诗篇 78章38节 到 78章72节   背景资料  上一笔  下一笔
4.第七十八篇38—72节:
第38到39节,chit两节mā是kui本圣经所beh表达ê一个重要信息:上帝有永远无变ê疼。他一再容忍、不快受气,知影人只不过是用土粉所造、脆弱ê人(参考出埃及记十五:13,民数记十四:19,诗篇一○三:8—14、一四五:8,弥迦书七:18)。

第40到42节,chit三节是为续落来ê第43到51节作前言。表示以色列人民真少知影tio̍h感谢上帝,lóng是一再埋怨上帝,认为上帝并无照in所需要ê hit种,样样lóng替in准备好势、满足in。

Tùi第43节开始,一直到51节,就是tī简略地讲述出埃及记第七到十二章,以色列人民ê祖先出埃及chìn前,上帝用十项大灾难严厉惩罚埃及国王kah人民,最后kā以色列人民带领出来。

第51节「含帐棚中强壮ê头胎」,埃及人一直被看做是挪亚kiáⁿ孙(参考创世记十:6),chit节ê意思就是teh指出埃及ê时chūn,埃及人ê大kiáⁿ lóng因为上帝ê受气往生。

第52到53节是离开埃及了后,经过红海,进入旷野漂流ê生活。
第54到55节chit两节讲tio̍h上帝带领in进入迦南地,并且hō͘ in thang tòa tī耶路撒冷(这已经是到à大卫时代)。第55节是约书亚ê时代。

第56到64节,「试探并背叛了至koân ê上帝」,chit点早tī以色列人民ê祖先离开埃及进入旷野了后,就一再出现,甚至重塑金牛崇拜,认为he chiah是in ê神(参考出埃及记三十二:1—24),引起上帝极大ê忿怒。Chit段经文主要是用早期所罗门王chìn前ê以色列国之现象来叙述。

当以色列人民进入迦南地,过富庶ê物质生活后,竟然弃sak赐福in ê上帝jú来jú远,mā jú来jú离谱。铸造偶像崇拜,而且是tùi君王带头,全国人民跟tòe做,tùi所罗门王晚期开始,直到分裂后ê南北两国lóng仝款。
第60节ê「示罗」,这是tī大卫王朝以前以色列人民敬拜上帝ê宗教中心,因为hit时约柜lóng是khǹg tī示罗。

第62到64节thang清楚看出北国以色列tī亚述kah巴比伦帝国入侵后所带来悲惨ê景象。

第65到72节,chit段诗歌说明上帝决定放弃北国以色列,看顾南国犹大。第67节用「约瑟ê kiáⁿ孙」kah「以法莲支族」来表示北国以色列。然后tī第68节用「犹大」来表明南国。「锡安山」指ê就是耶路撒冷,最后诗人用「大卫」来表示,上帝所kah意ê是亲像大卫chit种领导者,m̄-nā忠实tī上帝,mā知影怎样带领人民归顺上帝ê旨意。

综观这整篇诗歌,lóng teh强调一点:人ê软弱,若是无上帝ê怜悯看顾,人真紧to̍h会弃sak上帝ê旨意、道路,偏行己路,致使上帝忿怒,就消灭。
重新查询 专卷研经 诗篇系列
错误回报,请联系