启示录 1章1节 到 1章20节   背景资料  下一笔
无论启示录记载内容过去án怎受tio̍h真chē圣经学者ê争议,ná亲像chit章第3节所讲ê「读chit本册ê人jōa-ni̍h-á有福ah」仝款,详细阅读就会发见上帝ê信息透过真chē「异象」来显示出来。

	Chit章讲tio̍h上帝透过作者约翰写hō͘「亚细亚ê七个教会」ê信,chit七间教会就是「以弗所、示每拿、别迦摩、推雅推喇、撒狄、非拉铁非、老底嘉等教会。然后接落去就是有一位看起来ná亲像「人子」ê出现tī伊身边,开始kā chit七间教会ê状况kah会tú-tio̍h ê审判讲述出来。

    第1节,作者一开始就讲chit本册是「记载耶稣基督ê「启示」。所谓「启示」,希腊文是teh指「phah开来看」,就是kā隐密ê事掀开来,无koh有隐藏。M̄-koh这并m̄是由人来「掀开」,却是由上帝家己来掀开。Chit种讲法真清楚说明,启示录chit本经册中所讲述、记载ê事,lóng是tùi上帝来ê「启示」。Chia讲是「基督差遣天使向伊ê奴仆约翰显示」所beh传达ê信息。作者ài用「天使」,这是启示文学喜爱采用ê素材之一,单单tī启示录中就用了chē kah六十五次。 
第2节,讲本经册ê作者是名叫「约翰」。Tī kui本启示录总共记载六pái,lóng说明约翰就是此本经册ê作者(参考一:1、2、4、9、廿二:8、18)。有bē少圣经学者认为作者约翰chit-ê人,真可能就是耶稣基督ê门徒。M̄-koh是m̄是就是伊?iáu teh讨论中。因为约翰chit-ê名tī犹太人ê社会真平常,咱ē-tàng确定ê一件事,就是作者乃是一个犹太人,对旧约经典非常熟悉。Chit位约翰是beh为「上帝ê信息kah耶稣基督所启示ê真理做见证」,chit点mā是本经册ê重点。

第3节,作者讲「读chit本册ê人是jōa-ni̍h-á有福ah」,这是第一pái提起「有福」。Tī启示录中,共计有七pái提起「有福」(另外六pái请参考十四:13、十六:15、十九:9、二十:6、廿二:7、廿二:14)。Chit-ê「有福」一词kah马太福音第五章3到10节所提起ê「八福」所用ê「福」字仝款,意思是teh指kah上帝有合宜ê关系,这mā是使徒保罗tī罗马书ê中心信息(参考罗马书一:17)。

「听见chit-ê预言并遵守册中所记载ê人」,必定成做「有福」ê人,而chia ê「预言」,指ê m̄-nā是未来ê事,mā包括tùi圣经中所得tio̍h ê「劝勉」kah「安慰」ê信息,chiah-ê信息就是kui本圣经ê话语。

「日子快到à」chit种呼吁lóng kah「末日」来临、审判ê日子teh要到等chit种观念亲密地连结做伙,是分bē开ê。M̄-koh「末日」并无一定就是teh指世界ê路尾讲ê,有时是teh指审判ê来临,人遇tio̍h无法度忍受ê苦难来讲。

第4到5节,koh一pái hō͘咱看tio̍h新约时代写书信ê模式,就是tùi自我绍介开始,了后就是请安。Chit两节有请安mā有祝福。Chia讲chit本书信是写hō͘亚细亚省ê「七个教会」。有圣经学者认为chia ê「七」,并无一定是teh指chit「七」间教会,却是用「七」来表明所有教会lóng需要听从chit本经册所传达ê信息。因为Tī圣经中,「七」所表示ê意义包括有神圣、祝福、完全、圆满、够额等等ê意思。

Chia提起「昔tī-teh、今tī-teh、将来永tī-teh ê上帝」,chit句话kah出埃及记第三章14节ê「我是创始成终ê主宰」是仝款ê意思。表明上帝是万物ê创造者,一切性命ê来源lóng是上帝创造ê。

