诗篇 89章1节 到 89章52节   背景资料  上一笔  下一笔
Chit首诗篇kah第六十三篇仝款,lóng是为君王祈求祝福ê诗歌。Chit首诗歌有一个特色,就是用上帝kah大卫王之间ê「约」做基础而写做ê诗歌。因为án-ne,mā teh表明诗人心内ê期待:有án-ne ê一工,上帝会koh再像以前一般,疼以色列人民,ná亲像他以前疼大卫王仝款。Chit篇诗歌mā是第三集诗篇ê结束。

	第1到4节,chit首诗歌ná亲像第八十八篇10到12节所提起ê,诗人期待上帝ê「慈爱」、「信实」,这两项chiah是生存kah性命力ê来源。Á这两项mā是Chit篇诗歌siōng中心ê主旨。上帝ê「信实」,所表示ê是上帝对所立之约坚守tio̍h,永bē改变。Ná亲像伊ê慈爱仝款,是永bē改变ê。

	chia提起上帝kah大卫立约,chit-ê约是beh hō͘伊ê后代kiáⁿ孙lóng ē-tàng传承王位,chit点mā是上帝透过先知拿单对大卫所讲ê(参考撒母耳记下七:16)。

	第5到18节,这是一段歌颂ê诗歌,诗人teh o-ló上帝有真chē奇妙ê作为,chit种o-ló上帝ê声音,连天kah地lóng会仝款用顺服ê态度,表示in对上帝ê尊崇、颂赞。因为天kah地lóng是上帝所创造ê。Chit种伟大ê气力,m̄是任何神明thang比并,像迦南人所崇奉ê「海怪拉哈伯」tī上帝打击下,lóng kā无所遁形。

	诗人Tī chit段诗歌中特别强调,上帝治理ê国度,就是用「正义公道」做基础,统治ê君王所做出来ê事,lóng会显明上帝ê「信实慈爱」。Tī chit种国度之下ê子民,lóng是有福气ê人,因为án-ne,唱出欢乐ê歌声颂赞上帝,四界thang听tio̍h。

第19到37节,chit段诗歌是kā第3到4节所讲ê,koh-khah详细叙述。

Tùi第19节开始,一直到第27节,chit段诗歌主要teh说明上帝tī万民中拣选大卫,并膏立伊为以色列人民ê君王。上帝答应kah伊同在,并且赐hō͘伊力量。Siōng特别ê所在,是上帝赐hō͘大卫ê气力khah赢过扫罗,hō͘大卫治理之下ê以色列国土疆域,tùi地中海直到幼发拉底河之宽阔。

第26到27节chit两节,thang看出上帝kah大卫之间确实有特殊ê「父子」关系。

Koh讲,是tùi第28到37节chit段诗歌,描述上帝疼大卫,chit种特殊ê慈爱,一直延续到伊后代ê kiáⁿ孙身上。上帝beh用「无变ê疼」kah大卫立chit-ê约,就是beh hō͘「伊ê kiáⁿ孙中有人kā永掌王权」。

值得注意ê是tī第30到32节,chit段诗歌中虽然提起讲若以色列人民违背上帝ê律法诫命,上帝会因为in ê罪惩罚in,m̄-koh并无讲beh改变chit-ê约,却是惩罚,m̄-koh iáu是会hō͘大卫家族ê kiáⁿ孙继续掌权,上帝bē收tńg来伊对大卫ê应允。这ē-sái讲是上帝hō͘大卫非常特别ê恩典。

第38到45节,chit段明显ē-tàng看出kah前一段大无相仝。Mā tùi chit段诗歌中看tio̍h以色列人民显然已经陷入了痛苦ê境遇。原因是in知影家己违背上帝ê话,弃sak了kah上帝所立ê约。作者心中有种矛盾ê疑问:上帝既然拣选大卫王朝来管理他ê子民,Án-ne,为甚么会koh hō͘他ê子民受难?

Tī第39节提起「王冠丢tī土脚」,chit句话真清楚讲出国王已经hông掠去做奴隶。Tùi第40节看tio̍h这是teh指耶路撒冷城已经毁了,因为án-ne,这应该是tī巴比伦帝国攻陷耶路撒冷城了后,以色列人民惨败kah惨痛ê境遇,in受尽所有ê耻辱。

第46到51节,诗人tùi悲伤中转为恳切祈求上帝停止他ê忿怒,祈求上帝kā以前hō͘ in大卫ê慈爱、信实ē-tàng koh一pái出现tīin ê身上,不beh hō͘ in继续受tio̍h别人ê凌辱。

第52节,chit节是诗篇第三集ê结束,kah第四十一篇13节第一集,以及第七十二篇19节第二集等之结语仝款,lóng是歌颂上帝作结尾。

重新查询 专卷研经 诗篇系列
错误回报,请联系