诗篇 94章1节 到 94章23节   背景资料  上一笔  下一笔
这是一首真特别ê诗歌,内容充满哀歌ê韵味。Chit首诗篇m̄-nā有团体吟唱ê部分(第1到7节),mā有一个人ê哀歌(第16到23节),有智慧词句ê诗歌(第8到11节),mā有训诲ê诗歌(第12到15节)。

第1到7节,上帝是宇宙万物ê创造者,因为án-ne,他mā是一切受造物ê裁决者,诗人祈求上帝对hiah-ê「邪恶ê人」、「作恶ê人」、「杀害寡妇孤儿」、「寄居ê生份人」等hō͘ in严厉ê审判,因为chiah-ê人ê作恶,hō͘受tio̍h迫害ê人心生懔neh,m̄知该怎样生存落去。因为chiah-ê人siōng 可恶ê所在,就是作恶残害别人iáu「洋洋得意」,而且「夸耀」家己ê「罪行」,真是恬m̄知耻到极点。In会án-ne做,就是认为上帝看bē-tio̍h,就算看见mā bē关心chit种人间ê世事。这表示in伤害别人,并m̄是无注意,却是故意残害无辜ê性命,这是非常可恶ê心态,mā是藐视上帝ê一种方式。

第8到11节,chit段hông称做是「智慧ê诗歌」。Tú好回应了第1到7节所提起邪恶ê人ê恶质行踏。Thang用句流行台湾ê俗语:「用脚头u想就知影。」指出上帝既然创造ê人类有「耳á」、「目睭」,就是beh hō͘人听见他ê声音,mā看清楚上帝ê道路。若是上帝造人有耳á、目睭,kám讲上帝家己无目睭kah耳ámah?因为án-ne,上帝m̄-nā会听,mā会看,而且会鉴察人心内ê意念,真清楚知影邪恶ê人所想ê一切。

第12到15节,chit段诗歌有真chiok厚ê训诲、劝勉ê意思。第12节一开始就提起有上帝ê律法教导,是件真有福气ê事,ná亲像第十九篇7到11节ê诗人所讲ê,会hō͘人ê性命更新,得tio̍h智慧仝款。有上帝ê律法,就会明白tī他公正ê审判中,他会kah他ê子民同在,永远bē弃sak,即使tī患难中,mā会保守他ê子民享受「平安」。因为án-ne,只要是「正直ê人」lóng会知影维护「正义」,就是tī回应上帝ê疼。

第16到23节,chit段诗歌是属tī个人ê哀歌,m̄-koh诗歌却是充满tio̍h坚定ê信心。诗人表示,若m̄是有上帝帮助,早就性命不保。上帝看顾被欺压者ê性命,并且安慰心中操心ê人。上帝绝对不会kah chiah-ê邪恶ê人有任何来往,因为in所做ê事,lóng是上帝所讨厌ê。M̄-nā án-ne,他一定会消灭in。

第20节描述作恶ê人常使用ê手段,就是会「以律法掩护不义」,这mā是不时听见ê一句「钻律法漏洞」,á是故意编制不义ê律法,所讲ê「恶法mā是法」,用chit种方式hō͘ in所行邪恶、残害伊人生命ê事,有律法根据,成做合法。Chit种情形tī戒严时代、独裁者ê身上lóng看会tio̍h。

重新查询 专卷研经 诗篇系列
错误回报,请联系