「七个灵」,指ê乃是上帝全备ê「灵」。Tī以赛亚书第十一章2节提起上帝ê灵包括有:一是智慧、二是聪明、三是谋略、四是能力、五是知识、六是敬畏等。有一本Tī圣经版本上非常有权威ê《七十人译本》则tī chia koh加上了一个「敬虔ê灵」,án-ne共有「七个灵」。Tī chia,作者讲耶稣基督就是chit「七个灵」ê见证者。Tùi他ê「死里koh活」开始,beh hō͘所有接受上帝信息ê人lóng仝款lóng享受耶稣基督koh活ê恩典。

Chia提起耶稣基督疼咱,他为咱「牺牲流血,tùi罪中kā咱释放出来」,chit种信仰认知mā是基督教信仰ê基础。

第6节,chit节真可能采用出埃及记第十九章5到6节ê观点,认为只要是遵行上帝旨意者,lóng会成做上帝「神圣ê国民」,是事奉上帝ê「祭司」。

第7节,thang参考但以理书第七章13到14节,讲述hit位teh beh来临ê拯救者,会驾云来到世间。启示录作者用chit种方式teh说明当末日来临ê时,上帝就是审判者,他ê威严是人无法度ê抵挡ê。Koh讲,chit节mā回应撒迦利亚书第十二章10节所提起ê,当众人teh为「hō͘ in凿死ê hit位」哀哭ê时,taⁿ却相对看tio̍h当chit位拯救者驾云来到世间,mā tio̍h为伊荣耀ê来临哀哭,因为过去所做ê事,接受严厉ê审判而哀哭。Chit节mā teh暗示基督徒tī受tio̍h迫害ê时,将来会得tio̍h极高度ê荣耀,而相对ê,迫害基督徒ê,会开始哀哭、咬牙切齿à。

第8节,chit节ê句话mā同时出现tī第廿一章6节、第廿二章13节。
「阿尔法」kah「亚米茄」了后,加上说明「开始」kah「终结」chit-ê说明词ê,mā出现tī第一章17节、第二章8节。对照第廿二章13节来看,作者有特别说明chit位「开始」kah「终结」者就是耶稣基督。Á tī第廿一章6节则讲chit位「开始」kah「终结」拥有「性命ê泉水」,thang白白赐hō͘口渴ê人lim。

「全能ê上帝」,chit句话说明基督教信仰ê上帝有三大特性ê其中一种。另外两大特性就是「全在ê上帝」kah「全知ê上帝」。

第9节,作者「约翰」讲伊是bat为tio̍h传福音而「被囚禁tī名叫拔摩ê海岛上」。Chit-ê「拔摩岛」是设tī爱琴海中ê一个多石小岛,kui个岛面积大约是六公里宽、十三公里长,靠近现今ê土耳其海岸。

作者强调伊kah同信ê兄弟姊妹(指chit七个教会)同齐「分担患难、同齐忍耐」,表示伊并无tī非常困难、恶质ê环境下离开in,却是tī耶稣基督内面kah in同在同齐。因为有chit种条件,伊chiah ē-tàng讲同时mā tio̍h kah chit七间教会「分享」tī耶稣里ê「主权」。Chit-ê「主权」,意思是teh指耶稣基督koh活了后,审判时刻ê来到,所有信靠耶稣基督到终末都无改变ê人,lóng会分享chit份被拯救ê荣耀(参考帖撒罗尼迦前书四:16—18)。

第10节,「有一个主日」,chit句话至少说明当时ê基督徒已经tùi犹太人ê「安息日」聚会,转成耶稣基督koh活ê日子—「主日」作为聚会ê时间,无koh是用犹太人ê安息日聚会à。

Chit节提起作者被「圣神支配」,仝款ê词句mā出现tī第四章2节、第十七章3节、第廿一章10节。作者约翰讲伊tī圣神ê支配之下,「听见了一个大tân声,kah-ná吹号ê响声」,而且声音来自「背后」,意思是teh指chit-ê异象,是tī看bē-tio̍h、预防bē-tio̍h ê状况下出现ê。
第11节,chit声音说明作者写chit本经册ê主要目的,就是beh kā所看见ê异象、听见ê话,kā「以弗所、示每拿、别迦摩、推雅推喇、撒狄、非拉铁非、老底嘉七个教会」讲。

