箴言 15章1节 到 15章33节   背景资料  上一笔  下一笔
Chit章ná亲像头前已经有提起过ê,tùi第十二章起ê这几章lóng是用相对句型描述善恶、好bái、愚戆kah明智者之间ê差别。Chit章mā是用「明智」kah「愚戆」做主题,讲tio̍h愚戆ê人kah聪明人、明智者之间ê无仝,而且所用ê句型大多数是对偶句。

第1到2节、第4节、第23节、第26节、第28节,lóng是kah讲话有关系。有智慧者讲话必定ē-sái对方ê受气「平息」,hō͘人认为是有「智慧」ê发言,而且会chhōa人「充满生机」,m̄-nā án-ne,真正智者讲话前,lóng会经过「三思而后回答」,bē信口开河,mā bē「口吐恶言」故意伤害别人,因为伊心内「纯洁」。相对ê,就是愚戆者讲话必定会伤人,而且是「粗暴」chē chē,「废话」一堆,而且心思意念邪恶,为上帝所「憎恨」,chit种人对别人无任何益处,kan-taⁿ会hō͘人失去意志。第23节mā thang参考第廿五章11节。

第3节、第11节,chit节讲出基督教信仰ê特质,chit位创造性命ê上帝,是无所不知、无所不在ê上帝;他知影人tī隐密中所讲、所做ê一切。就算bih tī ná亲像「阴间」、「冥府」chit种siōng隐密ê所在,上帝mā会「鉴察」得非常清楚,无人ē-tàng「隐瞒」得了(参考诗篇一三九:7—8)。

第5到7节、第12节,这四节用「愚拙人」、「邪恶人」、「愚妄人」、「狂妄人」,kah「精明人」、「正直人」、「明智人」相对比,说明二者之间ê差别。前者会藐视智者ê「管教」,不领受「苦劝」,mā无法度接受新ê知识,结果为家己带来「祸患」。M̄-koh后者会明了智慧者ê管教是有利益ê,in mā会传播「知识」hō͘ kah伊同齐生活、工作ê人,hō͘大家lóng得tio̍h利益。

第8到10节,上帝是公义ê主,他「憎恨邪恶人」所做ê事,因为án-ne,一定会拒绝chit种人ê奉献,iáu会严厉惩罚in。相对ê,「义人」所做ê事、祈祷,lóng会蒙上帝ê欢喜接纳、赐福。

第13到15节,thang参考第十七章22节。说明真正智者,会知影保持心灵ê舒畅,bē hō͘忧愁烦扰伊ê心。

第16到17节,「烦恼」,kah第13节ê「悲愁」、15节ê「苦恼」同义。财富chē,却无「敬畏上主」,chit种人ê「烦恼」会跟tòe财富增加。真正智者会宁可选择俭朴ê物质生活,而持守对上主ê敬畏,伊知影hō͘家己心灵活泼喜乐,赢过富裕ê物质生活而带来仇恨。第17节kah第十七章1 ê:「食硬饼干而心安理得,赢过满桌酒肉而相争相吵。」意义仝款。

第18到22节,chit段经文koh一pái讲tio̍h智者kah愚戆者之间ê差别;智者显露出来ê特质,就是「容忍」、「诚实」、做tāi-chì「正直」,会谦卑注意听别人意见;相对tī愚者,就是「急躁」、「pîn-tōaⁿ」、「藐视父母」、「以愚拙为乐」,做事无计画。

    第24到25节、第27节,chit段经文说明上帝喜爱ê人,是会知影选择「性命道路」,chit种道路是kah上帝保持合宜关系;伊bē想beh贪图「寡妇ê厝业」chit种「不义之财」,mā会拒绝o͘-se。

	第29到33节,chit段经文koh一pái提起愚戆者kah正直者,tī上帝眼中必定会有无仝ê结果。上帝一定会垂听「正直人ê祈祷」,当然bē chhap邪恶者ê祈祷声音(参考约翰福音九:31),因为有上帝垂听,就会hō͘智者心中喜乐,chit种人必定是「敬畏上帝」ê人chiah会得tio̍h chit种智慧。

重新查询 专卷研经 箴言系列
错误回报,请联系