马可福音ê作者tī编辑上特别ê所在，就是kā耶稣预言受难ê记事，第二、三pái了后lóng续落来众门徒teh争位á大细ê事件。Chit种编排方式突显出来ê是：众门徒真正是bē明白耶稣teh beh受难ê意义。Á是讲，kui个犹太民族所关心ê iáu是政治运动，kah耶稣所宣扬ê「上帝国」信息明明是南辕北辙。

第33到34节，「lín tī路上争论些甚么？」显然沿途ê中间，门徒lóng tī争论着「甚么人siōng伟大」chit件事。

第35节，「谁beh居首，甚么人就tio̍h居后，作大众ê奴仆。」chit句话成做基督教信仰ê经典，表明tio̍h用「奴仆」ê认知来看性命ê问题。Ná亲像使徒保罗所讲，耶稣是取奴仆ê形像到世界起来（参考腓立比书二：7）。

第36到37节，耶稣用一个「细汉gín-á」作教材，ài beh门徒学习「接待」ê功课，这是teh指kā gín-á当贵宾仝款，á接待者就是「奴仆」ê角色。细汉gín-á tī犹太人社会无地位、身分，因为计算人口ê时，细汉gín-á是不列入计算对象。