Chit段经文koh一pái描述以色列人民是真紧to̍h健忘ê民族，chiah tī前一工发生in因为埋怨，甚至挑战摩西kah亚伦之领导权威ê事，á死去chiah-ni̍h chē人。chit-má in koh埋怨in无好好á保护in，讲in害死chiah-ni̍h chē人。In无自我反省ê心，lóng是kā所有一切lóng归原因tī摩西kah亚伦。

第41到45节，以色列人民一再埋怨摩西kah亚伦，带领in离开埃及不讲，还hō͘ in tī旷野流荡ê hit段时间里，一再发生死亡ê事件。M̄-koh in bē记得死亡并m̄是因为摩西kah亚伦bē带领，却是因为in对上帝ê信心不足，甚至是怀疑所致，特别是挑战上帝奴仆ê领导权，án-ne chiah是真正ê问题所在。

「云彩」，tī摩西五经中一再被用来形容是上帝降临ê一个记号。chit-má上帝koh一pái透过云彩显现他ê荣光tī圣幕中，上帝听见以色列人民chit种态度，决定铲除chit种会造成民心大乱ê人民。因为án-ne，ài摩西kah亚伦离开chit群来抗议in ê人。

第46到47节，摩西kah亚伦展现出领导者ê风范，并无因为án-ne就放弃家己ê同胞，摩西赶要紧亚伦kā香炉里ê灰掖tī人民中间，当做洁净kah忏悔ê记号，因为伊已经知影上帝讲完话了后，随时就ài beh进行惩罚，á惩罚ê方式，是足以造成极大死亡ê瘟疫疾病。

第48到50节，因为亚伦动作快，无扩大死亡，m̄-koh iáu是死去一万四千七百人。

Chit章所记载ê chiah-ê事件，siōng主要是teh说明chit群由埃及被摩西、亚伦带出来ê以色列人民，tī埃及khiā起超过四百年之久，有真长ê一段时间teh过奴隶生活，早已经习惯了奴隶样式，只知影食、lim，真少想tio̍h自由ê性命尊严，以及用坚忍、忠实ê心顺服上帝ê旨意。Á上帝为tio̍h beh帮助in建立有尊严ê性命，kah纯洁ê宗教信仰，hō͘ in知影感恩，学会晓负责，就是透过旷野流荡ê日子，一步步地矫正in过去错误 ê心态，tńg来归到上帝面前，á所有功课，就是tùi学会晓知影尊敬、听从上帝所拣选ê奴仆开始做起。