诗篇 78章1节 到 78章37节   背景资料  上一笔  下一笔
这是一首典型ê「史诗」。诗人kā中心点khǹg tī出埃及ê kui个历史经验,特别tī旷野背叛上帝ê方面,写了真chē。Tùi chit篇史诗thang看tio̍h诗人ê用心,是beh伊ê同胞m̄-thang koh再重蹈覆辙,免得犯以前祖先bē记得上帝ê教示而带来灾难。应该tùi历史ê经历中醒悟过来,记tiâu上帝拯救ê大恩,若无,会因为背叛上帝带来koh khah大ê灾难。

第1到8节,chit段诗歌ê踏话头就真清楚,表示beh「phah开历史ê奥秘」,为tio̍h是beh希望hō͘后代kiáⁿ孙ē-tàng明白tī in ê历史中所发生ê事,chiah-ê历史lóng是诗人「所听见所知影」,而且祖先bat讲过非常重要ê一件事,就是诗人提起祖先会违背上帝ê命令、旨意,是因为kā上帝ê诫命hō͘ bē记得。诗人强调无想beh向众kiáⁿ孙隐瞒chit件事,是为tio̍h beh做为大家ê警戒,免得重蹈祖先失败ê覆辙。诗人mā希望透过chit篇诗歌,hō͘ 众kiáⁿ孙知影,上主有「权能kah一切奇妙ê作为」。

第9到20节,tī第12节ê「琐安ê田野」,这是teh指出埃及ê时代ê埃及首府,设tī尼罗河三角洲东北部ê所在。Chit段诗歌真重要ê所在,teh提醒人民历史上发生过ê事件,就是北国以色列siōng大支派ê以法莲,in因为对上帝ê信心不足,tú-tio̍h敌人攻击就懔neh、惊惶,逃走。In ê祖先bat历过上帝怎样chhōa in离开埃及,而且行过红海,如何在旷野中守护看顾in,m̄-nā日夜lóng teh陪伴 in,连tī炕旱ê旷野地,m̄-nā hō͘ in ē-tàng有泉水止渴,mā hō͘ in thang拾吗哪。M̄-koh in iáu是怀疑除了吗哪之外,上帝iáu ē-tàng hō͘ in甚么食物,chit件事真清楚记载tī民数记第十一章,in怀疑上帝是m̄是ē-tàng hō͘ in「预备肉食」,结果上帝hō͘ in ê大大超过in所需要ê,m̄-koh mā因为in贪婪,而引发瘟疫猖獗,死亡惨重。

第21到31节,chit段经文就是teh描述民数记第十一章ê背景。Tī旷野漂流期间,in一再埋怨上帝hō͘ in tú-tio̍h无水嘴干ê痛苦,mā hō͘ in tú-tio̍h无粮食ê iau饿困境。M̄-koh上帝tùi石磐出泉水hō͘ in止渴,然后tùi天顶降落吗哪hō͘ in bē致使iau饿。In从来无看过chit种tùi天顶降落ê吗哪,因为án-ne kā它称做「天顶ê粮食」(第24节)。Chit种粮食mā就是第25节所讲ê「天使ê食物」,就是teh指吗哪。以色列人民相信吗哪就是天顶ê天使teh食用ê。

Chit段诗歌除了讲述tùi天顶降落来ê吗哪外,mā特别提起in向上帝埋怨无肉thang食ê事,就án-ne上帝差遣鹌鹑飞来in营区,hō͘ in lóng ē-tàng食饱,而且iáu食不完。M̄-koh偏偏有人就是贪食不厌,结果引发了恐怖ê瘟疫,第31节讲chit pái ê惨剧,致使死去真chē「壮士」,lóng是「以色列siōng优秀ê青年」,确实是件真悲惨ê事。

第32到37节,chit段诗歌看起来真亲像福音书记载当时犹太人领袖,一再看见神迹,却iáu是m̄相信耶稣就是上帝差遣到世间来ê救主仝款。以色列人民tī旷野确实是一再经历到上帝所行ê神迹奇事,m̄-koh in是一再经历到,却瞬间koh bē记得上帝奇妙ê作为,继续犯罪,因为án-ne,上帝出手惩罚in ê时,in就Tī痛苦中表示悔改、忏悔。M̄-koh转眼间就koh bē记得。这真亲像先知以赛亚传出上帝ê话所讲ê,以色列人民是「用唇舌尊敬」上帝,m̄-koh「in ê心却远离」上帝(参考以赛亚书廿九:13),并m̄是真心实意在敬拜上帝、听从上帝ê旨意,对kah上帝所立ê约,一再毁约,这是上帝siōng-kài艰苦心ê事。

重新查询 专卷研经 诗篇系列
错误回报,请联系