Chit章ē-sái讲是撒迦利亚书siōng难bat ê一章经文，原因是chit章里ê譬喻充满tio̍h预言，而chiah-ê预言到底是teh讲甚么时代背景？真oh厘清。

先知撒迦利亚ê信息中，ná亲像其他先知仝款，传出上帝beh带领因为国家沦亡而四散到世界各地ê以色列人民tńg去故乡，重建家园。上帝beh koh一pái成做以色列民族ê上帝，而以色列民族teh beh koh一pái成做上帝ê子民。Chiah-ê信息tú好说明了上帝ê慈爱确实是ná亲像诗篇ê诗人所讲，上帝无久怀受气，mā不轻易受气，并且有丰富ê慈爱，所以无照人所犯ê过错报应人（参考诗篇一○三：8—10）。Á chit点mā to̍h是kui本圣经ê中心信息。

Chit章ê第4到17节mā ē-sái讲是旧约圣经siōng难处理ê经文，真可能是一种寓意ê讲法，所以圣经学者teh解释上非常分歧。Tùi第4到14节ê chit段经文，是teh描述一个好ê顾羊人，是会好好á照顾伊ê羊群。然后tùi第15到17节，是描述一个邪恶ê顾羊人是一个怎样ê态度。真oh理解ê所在在tī原本好ê牧者，后来却变成pháiⁿ ê牧者，两个之间有真大ê cheng差。

第1到3节，这是一首诗歌，而且是一首哀歌，teh描述黎巴嫩kah巴珊遇tio̍h惨重灾难ê情景。Ná亲像头前已经绍介过，黎巴嫩siōng出名ê就是香柏木，mā是所罗门王建造耶路撒冷圣殿kah宫殿ê时使用ê建材。M̄-koh chit-má，上帝ê审判来临ê时，即使伟大高壮ná亲像香柏树仝款壮大ê君王，伊统治ê城门会被敌人phah开，城池会hō͘敌人用无情ê烽火hō͘烧毁。

chia提起「巴珊」这是一个土地肥，草原辽阔，水源充沛ê所在，因为án-ne畜牧业非常出名。M̄-koh tī上帝ê审判下，chiah-ê青草翠绿ê景象以后be7 koh存在，过去繁荣ê畜牧业、林业等，lóng kā因为án-ne荒废、摧毁。

第4到5节，chia描述一个恶质ê主人对待羊群ê凶恶面谱。这恶质ê顾羊人宰杀羊群、贩卖羊肉，然后tī得tio̍h金钱了后，却用来歌颂上帝ê赏赐kah赐福。这明明是就是tī亵渎上帝ê神圣kah慈爱。所以上帝beh严厉惩罚chiah-ni̍h恶质ê顾羊人。

圣经作者mā用「牧者」来譬喻一个国家ê君王，羊群就是teh指被chit位君王统治ê人民。先知撒迦利亚chia传出ê信息指控chiah-ê君王并m̄是好牧者，却是邪恶ê顾羊人，in kan-taⁿ会想tio̍h beh tùi人民ê身上搜刮一切，甚至是出卖人民hō͘敌人chit种事mā做得出来。

其实，先知撒迦利亚chit种信息并m̄是无ê放矢，所罗门王bat为tio̍h beh建造庞（pâng）大koh奢华ê宫殿，thang割hō͘「加利利地区ê二十座城」kah人民当工资hō͘泰尔ê希兰王（参考列王记上九：11）。为tio̍h beh应付宫殿一千个妃嫔（参考列王记上十一：6）kah伊家己奢华生活ê所需要ê（参考列王记上四：22—23），真自然ê，伊需要透过课重税来支付。Á犹大约雅敬王却为tio̍h beh盖堂皇ê宫殿，m̄-nā增加税赋，故意不发工资hō͘工人，甚至iáu流无辜ê ê血（参考耶利米书廿二：13—14）。

第6节，先知撒迦利亚讲出一个重要观念，就是做一个领导者若是非法妄为，人民应该勇敢起来对抗，kā它推翻，án-ne chiah是正确ê方式。否则放纵有权势继续做pháiⁿ。Chit节讲出上帝决定「无koh怜悯chit-ê地ê人」，然后ài chit-ê地ê人，上到君王，下到一般人民lóng「交tī统治者手中」，而这新ê统治者「会thún踏」in。

第7到8节，chia先知撒迦利亚讲伊被「雇用」当牧者，然后伊the̍h「两条牧杖」，其中一条叫「恩惠」，另一条则称做「合一」。所讲「恩惠」mā ē-sái讲是「荣耀」、「美丽」，á是「恩宠」。这表示上帝ê荣耀受tio̍h损伤。所以上帝绝对bē许可他忠实ê子民受tio̍h侮辱，上帝ê子民必定会因为有他ê带领而显出荣耀、尊容。

