诗篇 107章1节 到 107章43节   背景资料  上一笔  下一笔
Chit首诗篇thang分做三个部分一是第1到3节;二是第4到32节,这部分是由四种遇tio̍h无仝苦难ê诗人向上帝祈求怜悯、看顾而吟唱ê哀歌,chit四种就是(1)失迷方向ê人,in行m̄-tio̍h去道路,致使性命陷入危险中(第4到9 节)。(2)因为违背上帝ê命令,而被关进监牢中受苦ê人(第10到16节)。(3)因为犯罪被惩罚,甚至致使重病ê人(第17到22节)。(4)tī航海中tú-tio̍h灾难ê人(第23到32节)。因为上帝垂听in ê祈祷,in请大家kah in同齐感谢上帝ê慈爱,颂赞上帝行大能奇事(第8节、第15节、第21节、第31节等等);三是第33到43节,描述上帝ê恩典kah慈爱。

Chit首诗篇ê特色,就是tī第二个段落中,每一个部分结束,就有一段副歌,而副歌ê开始lóng是「tī急难中,in求告上主」,然后用「in tio̍h感谢上主ê慈爱」结束(参考第6到8节、第13到15节、第19到21节、第28到31节)。

第1到3节,chit段是chit首诗篇ê开场序言,呼吁所有ê人lóng tio̍h来歌颂、o-ló上帝,因为上帝有永远ê「慈爱」。Tùi第3节隐约thang看tio̍h chit首诗歌是以色列人民tùi奴隶之地巴比伦被释放tńg来后写做ê,诗人呼吁所有ê以色列人民beh来感谢上帝ê恩典,因为他拯救受难ê子民。

第4到9节,chit段诗歌是teh描述以色列人民tī旷野漂流ê情景。旷野,是一个不毛之地,无任何食物kah水。因为án-ne,in经历无水kah食物ê苦难,tùi án-ne求告上帝ê帮助。就án-ne上帝带领in行到有水lim ê所在,mā帮助in chhōe-tio̍h食物,hō͘ in免去饥渴ê苦难。Ná亲像头前所提过,第6到8节是副歌。因为是tī旷野,所有结尾ê第9节讲上帝垂听in ê祈祷,hō͘ in解除了饥渴ê苦难。

第10到16节,tùi第11节thang看出chit段诗歌真可能kah以色列人民被掠到巴比伦做奴隶,过ná亲像牢狱之灾ê痛苦生活有关。M̄-koh mā可能是因为犯信仰上ê错误,致使灾难临身而陷入囹圄ê苦难。第13到15节是副歌,因为án-ne第16节讲上帝ê拯救,是kā ná亲像监牢ê「铜门」、「铁闩」hō͘ phut断、击破,hō͘这受难者thang脱离,得tio̍h释放。

第17到22节,chit段诗歌是谈及破病所带来ê性命苦难。旧约圣经时代有一个普遍ê看法,认为破病是kah犯罪有密切关系,是上帝伸手打击悖逆ê子民ê一种方式。因为án-ne,tī破病ê苦难中,走chhōe上帝ê赦免,就等于是teh走chhōe上帝ê医仝款。

Chia诗人tī破病ê苦难中祈求上帝ê救助。诗人tī chia表示已经病重到接近死亡ê边缘,食不下任何物件,完全丧失「食欲」,chit时已经m̄是医生ê能力ē-tàng救tńg来性命,除非有上帝ê医。Á上帝ê话,就是性命ê来源。因为án-ne,当这苦难者向上帝祈求,上帝就医伊,hō͘伊ē-tàng康复起来。第19到21节是副歌,然后第22节诗人tī得tio̍h医了后,tio̍h用诗歌向上帝献上感谢,讲述上帝奇妙ê「作为」。

	第17节ê「得病」,原本希伯来文mā有「成做愚昧」ê意思。用愚昧来看chit段诗歌mā thang明白,因为愚昧所表明ê,就是对上帝认bat无清楚,致使离开上帝。当人离开上帝jú远,痛苦就会加重。

	第23到32节,chit段诗歌讲述航行tī大海中所遇tio̍h ê苦难。以色列文化中有一个传统,认为大海是邪恶势力、危害性命力量ê隐藏ê所在。上帝创造之初,就是用他ê灵运行tī水面上,先稳定了水对性命ê危害,了后开始创造。创世记第七到八章讲述上帝用大水消灭所有受造ê万物。重新另外一个创造。启示录第廿一章ê作者,讲上帝所创造ê新天新地,无koh再出现大海。

无论是大海á是风,lóng是上帝所创造。当航行者tú-tio̍h大风涌,m̄-nā khiā bē稳,明明是ná亲像lim醉酒ê人仝款,东倒西歪,chit时船teh要沉无ê时,所有身上ê才能lóng 无路用,最后只chhun上帝thang óa靠。因为án-ne,只有ē-tàng向上帝祈求,chit时,上帝发出命令,hō͘狂风无koh呼啸,一切风kah涌lóng听从上帝ê命令。Án-ne,航行者就bē担忧船翻了「沉到深渊」中。

第28到31节是副歌,tī苦难中向上帝祈求,上帝必定垂听。chit-má诗人beh见证tī上帝命令之下风平浪静,chiah致使航行者thang上岸,并且tī「人民ê大会上宣扬上帝ê伟大」。

第33到38节,这是一段歌颂上帝奇妙作为ê诗歌,表明上帝就是kui个宇宙万物ê创造者,mā是主宰,一切万物lóng是出tī他,mā属tī他。因为án-ne,只要上帝发出命令,河水会干旱,肥ê土地mā会变荒芜,上帝用chit种方式来对付hiah-ê「邪恶」ê人。M̄-koh相对ê,上帝mā ē-tàng hō͘沙漠变成绿洲,hō͘ khiā起tī chit种地方ê人,无koh担忧iau饿,in ē-tàng掖种,而且会得tio̍h丰富ê收成。M̄-nā án-ne,上帝会赐福hō͘听从他旨意ê子民,hō͘ in充满tio̍h性命力,ē-tàng chē kiáⁿ chē孙,家畜lóng会增加。其实,chit段诗歌mā ē-sái讲是kui个以色列人民历史ê浓缩版。

第39到42节,chit段讲述上帝是一个公义ê主,他讨厌欺压人ê人,他一定会出手打击chit种欺压人ê人,救出受tio̍h欺负ê人,并且赐福hō͘ chit种软弱者。上帝用chit种方式来表达他ê正义。「正直ê人」看tio̍h lóng欢喜,而「邪恶ê人」看见上帝进行公义ê审判ê时,只有ē-tàng「哑口无言」。

第43节,所谓「明智ê人」,意思是teh指认bat上帝ê人,会清楚上帝chit种作为。Mā tùi chia体验tio̍h上帝ê疼永bē改变。

重新查询 专卷研经 诗篇系列
错误回报,请联系