第12节,作者讲伊「转身」就「看见七个金灯台」。Tī第20节作者有说明「七个金灯台」指ê是用弗所等七间教会ê意思。

第13到16节,作者Tī chit段经文描述伊看见「有一位像人子」ê人出现。「人子」,chit-ê用词kah但以理书第七章13节ê「人子」有关,是teh指tùi上帝来ê拯救者(参考使徒行传七:56)。

Chit位「像人子」ê是「穿插长袍,胸前系tio̍h金带」,chit种穿着有如摩西律法中所规定ê祭司大礼服(参考出埃及记三十九:2—3、29)。

伊ê「头毛洁白像雪」,这是用但以理书第七章9节ê背景,描述拯救者耶稣基督ê样式。Chit种用ná亲像雪hit种洁白,表明ê另外一个意义,就是发光到目睭无法度正视仝款(参考马太福音廿八:3,马可福音九:3)。

「目睭像火焰」,脚像擦亮ê铜一般明亮,这是采用但以理书第十章5到6节ê资料。这mā teh说明chit位伟大ê审判者ê目睭,thang看透人心内ê意念。

「七颗星」一词thang参考第20节,teh代表「七个教会ê天使」。
「嘴中吐出一把双刃利剑剑ê剑」;剑,是用来攻击、审判、刑罚ê(参考二:16、十九:15、21,以赛亚书四十九:1—2)。

「面像透中昼ê阳光」,表明正义、公平,真清楚,无隐遮。

以上chiah-ê lóng teh表示一种非常崇高ê威仪,hō͘人看了会不寒而栗。

第17到18节,因为有顶面所讲ê「形像」出现,致使作者看tio̍h了后,马上仆倒tī土脚,吓得ná亲像死人一般,连动mā m̄敢动。「mài惊」,chit句话一再出现tī耶稣基督传福音ê过程中(参考马可福音五:36、六:50、路加福音五:10、十二:32),lóng是耶稣基督teh安慰、鼓励他ê门徒,以及对性命失去希望ê人(会堂ê主管叶鲁)所讲ê话。

Chit两节mā同时提出耶稣基督teh绍介家己,有三个特点:
一是「我是开始,mā是终结」。二是「永存者—bat死过,chit-má活teh,会永远活teh」,chit句话表示出耶稣基督已经赢过死亡。三是「掌掠tiâu死亡kah阴间ê锁匙」,thang参考马太福音第十六章18节。这说明信靠耶稣基督ê人thang赢过死亡ê威胁。

综合顶面所讲三点,作者约翰想beh kā chiah-ê因为坚守对耶稣基督ê信心ê信徒讲,虽然有ê亲人、朋友已经死去,m̄-koh耶稣基督就是掌握「死亡kah阴间ê锁匙」ê主宰,伊有权thang kā hiah-ê迫害信徒ê人关入阴间,mā thang hō͘ hiah-ê因被迫害来死去ê人,tùi阴间koh活起来,kah耶稣基督同齐享受永恒ê性命,因为耶稣基督已经tùi死里koh活起来,而且永远活teh。使徒保罗讲基督徒就是kah耶稣基督同死,mā同koh活(参考罗马书六:5、8)。
第19节,传达声音者kā作者约翰讲一定tio̍h kā「所看见ê,无论是chit-má iáu是将来beh发生ê事,lóng写落来」。Chiah-ê所看见ê事,就是teh指chit-ê异象,这是关系耶稣基督审判kah拯救一切ê权柄。

第20节,「奥秘」,并m̄是「秘密」,却是指过去bē明白,chit-má「晓悟」、「明白」,chiah发觉tāi-chì真奇妙。Chia ê「七个教会ê天使」到底是甚么人?是teh指人,á是teh指天使?真oh分清楚。因为「天使」mā thang讲是教会ê代表。

重新查询 专卷研经 启示录系列
错误回报,请联系