马可福音 6章1节 到 6章32节   背景资料  上一笔  下一笔
Ná亲像约翰福音第一章11节所讲ê:「伊来到家己ê所在,家己ê人却无接受伊。」耶稣tńg来到家己ê故乡拿撒勒,伊故乡ê人拒绝接受伊。虽然伊被邀请tī「安息日」进入会堂「教导人」,而且听伊ê教导了后,大家lóng感觉「惊kah gāng去」,m̄-koh却是「惊kah gāng去」到m̄敢相信,最后是tùi「惊kah gāng去」变成「厌弃伊」。

第2到3节是拿撒勒人一连串ê疑问,并且因为对耶稣成长ê家庭甚熟,而且认为耶稣就只是一个「木匠」,soah因为án-ne「厌弃伊」。

第4节,耶稣用一句流行ê俗语来回应家己乡亲厌弃伊ê态度。

第5到6节,「厌弃」耶稣ê人,结果耶稣以「无行甚么神迹」来回应伊ê乡亲。其实,有损失ê是拿撒勒人。

第六章6节b句到32节
Chit段经文mā用「三明治」编辑法呈现出来。Tùi第6节b句到第13节,是耶稣差派所拣选ê十二个门徒出去传福音,然后第30到32节记载chiah-ê门徒tńg来向耶稣报告in传福音ê成果。中间插入第14到29节chit段记载行洗礼约翰被希律王杀害ê经过。Chit种编辑法真清楚teh说明一件事:出去传福音就beh有像行洗礼约翰被杀害受难ê准备。

第6节b句到13节,chia讲派十二位门徒是「两个两个地出去」,kah路加福音第十章1节差派七十二门徒出去传福音ê情形仝款。同时,耶稣hō͘这十二个门徒lóng有「驱逐污灵ê权柄」。

第8到11节是耶稣hō͘众门徒ê指示:thang带拐á、穿一双鞋子,其它ê lóng mài带。有家庭接待就入去tòa,直到离开ê时。若是被拒绝,就将身上ê灰尘跺掉,chit种方式是巴勒斯坦地区「拒绝往来」ê一种风俗。用chit种方式当作「警告」,意思是teh指以后会有审判,而且两个人ê见证是会hō͘接受ê(参考申命记十九:15)。

第12到13节,门徒知影福音ê信息中心,就是beh「劝人悔改」。因为只有悔改chiah ē-tàng得tio̍h上帝ê赦免。「用油涂抹真chē病人,治好in ê疾病」,早期ê人相信「抹油」是治病ê一种「秘方」,tī当时非常流行(参考路加福音十:34,雅各书五:14),chit种thang治病ê油,可能是种药物。

第14到29节,马可福音记载chit段关于行洗礼约翰被杀害ê事件,mā是前三本福音中描述siōng清楚ê。

第14到16节,因为耶稣ê名声已经震撼了希律王。Chia记载坊间teh传闻ê耶稣身分,包括有「施洗者约翰有复活」,á希律王mā认同这观点。

第17到20节,行洗礼约翰会hō͘希律关入监狱ê原因,是因为伊严词「tiāⁿ-tiāⁿ指责」希律ê婚姻是犯了奸淫罪,这hō͘希律ê太太希罗底相当不满。可见行洗礼约翰并无会因为希律是王,拥有杀伊ê权柄,就惊惶á m̄敢kā伊谴责。因此,希罗底chiah是真正想beh杀害行洗礼约翰ê人。因为希律眼中ê行洗礼约翰是一个「正直圣洁ê人」,伊bat想办法beh「保护伊」。
第21到25节,希罗底利用庆祝希律王生日ê时chūn,透过cha-bó͘-kiáⁿ tī宴会中跳舞得tio̍h希律kah宾客ê赞赏,利用希律王开出奖赏ê机会, ài cha-bó͘-kiáⁿ索取「施洗者约翰ê头」做奖赏。

「无论你向我求甚么,我lóng hō͘你。」「就是我江山ê一半,我mā hō͘你!」希律ê这两句话,kah亚哈随鲁王beh hō͘王后以斯帖ê仝款(参考以斯帖记六:3、6)。M̄-koh亚哈随鲁王有án-ne权柄,希律王并无,伊ê王位甚至是由罗马皇帝决定。因此,伊讲chiah-ê话应该是酒话。Á希罗底ê cha-bó͘-kiáⁿ听从母亲ê要求,向希律索取行洗礼约翰ê头,就是杀害ê意思。

第25到29节,就án-ne,行洗礼约翰就tī希律王ê酒后ê一时兴起丧失了性命。

第30到32节,这三节thang续接tī第13节了后,这十二门徒tńg来「Kā一切」lóng向耶稣报告in出去传福音ê结果。作者并无记载in有得tio̍h甚么成果,m̄-koh耶稣会带门徒往「偏僻ê所在去」,主要原因是希望门徒thang安静落来。耶稣为甚么beh án-ne?真可能kah群众ê歌颂声有关系,因为门徒真可能是因为有赶鬼、医病ê能力感觉欢喜,并且因此得tio̍h真chē民众ê赞赏。M̄-koh,人siōng大ê软弱乃是来自群众ê掌声kah喝采,因为chiah-ê声音ē-sái人迷失了性命ê方向。


重新查询 专卷研经 马可福音系列
错误回报,请联系