尼希米记 7章1节 到 7章73节   背景资料  上一笔  下一笔
Chit章主要teh说明修筑完成后ê尼希米,án怎帮助耶路撒冷城ê犹太居民维护城内khiā起ê安全。伊第一件做ê事,就是帮助in建立巡逻防卫制度。Siōng重要ê是chhōe出两位值得信赖ê助手负责督导巡防ê工作,mā就是家己ê兄弟哈拿尼kah城堡ê司令官哈拿尼雅。Koh讲,tī chit章中mā有一份户口名单,是记录结伴回乡ê名单,kah以斯拉第二章所记载ê名单真接近。

第1到3节,chit段经文thang看出尼希米chiâⁿ实是一个真好ê领袖。伊tī城墙完全修建完成了后,随时组成守卫人员。伊kā圣殿ê诗班、守卫、利未人等工作lóng派妥了后,随时任命伊ê兄弟哈拿尼kah城堡司令哈拿尼雅两人,负责耶路撒冷ê安全。伊o-ló哈拿尼雅是一个敬畏上帝、可靠ê人。伊只交带清早天无亮以前,bē-tàng phah开城门,日头落山后就beh kā城门关闭、上闩,并且分派守卫人员,负责保护安全。

第4节,tùi chit节thang看tio̍h主前586年,巴比伦皇帝尼布甲尼撒严重摧毁耶路撒冷城ê景况,确实荒废得非常严重。另外一方面,因为本来ê城墙无修复,所以khiā起tī城内反tńg无安全,因为无人固守,任何强敌á是盗匪lóng可能入侵,会khiā起tī城内ê人,必定mā是穷到极点,因为án-ne,有无城墙、城门等对in来讲已经无关要紧。这就是为甚么城里ê人并无chē ê原因,mā是「房屋造好ê mā无chē」ê原因,因为实在无能力继续修建家己ê房舍。Ná亲像前无久in向尼希米讲ê,连食饭lóng有问题,iáu tio̍h典押家己ê kiáⁿ为奴,tī chit种情况下,beh修建家己ê房舍确实是真困难。Taⁿ城墙修复后,情况必定改变bē少。搬入来城内khiā起ê犹太人民必定会jú来jú chē。Ná亲像第6节所讲ê:「真chē流亡ê人离开巴比伦省,tńg去耶路撒冷kah犹大,各tńg来家己ê家乡。」

	第5到6节,chit段经文讲尼希米想beh了解kui个回乡ê实况。因为án-ne,伊召集民众kah in ê首领、长官,beh观察in ê家谱。因为耶路撒冷城墙已经修复完成,而且已经有守卫,表示thang安全khiā起ê时,回乡人潮陆续增加。In就是tùi巴比伦奴隶之地tńg来ê人。

Tùi第7节到第73节ê经文,资料kah以斯拉记第二章仝款。Chit段列出了回乡团中ê十二位领袖名单。

    第8到25节,chit段经文是记载以色列各宗族ê人数。Chia共计提供了十八个宗族。

第26到38节,chit段经文记录了tńg来到祖籍ê人数。

第39到42节,祭司宗族回乡ê人数。

第43到45节,chit段经文记载利未宗族、圣殿歌手、圣殿守卫等宗族人数。

第46到56节,chit段记载圣殿工人ê三十二个宗族名单。

第57到59节,这是所罗门奴仆共计有ê时一个宗族。

第60节,圣殿工人ê后代kah所罗门奴仆ê后代tńg来ê人数有「三百九十二名」。

第61到62节,chit两节真有意思,真可能chiah-ê人确实已经无法度chhōe-tio̍h本来ê族谱,m̄-koh,in mā可能是跟tòein来到耶路撒冷ê外族人,ná亲像当年出埃及ê时,mā有真chē外族人跟tòe以色列民族逃出埃及仝款(参考出埃及记十二:38,民数记十一:4)。

第63到65节,chia提起有kóa人无法度chhōe-tio̍h族谱来证明in是属tī祭司宗族ê人,m̄-koh因为in中间却有人kah外族人通婚,因为án-ne mā被列入为「无清气」ê族群,chit种人无法度担任祭司ê工作。

第66到69节,chia提供总计回乡人数,mā有男女奴仆,以及男女歌手。另外mā记录了马、骡子、骆驼、驴á ê数量。Chiah-ê动物lóng是运输上真重要ê动力。

第70到72节,chia记落来了有关in带tńg来贵重ê捐助物件,包括有省长捐赠ê,除了有黄金八公斤外,iáu有祭司礼服、礼仪用ê碗。Iáu有众族长捐献ê金银,以及人民捐献ê金银kah祭司礼服等。

第73节,chit节是第一到七章ê总结,表示所有回乡ê人,生活lóng安顿落来à。

Mā是tùi第一到七章是尼希米记前半部,lóng是记载尼希米ê事。第八到十章,lóng是记载有关以斯拉ê事。伊是一位「饱学之士,精通上主――以色列上帝颁hō͘摩西ê律法」(参考以斯拉记七:6)。

重新查询 专卷研经 尼希米记系列
错误回报,请联系