诗篇 39章1节 到 39章13节   背景资料  上一笔  下一笔
这是一首被列为「智慧文学」ê诗歌。因为chit首诗篇谈及人ê生kah死,以及上帝对人性命主宰ê问题。诗人teh探讨一个不时hō͘人提出来询问ê问题:为甚么人ê性命是án-ne脆弱。Chit首诗篇mā被列为是一首祈祷医ê诗歌,kah第三十八篇仝款,是tī极大ê病痛中,向上帝发出祈求医ê诗歌,充分表现出作者对性命ê体验真深。所谓「人生如泡影」,chit种观念Tī chit首诗歌中表露无遗。Mā tùi chit首诗歌中ē-tàng体会做者所描述以色列民族tī迦南地「寄居」ê性命观。利未记第廿五章23节讲:「地m̄ -thang 永远卖断,因为地是我ê;lín tī 我ê 面前是出外人,是寄脚ê。(全民版)」新约彼得前书mā án-ne写讲:「Lín在世间是寄居ê,是客旅!」(二:11a)chit首诗常tī教会举行丧礼ê时使用。

第1到3节,短短三节诗歌,就thang看出诗人ê心内teh进行深切ê反省,mā因为án-ne,有诗篇学者kā chit首诗篇看做是一首忏悔ê诗歌。M̄-koh thang理解chit-ê诗人ná亲像古代社会共有ê观念:认为生大病,是因为得罪上帝所带来ê惩罚。诗人一开始表示,虽然是极大重病,mā tio̍h约束家己ê嘴舌bē出怨言。就算有人讲伊犯罪á是讲毁谤伊ê话,伊mā不tńg来击。M̄-koh jú是án-ne忍耐,jú是痛苦。

第4到6节,就án-ne诗人转向上帝询问性命到底有chē长?ná亲像诗篇第九十篇12节所提起ê,祈求上帝教导怎样数算性命ê年日。Chit位诗人mā是án-ne teh问上帝,伊iáu有jōa-chē年日thang活。伊感触到「性命不过像做一困息,人生如泡影」,chit种句话mā出现tī约伯记第七章7节、第十九章20节。另外在诗篇中mā一再出现,亲像第八十九篇47节、第九十篇5到6节、9节、第一四四篇4节等等。

Tī chia,诗人mā表达一个普遍ê现象,就是大家lóng teh想出所有ê办法累积财富,却m̄知性命一结束,而且是chiah-ni̍h-á短暂就结束。Án-ne,则所累积chiah-ê财富koh有甚么用?甚么人享受?这kah路加福音第十二章20节耶稣ê譬喻中所提起ê仝款,当上帝kā人ê性命取tńg去ê时,人所累积起来ê财富lóng会归hō͘甚么人?

第5节ê「短促」,原文是teh指手掌。人ê手掌无论jōa大,lóng是thang量ê范围。性命ná亲像án-ne短促。

第7到11节,chit段诗歌清楚表示kā性命寄望tī创造性命ê主宰—上帝,chiah是正确ê态度。

Tī第7节,诗人讲「只有仰望你」,意思是性命ê ǹg望是tī上帝,人无能力决定家己ê性命时间。

Tùi第8到10节thang看出诗人病情ê严重,伊认为若上帝bē出手救治,伊kā无法度生存落去,因为性命已经到à尾声,奄奄一息ê状态。
第8节ê「愚戆人」,是teh指hiah-ê teh嘲(sau)笑伊ê人,chit种人就是幸灾乐祸ê人。

诗人tī第9节真清楚表示,伊之所以破病折磨受苦,是出tī上帝ê惩罚,因为án-ne,伊m̄敢有任何怨言,免得加重病情。伊只祈求上帝m̄-thang koh再继续责罚伊,mā看出上帝ê责备ná亲像看bē-tio̍h ê蛀虫teh侵蚀性命仝款,不声不响,m̄-koh真紧to̍h结束loh人ê性命(第10到11节)。

第12到13节,伊知影,无论怎样祈求,siōng重要ê认bat,就是性命ná亲像寄居在世间ê「人客」,是「过路旅客」。因为án-ne,伊祈求上帝帮助伊,「宽容伊」,hō͘伊tī往生chìn前享受「一点á安乐」。

所谓「宽容」,原文是讲「对敌」ê意思。是teh指请求上帝m̄-thang kā伊当做仇敌án-ne teh攻击,伊会承受不。因为án-ne,伊祈求上帝kā目睭转向另外一边,m̄-thang直视tio̍h伊。因为上帝若是用忿怒ê眼神看伊,伊所有ê罪状lóng会显露出来,这kah诗篇第九十篇8节诗人所讲ê仝款。「宽容」iáu有另外一个意思,是请求上帝m̄-thang koh再责罚。


重新查询 专卷研经 诗篇系列
错误回报,请联系