民数记 11章4节 到 11章23节   背景资料  上一笔  下一笔
以色列人民向摩西抱怨无好ê物件食,这并m̄是第一pái,tī in tú出埃及ê时chūn,因为tú-tio̍h缺水,就抱怨(参考出埃及记十五:22—25);然后tú-tio̍h缺乏粮食,mā是抱怨(参考出埃及记十六:1—5)。旷野,绝对m̄是一条易行ê道路,ná亲像奔走天国之路仝款,耶稣讲he是一条「窄门」之道,ē-tàng chhōe得tio̍h ê人无chē(参考马太福音七:13—14)。因为旷野生存无容易,因为án-ne,thang了解上帝ài摩西kā以色列人民带出埃及后,就进入来旷野之地,就是beh kā in tī埃及四百gōa年ê心思意念全部洗涤清气。Beh hō͘ in知影,人生存m̄是óa靠食物,mā m̄是óa靠人ê气力,á是beh óa靠上帝所讲chiah行(参考申命记八:3)。

第4到6节,chia特别强调是由外族人事(tāi)先发怨言ê。Chiah-ê外族人是当以色列人出埃及ê时,紧跟tòe以色列人民离开埃及(参考出埃及记十二:38)。Chiah-ê人可能是奴隶,á是雇工,in看tio̍h以色列人逃出埃及,mā趁机逃走。M̄-koh chit-má in却tī以色列人民中成做煽动者。讲in想beh食肉。Á tùi第5节ē-tàng看出,埃及是一个物产丰富ê国家,m̄-koh,旷野则寸草不生之地,上百万ê人tio̍h食、lim,这却m̄是一件容易ê事。以色列人民为tio̍h想beh食肉,对摩西讲in ta̍k工食吗哪已经食到脚无力à。

第7到9节,chit三节绍介吗哪。Tī出埃及记第十六章14节mā有说明吗哪是露水结成「一层薄薄像霜一类ê物件」。可能是因为ta̍k工三餐lóng食chit种物件,chiah hō͘ in感觉无味。

第10到15节,摩西听见以色列人民án-ne发tiâu骚,引起上帝忿怒,伊当然会艰苦心。因为以色列人民直接向伊发怒,伊mā有人ê软弱kah限制,ta̍k工听抱怨ê声音,即使是真有耐心ê人mā会受不了,莫怪伊会对上帝讲,人民chit种抱怨,等于是一种折磨(第15节)。伊真清楚向上帝表示无法度忍受以色列人民继续án-ne抱怨落去,尤其是in想beh食肉,这koh khah是超过伊ê能力之外。因为án-ne,摩西向上帝祈求「死」。这mā是先知以利亚、耶利米、约拿等共有ê念头。

第16到20节,chit段经文是上帝解决摩西tú-tio̍h ê困境。

上帝ài摩西去chhōe「七十个受人尊敬ê长老」,这kah出埃及记第十八章记载摩西ê丈人叶特罗提议是相近ê,伊ê丈人kā摩西讲, mài家己一个人担当所有ê重大事务,thang kā它委托人民中ê领袖。因为án-ne,摩西接受建议后,kā人民组织起来,并且选出「能干ê人」来帮助料理人民ê事。Chiah-ê人就是chia所讲ê长老。不过tī chia真无仝款ê所在,是这七十位长老lóng被带到上帝面前,上帝ài kā赐hō͘摩西ê灵「分hō͘ in」,hō͘ in ē-tàng帮助摩西「分担责任」。Chia mā是仝款,上帝不ài摩西家己「一个人挑这重担」。

第18到20节,上帝决定beh提供肉食品hō͘以色列人民食到无法度消化,用chit种方式来表示上帝ê惩罚。上帝提供ê肉品,是鹌鹑。Chit种鸟tī春天大批飞过地中海,tī早秋向南折tńg来,tī途中不时被讨海人á是农人捕获。诗篇ê诗人描述chit件神迹ê时讲:「他tùi 天起东风,用他ê 权能chhōa 南风来。他降落肉tī in 中间,chē kah 亲像土沙粉,koh 有飞鸟chē kah 亲像海沙,落tī in ê 营中,tī in tòa ê 布棚ê 四箍围。 In 就食到饱饱;他照 in 所意爱 ê hō͘ in。(全民版)」(诗篇七十八:26—29)

第21到23节,chia mā说明摩西虽然手中bat行过kúi-nā-pái神迹奇事,甚至kā红海分开过,tùi石磐中出泉水,mā亲目看tio̍h吗哪ê神迹,m̄-koh却无法度明白上帝是无所不能ê神。因为án-ne,当伊听tio̍h上帝beh赏赐hō͘以色列人民食一个月ê肉ê时,伊认为he是无可能ê事。因为单单离开埃及ê以色列cha-po͘人就有六十万gōa人,若是koh加上妇女,以及未满二十岁以上ê gín-á,kah外族人等lóng加做伙,ná数目koh khah是惊人。M̄-koh上帝beh施行ê chit-ê神迹,tú好说明一件非常重要ê信仰认知:tī上帝手中,无无法度成就ê事。他回答摩西讲:「我ê能力有限?你就beh看见我讲kám bē实现!」基督教信仰看上帝,是一个无所不能ê上帝(参考创世记十八:14,约伯记四十二:2,马可福音十:27)。

重新查询 专卷研经 民数记系列
错误回报,请联系