「合一」，若是tùi两条杖来看，mā thang明白上帝ê恩典就是beh带领以色列民族重新整合起来。这两条杖mā ē-sái讲是teh代表北国以色列kah南国ê犹大。一边用一条杖保护tio̍h，然后kā两个分裂ê族群重新整合起来。换句话讲，上帝beh亲自带领chit-ê民族，bē偏袒一方，疏忽了另外一方。

Chia讲有三个「恨」伊ê「顾羊人」，in这有可能是teh指ē-tàng是teh指政治领袖，mā可能是宗教领袖，包括祭司阶级ê人，以及历代ê众先知。In lóng因为先知撒迦利亚传出上帝ê信息，感觉讨厌，因为in无欢喜欺骗人民ê事，被先知撒迦利亚拆破出来。

第9节，chit节讲chit位hō͘上帝任命ê忠实「牧者」发见上帝ê子民并无接纳伊，就án-ne伊决定放弃带领，beh hō͘ in家己去放荡，而chit种结果就是死亡。这真像使徒保罗所讲ê，做一个人拒绝接受上帝ê救恩ê时，上帝最后ê一个方法就是「chhut-chāi」chit种人去过in所喜爱ê「死亡游戏」（参考罗马书一：21—32）。

第10节，chit位牧者决定kā手中这第一条叫「恩惠」ê拐á hō͘ at断。Chia强调chit支名叫「恩惠」ê拐á所代表ê意思是「约」，表示上帝ê荣耀。这mā teh隐喻上帝以后be7 koh kah chiah-ê悖逆ê子民同在。

第11到12节，chia koh一pái提起「买卖羊群ê人」ê商人。In同意用「三十块银á做工资」，买下了chit群羊。Chia ê「三十块银á」，mā常被the̍h来隐喻tio̍h犹大出出卖耶稣ê价钱。

第13节，上帝对chit-ê忠心ê奴仆讲，ài伊kā the̍h-tio̍h ê这笔三十块银á「khǹg入去」圣殿ê「银库」中。Chit-ê「khǹg入去」一词ê希伯来文是teh指「tàn入去」ê意思。若是「tàn入去」，kah用小心翼翼ê方式「khǹg入去」去就无仝款à。马太福音第廿七章5节记载犹大出出卖耶稣基督得tio̍h三十块银á了后，发见做m̄-tio̍h去，mā是仝款kā chit三十块银á「丢tī圣殿里」。

第14节，chia先知撒迦利亚讲beh「at断」第二根「合一」ê拐á，这就表示「犹大kah以色列」kā无法度「统一」，kan-taⁿ会koh一pái陷入混乱、动荡不安ê状况中，到最后就是行上了灭亡ê途径。原因是in无愿意hō͘上帝所差派ê奴仆带领，而想beh óa靠家己ê能力。

第15节，上帝ài先知撒迦利亚koh一pái扮演「pháiⁿ牧者」ê角色，beh传达ê信息就是hō͘以色列人民知影，pháiⁿ牧者ê样式，kah chit种牧者所带来ê结果。

第16节，真清楚描述pháiⁿ牧者ê样式，包括有下列几个特点：

一是bē帮助hiah-ê受tio̍h吓(heⁿh)惊ê。当羊群受tio̍h打击，á是tú-tio̍h危险逼近ê时chūn，就会因受tio̍h吓(heⁿh)惊而四界乱窜。一个好ê牧者会用伊ê声音来安慰chiah-ê羊群，hō͘ in知影牧者就tī in身边庇护，m̄免惊惶。

二是不chhōe迷失ê。这是无近óa跟tòe tī牧者身边，行离了羊群。若是好ê牧者就会无顾一切去chhōe迷失ê羊，直到chhōe-tio̍h为止（参考路加福音十五：4—7）。

三是不医受伤ê。羊群受tio̍h野兽攻击ê时，m̄是吓(heⁿh)惊，就是会为tio̍h beh逃避灾难而四界乱窜，á是直接受tio̍h攻击而受伤，甚至死亡。

四是不养饲iáu活teh ê。这是siōng惨ê顾羊人。因为头前三种羊真可能lóng会面临死亡。M̄-koh若是连无tú-tio̍h灾难ê羊lóng m̄养饲，hō͘ in siōng基本ê食物，án-ne，chiah-ê羊一定会活活饿死。

以上四种lóng讲出一个顾羊人siōng基本该做到ê事，m̄-koh pháiⁿ牧者lóng怠忽应尽ê职责。而且iáu做koh khah恶质ê事，就是这pháiⁿ牧者「食掉siōng肥美ê羊，拆裂in ê蹄」，结果羊就无法度行动而陷入性命ê危险。

第17节，chit节用一首短诗来结束，mā讲出上帝beh采取ê行动，就是严厉惩罚chit种恶质ê顾羊人，而惩罚ê结果是hō͘ chiah-ê怠忽职守ê顾羊人变成残废、无用ê人。