Chit段经文是用先知以西结书第廿七章ê资料，该处经文是先知teh为泰尔城ê灭亡哀哭之哀悼文，作者约翰引用chit-ê资料来预言罗马帝国灭亡ê景况。作者用此来讲述上帝审判巴比伦帝国ê情景，并且是用君王（第9到10节）、商人（第11到17节a句）、水手（第17节b句到19节）等三种无仝人物为巴比伦帝国灭亡所唱哀悼ê诗歌，表示各阶层ê人lóng看tio̍h巴比伦帝国被毁灭ê惨状。其实，in并m̄是为该国ê沦亡感觉伤心，却是因为会失去本来ê利益。因为in只有ē-tàng khiā tī远处观看，而且一面观看、一面吐气。

    Koh讲，chit段经文比较特别ê所在，是先知文献有说明hiah-ê hō͘ 上帝忿怒而遇tio̍h毁灭者ê原因。M̄-koh tī启示录ê作者约翰，并无说明为甚么上帝beh毁灭巴比伦帝国。原因是大家lóng已经清楚知影当时罗马帝国统治者是怎样teh对待基督徒，就ná亲像早年埃及、亚述、巴比伦等帝国怎样对待上帝ê子民仝款。

    第9到10节，chit两节是为君王哀悼ê内容。Chiah-ê君王mā teh代表tī罗马帝国兴盛时代，kah之联盟，á是被统辖而成做附庸国家ê君王。In目睹「火烧tio̍h」ê帝国所冒出来ê「烟」mā只有ē-tàng khiā tī远处观望，kah第10节所讲ê「远远khiā-teh」是仝款ê意思，m̄-koh却只有ē-tàng「为伊哀哭」。

    「惨ah！惨ah！」chit-ê用词ê意思是teh指「祸哉！祸哉！」（参考以赛亚书五：8、11、18、20）。表示原本就m̄是teh为hit-ê城ê毁灭哀伤，却是面对审判来临ê时，感觉忧心重重之态。

    「iáu未到一点钟」，表示时间非常短促。这thang看出上帝惩罚ê时刻随时来临，真紧、紧迫。换句话讲，荣华富贵只不过是瞬间ê享受而已，而上帝惩罚时刻来临之快，hō͘人连想tio̍h预防á是预测ê机会都无。

    第11节，tùi chit节开始直到第16节，lóng是借用商人所叙述ê内容，来说明巴比伦帝国毁灭ê惨状。

    「koh khah án怎都无人来买in ê货品了」，chit句话mā thang看出当时ê环境kah背景，是罗马城差不多就是kui个欧洲kah中东世界ê中心。Chit句话mā说明过去tī-chia经商贸易ê商人看tio̍h hit-ê城被毁，mā等于in看tio̍h家己过去所有ê产业、thàn钱ê机会，taⁿ lóng消失了，in mā会因为án-ne而艰苦心。

    第12到14节，chit三节提起详细ê贸易商品ê名称。对照以西结书第廿六到廿七章来看，就会发见二者ê内容真接近。Mā tùi chit三节所描述ê商品内容，thang看出当时罗马帝国ê繁荣、兴盛。

    Thang kā chiah-ê商品分做六大类：
    一是金银珠宝类：包括有(1)金、(2)银、(3)宝石、(4)珍珠等。

    二是高级服饰类：包括有(5)麻纱、(6)丝绸、(7)紫色衣料、(8)朱红色衣料等。

    三是高级艺术雕刻饰品：包括有(9)香木、(10)象牙、(11)木器、(12)铜器、(13)铁器、(14)大理石等。

    四是高级香料：(15)肉桂、(16)香料、(17)香、(18)香水、(19)乳香等。

    五是食品：(20)酒、(21)油、(22)面粉、(23)麦á、(24)牛、(25)羊等。

    六是生产力工具：(26)马、(27)马车、(28)奴隶、(29)人口等。

    Tùi以上所列举ê项目中，tio̍h注意第(28)kah第(29)两项是「奴隶」kah「人口」，这表示当时罗马帝国时代，人口贩卖ê情景真兴盛。

    Tī第14节提起「贪爱」，是teh指人心内ê意念，mā ē-sái讲是心内向往ê意思。

    「koh khah án怎都chhōe不tńg来了」，意思是完全消失了ê意思。

    第15节，chiah-ê商贾mā是kah hiah-ê kan-taⁿ会讲谄媚之言ê附庸君王仝款，只有ē-tàng「远远khiā-teh」（参考第10节）观看，这表示两种意义：其一是知影家己无能力抢救，因为灾难实在siuⁿ大，是in从来无见过ê。其二是in已经heⁿh惊kah m̄知如何是好à。

    第16到17节a，「惨ah！惨ah！Chit-ê大城ah！」，thang参考第10节。

    「iáu未到一点钟，这一切财富lóng丧失！」，chit句话mā出现tī chiah-ê富有ê商人嘴中，因为连「一点钟」都未到，结果hō͘ chiah-ê seng-lí人、好额人就算是想beh抢救财物，却因为时间siuⁿ短促soah会失去一切财富。