这是第三封phoe，写hō͘「别迦摩教会ê天使」ê信。

Tī作者ê书信中，对chit七间教会有o-ló、鼓励ê，mā有谴责kah警告，像以弗所教会，有o-ló，m̄-koh mā有谴责kah警告ê话语tī内面，而写hō͘示每拿教会ê书信，则只有o-ló kah鼓励，koh khah特别ê是iáu带有应允beh赐hō͘ hit-ê教会信徒拥有「性命ê华冠」。

	Chit-má chit段经文是讲tio̍h有关别迦摩教会。Ná亲像头前所提起写hō͘以弗所教会ê书信仝款，有o-ló，mā有谴责kah期待。这thang看tio̍h每间教会ê特色，就是有美好ê一面，m̄-koh mā有软弱ê部分，若是beh查验一间教会，mā是án-ne。Beh chhōe-tio̍h像示每拿教会hit种，只有得tio̍h o-ló kahhō͘ 上帝应允会得tio̍h「性命ê华冠」之奖赏ê，恐惊是少kah会惊人。

第12节，「别迦摩」，chit位tī示每拿以北约有九十公里ê所在，是一个真特别ê城市，原因是hit-ê城是建造tī一座约三百公尺ê小高山顶，而且该山乃是一个圆锥形ê小山，看起来就会感觉地处显要，tī当时ê国防上有真好ê要件。它原本并m̄是一个重要城市，m̄-koh tī主前133年，最后一代国王雅伊乐三世（Attalus ṲI）往生前ê遗嘱中，交带beh kā别迦摩并入罗马帝国，而成做罗马帝国tī亚细亚省ê省lóng，并派驻总督治理hit-ê城。因为án-ne，有kóa学者认为新约时代亚细亚ê首都，应该是tī别迦摩，却m̄是用弗所城。别迦摩mā拥有罗马帝国时代第二大ê图书馆，并且以羊皮纸文件出名。Kah以弗所城仝款，hit-ê城mā是庙宇林立，各式各种ê神明庙宇真chē，偶像崇拜之风气甚盛。因为án-ne，掠准讲hit-ê城ê政治地位重要，不如讲hit-ê城tī宗教信仰ê地位赢过政治地位。

Chia提起「有双刃利剑」，chit句话thang参考第一章16节，出现tī作者约翰看见ê异象中，hit位像人子ê，伊ê嘴中吐出来ê是「一把双刃利剑剑ê剑」。作者讲「hit位有双刃利剑ê，án-ne讲」ê时，意思就是审判者亲嘴án-ne讲。

第13节，作者写hō͘每间教会ê封phoe lóng是tùi「我知影」开始。Chit句「我知影」，表示chit位审判者「人子」非常清楚每一间教会ê状况，mā因为án-ne，伊ê审判是正确ê。

「khiā家就是撒旦称王ê所在」，因为别迦摩乃是个流行崇拜罗马皇帝为神ê城市，另外mā有崇拜女神「雅典娜」，并且有罗马人所供奉ê「宙斯」神庙等等，神庙真chē，拜偶像神明ê风气甚盛，m̄-koh别迦摩教会ê信徒tī chit种环境之下，对上帝iáu是「忠诚」。Chit种讲法mā是teh肯定别迦摩教会乃是一间tī信仰上可取、有见证ê教会。

Chia提起「安提帕」被杀害，chit-ê人到底是甚么人？圣经中并无任何资料。不过传说中讲，伊是tī多米田皇帝时代（主后八十一到九十六年），为tio̍h福音ê缘故hō͘人掠去用铜锅活活「烘死」来殉道。因为án-ne，tùi安提帕ê殉道，thang想像会tio̍h当时基督徒所面临ê危机，以及基督教会所面对ê环境，是jōa-ni̍h-á恶质。

第14节，作者传出了别迦摩mā有信仰上ê软弱。作者tī chia提起tī信徒中间有人「随从巴兰ê教示」。有关巴兰ê事件，tī以色列人中间传闻真chē；tī彼得后书第二章15到16节，以及犹大书第11节lóng有特别强调巴兰乃是为tio̍h钱弃sak信仰。民数记第廿二到廿四章则详细记载巴兰原本收了摩押王巴勒o͘-se ê钱，准备ài诅咒以色列人，结果hō͘ 上帝出面阻止。另外在民数记第三十一章16节讲有人听巴兰ê话，tī比珥引诱人民背叛上主，hō͘上主ê子民遭遇瘟疫。Á tī民数记第廿五章1到9节soah讲以色列人tī什亭谷扎营ê时chūn，kah摩押ê cha-bó͘人行淫，并且食拜偶像ê食物。Á chit两件事lóng hō͘人认为kah巴兰有密切关系。

别迦摩城因为当地偶像崇拜之风甚盛，特别是有罗马女神ê崇拜活动，渗杂有淫乱ê活动tī内面。真可能当地ê基督徒mā有类似ê行为，参与了庙会活动，tī庙埕接受亲友接待lim食，了后koh跟tòe kah庙妓进行性行为。

第15节，koh一pái提起「尼哥拉派ê教示」，chit派连以弗所教会mā深受影响。

第16节，chit节回应第12节所讲ê，审判者「人子」嘴中会吐出「双刃利剑」。圣经作者一再明确指出，只有「悔改」chiah ē-tàng改变上帝惩罚ê计划。

第17节，作者呼吁别迦摩教会ê信徒tio̍h注意听「圣神」ê声音。

Chit节提起「隐藏tio̍h ê吗哪」，thang对照第14节提起ê「食祭过偶像ê食物」同齐看。「吗哪」，这是以色列人出埃及后、进入旷野ê时，因为chhōe bē-tio̍h食物，上帝为免in因iau饿来死亡，特别tùi天顶降落来ê一种特殊食物（参考出埃及记十六：13b—21，约书亚记五：10—12），这是上帝tùi天顶降落ê「性命粮食」（参考申命记八：3、16，约翰福音六：31）。

Chit节提起上帝kā「赏赐隐藏tio̍h ê吗哪」，mā tio̍h赏赐hō͘别迦摩教会「一块白石头，顶面写tio̍h新名」。「白石头」tī古代是hō͘人看做siōng贵重ê宝石之一，甚至被看做thang当「护身符」ê路用。Chia讲tī「白石头」顶面刻有「新ê名」，意思是上帝kā赐hō͘ chiah-ê忠心到最后ê信徒一个全新ê名，表示有新性命ê意思（参考以赛亚书六十二：2、4、六十五：15b），这mā是kah上帝有合宜ê关系。