诗篇 97章1节 到 97章12节   背景资料  上一笔  下一笔
这mā是kah第九十六篇仝款,lóng是teh歌颂上帝ê荣耀,因为他是王,是统治者。

第1到5节,因为chit位创造ê主宰做王,所有被造之地lóng当欢呼歌颂,m̄-nā是大地,mā包括岛屿。Chit位创造ê主宰,统治ê方式ná亲像第九十六篇所提起ê,公义是他统治ê根基。

Tùi第3到4节来看,真紧to̍h会想tio̍h以色列人出埃及ê经历(参考出埃及记第十三、十九章)。

Chia ê「火」kah「sìh-nà」tú好回应了第2节所提起ê「密云幽暗」,lóng会因为án-ne被照亮显现出来。Sìⁿ-nà附带来ê便是雷轰,听tio̍h雷轰ê声音,就算是大山mā会惊惶phi̍h-phi̍h-chhoah,甚至会亲像蜡一般熔化掉,意思是teh指就算ná亲像群山一般ê坚固、稳定,只要听tio̍h上帝ê声音mā仝款(参考弥迦书一:4),因为上帝是创造宇宙万物ê主宰。

第6节,「诸天」,mā表示所有ê天使。另外一方面,tī以色列人民ê宇宙观中,认为天至少有三层(参考哥林多后书十二:2)。诗人用chit种词汇,主要teh表示宇宙浩瀚之大,lóng是上帝所创造、管理。M̄-koh所有上帝所创造ê万物,lóng tio̍h齐声宣扬,上帝是公义ê,tī他治理之下lóng thang看见上帝ê「荣耀」。

第7到9节,第7节kah第9节真清楚表明,拜虚假ê偶像神明kan-taⁿ会hō͘人带来侮辱,因为无任何神明ē-tàng khiā立tī创造万物ê上帝面前。

第8节ê「锡安」、「犹大」,lóng是teh表明有上帝同在ê所在。

第10到12节,chit段诗歌有含劝勉ê韵味。Kā所有上帝喜爱ê子民讲,ài in lóng清楚知影上帝喜疼in,m̄-koh讨厌邪恶者,会拯救他ê子民脱离邪恶者。因为án-ne,上帝ê子民应该mā tio̍h学习「憎恨邪恶ê人」,án-ne,邪恶ê人就无法度嚣张,mā会知影见笑。

第11节ê「光照耀」,mā表示上帝ê赐福、拯救,而ē-tàng领受chit种恩典ê人,是「心地正直ê人」。Chit种人会知影怎样歌颂上帝、o-ló上帝ê圣名。

重新查询 专卷研经 诗篇系列
错误回报,请联系