箴言 22章1节 到 22章29节   背景资料  上一笔  下一笔
Chit章分做两个段落,其一是第1到16节,mā讲tio̍h智者kah愚者之间ê差别。其二是第17到29节,这部分ê内容一直延续到第廿四章22节,lóng是属tī另外收集到ê智慧之言。

第1节,chit节thang参考传道书第七章1节a句讲:「好名誉赢过珍贵ê香水。」意思真接近。Chit节讲出tī人间世界,m̄是只有金银chiah是宝贝,有比chiah-ê koh khah贵重ê物,就是信誉。

第2节、第9节,参考箴言第十四章31节。虽然「sàn-chhiah人」kah「有钱人」lóng是上帝「所造」,m̄-koh知影对sàn-chhiah ê人生出怜悯ê心,却m̄是用轻视ê态度看待,chiah是有智慧ê富人,chit种人必定会得tio̍h上帝ê赐福(参考箴言十九:17)。

第3节、第5节,chit两节lóng提起「机警ê人」会知影怎样避开「灾祸」,只有「愚戆ê人」chiah会无顾一切往前行而掉落tī「邪恶人ê罗网」里。

第4节,具体讲出「敬畏上主」者ê所得,乃是「富足、光荣、长寿」。富足,指ê是丰富ê性命内涵(参考约翰福音十:10)。光荣是智慧者ê记号,而长寿是teh指一个人有真强ê性命力。

第6节、第15节,chia提起教导gín-á「行正路」是身为长辈ê责任。Án-ne会改变in性命ê态度,mā会hō͘ in永远怀念。

第7节、第13节,chia是讲出现实社会ê生活形态。Kah第十章15节所讲ê:「财富是有钱人ê保障;贫困毁灭了穷苦人。」chiah-ê lóng是teh鼓励人tio̍h勤劳工作,m̄-thang kui工奢华宴乐(参考十二:24、27),á是chhōe藉口推托工作(第13节)。Koh讲,mā是警告人,如果因pîn-tōaⁿ来致使负债,he会是性命悲哀ê事。

第8节,「不义ê种籽」,表示邪恶ê事。意思指专门做pháiⁿ事ê人,结果kan-taⁿ会为伊带「无穷」ê「后患」,结果伊所有累积起来ê一切,lóng会归之乌有。

第10节,chia「狂傲ê人」kah愚戆人是仝款ê,in lóng m̄承认有上帝。因为án-ne,chiah会引起koh khah chē ê「纠纷、冤家、侮辱」等。

第11节、第29节,chit两节lóng提起一个有智慧ê君王所kah意ê部属,就是「纯洁ê心」kah「办事敏捷ê人」,却m̄是只有会讲好听话语ê臣仆。

第12节,chit节thang参考第五章21节、第十五章3节。「真理」指纯洁、无瑕疵,á是teh指真实ê心思意念,mā thang指聪明者有智慧ê言语。

第14节,chia指ê「陷阱」,ná亲像猎人tī树林内设计掠动物ê陷阱仝款。淫妇总会以甜言蜜语hō͘人掉入陷阱里,却m̄知死亡ê来临。「上主所讨厌ê人」是teh指邪恶者。

第16节,「向有钱人送礼」,这是teh指o͘-se ê意思。因为有钱人根本无需要别人送礼hō͘伊。相对ê,「剥削sàn-chhiah人」是上帝所讨厌ê行为,上帝一定会追讨chit种人ê罪行(参考十四:31)。

Tùi第17节开始,一直到第廿四章34节止,chit段经文被归类tī「一般智慧ê言语」。Kah头前第一到九章ê句型相近。分做两大部分,其一是tùi第廿二章17节到第廿四章22节,这部分共计有三十则。Tī chit段经文中,就是用「óa靠上主」(á是「敬畏上主」)开始,mā以「敬畏上主」结束,中间tī第廿三章17节mā是用「敬畏上主」为重点经文。其二是tùi第廿四章23节到34节。

第17到21节,chit段经文开始就提醒人tio̍h注意听智慧言语ê「教导」,所谓智慧言语乃是tùi「óa靠上主」着手。「óa靠上主」kah「敬畏上主」(参考廿三:17)是仝款意义,因为会óa靠上主ê人,就是谦卑ê人,in kah狂傲ê人完全无仝。

第22到23节,chit两节是第1则智慧之语。讲tio̍h好款待sàn-chhiah、软弱ê人,绝对bē-tàng欺压in。上帝会对chit种欺压贫困ê人采取惩罚ê动作(参考十四:31、廿三:10)。类似chit种教导tī先知ê文献中非常明显,lóng是teh警告人m̄-thang欺负sàn-chhiah人。相对ê,第十四章21节讲「怜悯sàn-chhiah ê有福」、第十九章17节讲「赈济sàn-chhiah人就是teh借hō͘ 上主;他会照伊所行ê 好事来还伊。(全民版)」、第廿二章9节则讲:「好心ê 人会得tio̍h 福气,因为伊 kā 米粮分 hō͘ sàn-chhiah 人。(全民版)」

第24到25节是第2则智言。Chit两节mā是一般常听tio̍h ê「近墨则乌」。人真容易学习pháiⁿ ê行为。类似ê句话tī第十二章26节,讲:「义人引chhōa 伊ê 厝边行正路;pháiⁿ人 ê 路 hō͘ 人失迷。(全民版)」mā thang参考第廿四章1到2节。

第26到27节是第3则。Tī箴言中kúi-nā pái提起chit件m̄-thang为别人「作保」chit件事(参考六:1、十一:15、十七:18、二十:16、廿七:13)。Chit句「连你ê床lóng会hō͘人搬行」,意思是teh指厝mā会因为án-ne hō͘人the̍h走。

第28节,chit节是第4则。Kah第廿三章10节仝款ê意义。所谓「移动」祖先留落来ê「旧地界」,表示土地hō͘人强占,á是并吞。摩西律法严格规定不thang án-ne做(参考申命记十九:14、廿七:17)。

第29节,这是第5则。「办事敏捷ê人」,表示知影时间kah工作效率ê重要性,chit种人bē kah游手好闲ê人泡做伙。有智慧ê君王一定会欢喜chit种臣仆。

重新查询 专卷研经 箴言系列
错误回报,请联系