诗篇 69章1节 到 69章36节   背景资料  上一笔  下一笔
这是一首哀歌,祈求上主拯救脱离仇敌危害ê诗歌。有kóa诗篇学者认为chit首诗篇kah第廿二篇是「姊妹诗歌」。Tùi第35节ê诗歌就thang看出chit首诗歌ê背景,是犹大亡国了后出现ê。除了诗篇第廿二篇外,Chit篇ē-sái讲是tī新约圣经中引述siōng chē ê一篇,计有:

约翰福音第十五章25节(引用第4节)。

约翰福音第二章17节(引用第9节a)。

罗马书第十五章3节(引用第9节b)。

约翰福音第十九章28到29节(引用第 21节b)。

罗马书第十一章9到10节(引用第22到23节)。

使徒行传第一章20节(引用第25节)。

第1到4节,chit段诗歌thang看出诗人面临ê是性命随时有危险。诗人用「大水」淹到颔颈、「陷tī泥坑中」、「落tī深水中」、「筋疲力竭」、「目睭花」、敌人比头毛koh-khah chē、想除灭我ê人jōa-ni̍h-á强大等等等chiah-ê用词,lóng thang看出诗人确实已经到à siōng危险、差不多无法度喘气ê危急情况下。

第5到8节,chit段诗歌是诗人teh表达心内ê心境,伊自认tī上帝面前都无隐瞒,是坦诚ê。伊向上帝说明家己所遇tio̍h ê情况,m̄-nā hō͘人辱骂,mā hō͘家己ê亲友隔离出来。Chit种状况kah耶稣所提起ê,为tio̍h伊kah福音ê缘故,可能会tú-tio̍h ê遭遇仝款。

第9到12节,Tī chit段诗歌中,thang看tio̍h chit位受tio̍h委屈ê诗人,真清楚teh表示宁可接受所有ê凌辱,因为伊深深知影,上帝是公义ê审判者,只有上帝siōng清楚发生ê事。第9节提起圣殿,因为án-ne,真可能是发生tī主前586年,圣殿被巴比伦军队放火烧毁ê时,诗人真可能是一位利未人,就算想beh护卫圣殿,mā bē-tàng做甚么,相对ê,换来ê lóng是嘲(sau)笑、侮辱,而伊只有ē-tàng用禁食表示哀伤,穿麻衣表示心内ê哀恸。

第13到21节,chit位诗人真有信心,即使是tī chiah-ni̍h危险ê状况下,伊iáu是坚信上帝一定会伸手救助伊。因为án-ne,伊祈求上帝不beh hō͘伊被头前第1到3节所提起ê恶质环境所phah倒。伊祈求上帝用他永恒ê疼kah应允,救伊脱离chiah-ê危害伊性命ê气力。

伊深信,上帝知影伊ê遭遇,伊真孤独,无人同情伊,mā无人想beh帮助伊,甚至tī伊饿了ê时chūn,竟然the̍h毒药hō͘伊;tī伊siōng干渴ê时chūn,the̍h酸醋hō͘伊lim,这等于是雪上加霜仝款ê残酷。Chiah-ê仇敌tī伊身上所做ê事,伊深信上帝lóng看kah非常清楚。

第22到29节,chit段诗歌就是诗人祈求ê诗歌。当诗人teh祈求上帝ê救助同时,mā是teh祈求上帝用chiah-ê恶质手段对待伊ê仇敌,用in仝款ê手路对待in。

第22到23节被使徒保罗引用tī罗马书第十一章9到10节中,并且kā它说明是「大卫ê诗歌」。M̄-koh是m̄是出tī大卫王ê诗歌,有kóa圣经学者表示无仝ê意见,有ê学者认为kah先知耶利米ê诗歌比较khah接近。

第26节讲出诗人ê痛苦是因为tùi上帝来ê惩罚。作者家己认为是一个有罪ê人,因为罪,hō͘伊生活tī灾难ê痛苦中。这是因为早期ê人认为tú-tio̍h灾难是kah上帝对罪ê惩罚有密切ê关系。Tī chit首诗中,作者mā表示受tio̍h极大ê冤屈,因为伊无偷the̍h得tio̍h不义之财,却tio̍h承受chit种责任。即使是受tio̍h真chē ê冤屈,作者iáu是表示对上帝有绝对ê信心,相信上帝会拯救伊脱离chit种遭遇侮辱ê处境。

注意第28节,是诗篇第二pái提起关系性命册ê事,第一pái是tī第五十六篇8节。圣经中提起性命册ê事记载tī出埃及记第三十二章32、33节;但以理书第十二章1节;玛拉基书第三章16节;腓立比书第四章3节;启示录第三章5节、第十三章8节、第十七章8节,以及第二十章12节、15节等等。耶稣mā bat提醒他ê门徒,tio̍h因为名记录tī天顶而欢喜,却m̄是因为邪灵ê降服而欢喜(参考路加福音十:20)

第30到36节,这是一段感恩ê诗歌。Tùi第32到33节thang看出诗人头前所提起ê背景,真可能就是以色列人民被掠到巴比伦去做奴隶ê时所唱ê哀歌。Taⁿ in已经得tio̍h释放,因为án-ne,tī第35到36节提起ê诗句,是kah tńg去故乡后重建家园ê事有关系。

重新查询 专卷研经 诗篇系列
错误回报,请联系