koh khah清楚teh说明：敬拜上帝ê所在，bē-tàng有隐瞒á是欺骗ê心，因为上帝非常清楚每一个人ê心思意念。上帝看人ê心内，而且是看kah非常清楚，ná亲像chia讲ê，上帝ê七个目睭teh看「kui个世界」，表示tī chit世上无任何一件事thang遮上帝ê目睭。

第11到12节，这是先知撒迦利亚进一步询问有关两棵橄榄树ê问题，tī第12节则koh khah清楚讲tio̍h这两棵橄榄树ê树枝，是kah倒橄榄油入灯壶ê「两支金管」相连接ê。这就koh khah清楚hō͘咱看tio̍h一幅图案：橄榄树所榨出来ê油，就直接灌入了灯壶中，án-ne，灯ê油永远bē枯干，灯会永远点to̍h而发出亮光。

第13到14节，teh kah天使ê对话中，天使beh hō͘先知撒迦利亚知影，就是两棵橄榄树象徵ê是两个被选出来ê领导者。Chia并无讲chit两个领导者是什么人？m̄-koh tùi第三章ê第四个异象中看tio̍h一个大祭司，伊就是哈该书中所提起ê约撒达ê kiáⁿ儿大祭司约书亚，而另外一个就是tī chit章第6节所提起ê所罗巴伯；伊是撒拉铁ê kiáⁿ儿（参考哈该书一：1）。

所罗巴伯是回乡群众中，被波斯帝国ê皇帝塞鲁士任命为犹大省长，负责管理chiah-ê tńg来归故乡ê以色列人民，伊并且是带领以色列人民重建耶路撒冷城kah圣殿ê重要领袖之一（参考以斯拉记五：2）。哈该书第二章廿三节án-ne记载上帝透过先哈该传hō͘所罗巴伯ê信息讲：「万军ê 上主讲：我ê 奴仆— 撒拉铁ê kiáⁿ 所罗巴伯，当hit 日，我beh 召你，上主án-ne讲：而且我beh 用你做手指印，因为我bat 拣选你。这是万军ê 上主讲ê。(全民版)」

这就真清楚，所罗巴伯就是一位政治领袖，而大祭司约书亚则一位宗教信仰ê领导者。In两人beh带领全体以色列人民敬拜上帝、事奉上帝。

第6节，chia讲上帝ài先知撒迦利亚kā他ê信息是beh转hō͘所罗巴伯ê，上帝beh hō͘所罗巴伯知影，重新建造耶路撒冷城，特别是tī圣殿ê部分，并「m̄是靠武力、才能，却是óa靠上帝ê灵」chiah ē-tàng成就chit件重建ê工作。

人会认为有强壮ê武力，就ē-tàng所向无敌，如入无人ê境。M̄-koh先知撒迦利亚传出ê信息则m̄是án-ne。若是无上帝带领，即使siōng精锐ê部队mā是仝款，lóng无用武之地。Chit件事thang tùi以色列人民出埃及过红海ê神迹看出来。人ê才能方面，thang用经济力量、学识、技艺等chiah-ê来呈现出来。M̄-koh即使有chiah-ê，若是无上帝ê看顾、带领，mā激发bē出甚么特别ê创意，就算koh再好ê头脑，mā会有m̄知如何是好ê时，甚至只要来一个地动、风台、虫害等等，就够额hō͘人有m̄知如何是好ê感触。

第7节，chit节讲出óa靠上帝会带来ê结果，就是thang超越所有ê障碍，chit种障碍m̄-nā是tī经费上ê困难，koh khah大ê阻碍是来自外族人ê阻碍。Chit节讲当「最后一块石头khǹg起lih去ê时」，mā就是圣殿建造完成ê时，就tī chit-ê时chūn，众人lóng会欢呼，因为kui个建筑实在是太棒à。Chit句「jōa-ni̍h-á壮观，jōa-ni̍h-á壮观」ê话，thang参考马可福音第十三章1节，当门徒tùi耶路撒冷圣殿行出来，看tio̍h整座圣殿ê宏伟ê时，对耶稣基督讲chit种话：「老师，你看，这是jōa大ê石头，chē宏伟ê建筑！」

第8到9节，这并m̄是另外一个新ê异象，却是天使继续teh解释这第五个异象所传达出来ê信息。第一pái ê信息出现tī第6到7节，ài先知撒迦利亚传达hō͘所罗巴伯知影，建造圣殿并m̄是óa靠人ê力量，却是óa靠圣神ê带领。现tī第二pái ê信息则非常清楚，beh kā所罗巴伯讲，hō͘伊明白m̄免惊惶，mā m̄免担心，tī伊ê手中会完成建造圣殿ê工作。

第9节下半句mā同时出现对先知撒迦利亚ê鼓舞，chit句「咱ê子民就知影是我—上主、万军ê统帅差遣你到in he里去ê」，tī第二章9节、11节，以及第六章15节等等所在lóng有出现，主要是beh hō͘先知撒迦利亚知影，m̄免失志、馁志，上帝真正是kah伊同在，bē hō͘伊孤单、被戏谑，上帝beh hō͘伊明白chiah-ê信息lóng会实现，会hō͘所有听tio̍h ê人lóng因为án-ne加倍尊崇伊。

第10节a句，chit节讲出了当时in建造圣殿是因为有人阻扰而迟缓了一kóa时间。M̄-koh另外一方面mā有发生tī以色列人民内部ê问题，就是有人因为全心参与建造耶路撒冷城kah圣殿ê工作，致使bē记得家计生活ê需要，致使厝里生活陷入贫困iau饿中，koh khah严重ê是有人竟然为tio̍h生活ê需要，kā田园土地抵押借钱，甚至被迫一定tio̍h卖kiáⁿ儿做奴隶chiah ē-tàng过生活，chiah-ê事件thang tùi尼希米记第五章ê记事中看出来（参考尼希米记五：1—6）。做一个人无能力供给生活所需要ê时，就真oh tī工作上尽心、尽力，尤其tī重建耶路撒冷城kah圣殿ê工作，lóng是大家抽空出来参与ê，若是因为án-ne hō͘性命陷入贫困ê状态，建造起来ê圣殿必定会有缺陷，围筑起来ê城墙必定是残缺不全。

Chia用「当in看见所罗巴伯the̍h测锤继续建造圣殿，in会真欢喜」chit句话，意思就是讲：当in看tio̍h所罗巴伯teh进行建造圣殿ê工作ê时，千万m̄-thang看轻建造圣殿ê工作，因为he chiah是hō͘ in性命丰富起来ê力量，hō͘ in性命齐全、有活力ê记号。