Chit段经文使徒保罗koh一pái强调律法并m̄是无好，基本上伊强调律法是好ê，因为有律法，chiah会hō͘人知影罪是甚么，m̄-koh律法并bē-tàng救人tùi罪中脱离。因为人ê问题是：明明知影bē-tàng做ê事，却iáu是去做，伊tī下一段mā讲出亲身ê体验。

Tī chit段经文中使徒保罗讲tio̍h一个基督徒ê「过去」，然续后落来tī第14到25节，伊讲tio̍h基督徒ê「chit-má」。伊用「过去」kah「chit-má」ê差别，形容一个人tī「信」kah「未信」之间ê无仝。背景是kah伊tī大马士革途中遇tio̍h koh活ê耶稣所经历ê改变，伊亲身体验到性命ê转变。

Koh讲，tī chit段经文中，使徒保罗论到有关「律法」ê问题。使徒保罗谈律法ê时，就是teh指「过去」。因为伊讲律法hō͘人知影罪恶koh khah chē，而且罪恶ê代价是死ê（参考罗马书六：23），就án-ne有人提出chit种质疑：既然律法就是chhōa人进入「死亡」，chit种律法岂m̄是kah「罪」仝款，án-ne，律法对人有甚么用？因为án-ne，chit段经文mā是使徒保罗teh解释律法对人ê功用。

第7到8节，tī chia使徒保罗举「贪心」为例来解释。Bē-tàng贪心，这是十诫ê第八诫ê「bē-tàng偷the̍h」（参考出埃及记二十：15、17）。「贪心」，mā是teh指一切bē合法ê欲望（参考罗马书一：24）。Tùi律法顶面来看，这是teh指表面上看会出来ê物质品，是thang摸会tio̍h、the̍h会tio̍h、看得tio̍h等物件。M̄-koh罪却tùi chia渗透进入人ê心内诱惑tio̍h人引起贪欲，会hō͘人想beh用各种方法得tio̍h koh khah chē。因为罪是隐藏tī律法中，当它chhōe-tio̍h thang切入ê破口ê时，就会开始活跃，引诱人想出所有ê办法beh chhōe-tio̍h犯罪ê藉口。

第9到11节，使徒保罗强调律法本来是「beh hō͘人得tio̍h性命」（参考利未记十八：5），结果tú好倒反。这是tùi创世记第三章亚当、夏娃犯罪ê情节隐喻而来。本来上帝设立hit条规律—bē-sái食园中hit丛树ê果子—如果m̄去动它，就会生存，bē死亡。Ē-sái讲是，当chit条规律一设落来，罪chhōe-tio̍h了切入ê机会，诱惑人去想beh「试看māi」是m̄是有kah上帝所讲ê仝款：人会「死」。使徒保罗会认为因为有律法反tńg hō͘罪活跃起来，真可能是teh指tī伊悔改信主chìn前。当时伊并无罪ê感觉，颠倒，伊认为家己就是完全了律法规定，ná亲像伊tī腓立比书第三章6节所讲ê仝款，如果以摩西律法来讲，伊是「无甚么thang指责ê所在」。M̄-koh当伊认bat了耶稣了后，伊了解到原来hiah-ê律法是催促伊去犯罪—迫害耶稣ê信徒—ê主因。这就是伊tī chia所讲ê，发觉家己被律法hō͘骗去。

第12到13节，第12节是回应第7节。使徒保罗无希望有人故意曲解伊ê意思，认为伊反对摩西律法ê重要性。本身是一个犹太人，而且bat是摩西律法ê宗教师，伊m̄-nā m̄是否定律法，却是非常肯定讲「摩西ê律法是神圣ê」。因为摩西律法是出tī上帝，m̄是摩西家己设立ê。Á上帝mā是圣洁ê（参考利未记十一：45、十九：2），因为án-ne，他ê诫命、律法条例mā是圣洁ê。使徒保罗koh khah强调讲，律法是「良善ê」，表示是对性命有帮助，á chit种「良善」to̍h是上帝ê本质。因为án-ne，tī chia使徒保罗非常清楚提出伊ê观点：真正ê问题是出tī律法被罪附身所带来ê结果，并m̄是律法本身，却是罪藉tio̍h律法tī人ê性命中做主。