罗马书 8章1节 到 8章17节   背景资料  上一笔  下一笔
Chit章是teh说明一个信耶稣ê人,怎样得tio̍h永恒ê性命。Tī chit章,使徒保罗主要teh说明一个真正以耶稣为伊性命中心ê人,无任何力量ē-tàng kā伊kah上帝之间ê关系切断,原因只有一点:因为有耶稣。使徒保罗tī chit章中,伊用「属tī圣神」kah「属tī本性」chit种词句来做区隔「信」耶稣kah「m̄信」耶稣之间ê差别。Tī chit章,使徒保罗继续teh说明一个活tī耶稣内面ê人,kah活tī律法之下ê人之间ê差别。

Chit段经文使徒保罗提出一个重要ê观念:当人无法度自拔ê时chūn,上帝ê圣神却是人óa靠ê气力来源。圣经是上帝做工ê气力,mā是上帝显示hō͘人迈向永生之道ê气力。使徒保罗强调:圣神是hō͘咱kah耶稣结连做伙ê气力。相对ê,人ê本性则是beh hō͘人tùi kah耶稣结连ê环节上脱离。因为án-ne,伊认为圣神kah人ê本性是相对ê,甚至是对敌ê。伊特别提起信耶稣为性命之主ê人,会有真大ê福气,就是上帝ê圣神会kah chit种人同在,hō͘伊拥有新ê性命。Á圣神,是上帝改造人心ê气力。

Koh讲,使徒保罗用老父kah子女之间ê关系,来形容基督徒ná亲像上帝ê Kiáⁿ仝款。Chit种观念其实是tùi以色列民族tī信仰上ê认知延伸来ê。以色列人民一直自认为是上帝ê Kiáⁿ,上帝就是in ê老父(参考出埃及记四:22)

第1节,使徒保罗一开始就斩钉截铁地讲活tī耶稣内面ê人,bē被定罪。因为tī耶稣内面ê人,已经向罪宣告死亡,是kah耶稣同齐同钉十字架à。耶稣ê十字架siōng大功劳,就是hō͘人tùi罪ê奴隶中得tio̍h tháu放。

第2到4节,使徒保罗强调,一个人ē-tàng kah耶稣联合做伙,并m̄是人家己有chit种能力,却是因为「圣神ê法则」所带来ê结果。圣神能 kā人tùi罪恶中「tháu放」出来,hō͘人kah耶稣连结做伙。伊讲摩西律法所无法度成就ê事,上帝亲自差遣伊ê kiáⁿ耶稣来成就chit件事,就是hō͘人tùi罪ê中间脱离出来。

第5到8节,使徒保罗koh khah清楚表明圣神kah人ê本性之间siōng大ê差别,乃是圣神hō͘人得tio̍h性命,á人ê本性则chhōa人进入死亡(第6节)。第8节讲「顺服本性ê人无法度得tio̍h上帝ê欢喜」,意思ná亲像第十四章17到18 节讲ê:「上帝ê主权无在tī lim食,á在tī圣神所赐ê公正、和平、喜乐。Án-ne事奉基督ê人必定得tio̍h上帝ê欢喜kah人ê o-ló。」chia ê「公正、和平、喜乐」,mā是圣经ê中心信息,信耶稣ê人会tī生活上显示出chit种力量,á chit种力量m̄是tùi律法学习tio̍h ê,却是来自圣神ê引chhōa。

第9到10节,这短短三节中,使徒保罗提起信耶稣为性命之主ê人,会有真大ê福气,就是上帝ê圣神会kah chit种人同在,hō͘伊拥有新ê性命。Tī犹太人看起来,一个人ê性命如果无「上帝ê灵」同在,chit-ê人ê性命就算是「死」ê,因为hō͘人成做「有性命ê人」,就是因为「上帝ê灵」pûn入去人ê内面(参考创世记二:7)。因为án-ne,做一个人「死」ê时chūn,就是表示chit-ê人ê性命已经无了上帝ê灵tī伊ê身躯内面。第10节ê「上帝ê灵beh hō͘ lín活」,chit句话thang参考罗马书第八章2节,使徒保罗讲这是因为人顺服「圣神ê法则」ê缘故。当人顺服「圣神法则」ê时,就是新ê性命开始,等于是「新造ê人」(参考哥林多后书五:17)。

第11节,使徒保罗真清楚teh表达一个基本信念:kah耶稣相连结ê人,就会kah耶稣同齐死,mā同齐koh活(参考罗马书六:8),chit点ē-sái讲是伊写罗马书ê基本思想结构,mā ē-sái讲是使徒保罗kui个思想ê主轴。

第12到13节,chia所讲ê「负债」,而且强调m̄是「欠本性ê债」,因为「本性」是teh指肉体。Án-ne,使徒保罗tī chia ê意思是teh指:若tī耶稣内面,人ê性命(心灵)tùi原本是罪ê奴隶中被赎回,chit-má是属tī上帝ê à。因为án-ne,人只有óa靠圣神ê气力,chiah ē-tàng抵挡罪ê诱惑。

第14到16节,使徒保罗Tī chit段经文中,上帝所赐ê灵,是beh hō͘人「有上帝kiáⁿ ê名份」,án-ne,一个信耶稣ê人,就ná亲像hō͘ 上帝用高价赎回来ê仝款,赎回ê方式是耶稣死tī十字架,hō͘信ê人有新ê身分,tùi过去做罪ê子女,换做领有「新ê身分」ê人。这「新ê身分」就是tī上帝ê灵ê引chhōa之下得tio̍h ê。

第17节,chit节ē-sái讲是kui本罗马书ê中心思想之一。Chia提起一个领有新ê身分之kiáⁿ,mā就是基督徒,就是一个kah耶稣完全连结ê性命。因为án-ne,m̄-nā kah耶稣同受苦难,mā tio̍h分享基督koh活ê喜乐kah福气(参考罗马书六:8)。

重新查询 专卷研经 罗马书系列
错误回报,请联系