利未记 1章1节 到 1章9节   背景资料  上一笔  下一笔
利未记tùi第一章开始,一直到第七章止,真详细描述有关各种献祭礼仪ê规定。出埃及记第廿五到三十章、第三十五到四十章chit两段落,lóng是teh记载有关圣幕,kah圣幕内面各项祭典所需要用ê物ê制造方法,甚至包括祭司人员穿ê服装缝制方式。Á利未记则tùi第一到七章续接记载有关祭典礼仪ê细则。既然是kah祭典有关,必定是出tī「祭司文献」ê作品。因为án-ne mā thang看出,圣幕kah后来进入迦南地所罗门建造圣殿,lóng是用祭祀礼仪当做敬拜上帝ê主要方式。后来耶路撒冷圣殿被摧毁,人民被掠到巴比伦做奴隶了后,发展出来「会堂」ê聚会,chit时ê聚会敬拜无koh是祭祀礼仪,却是用注意听上帝kah祈祷做中心。

Chit章是讲tio̍h有关「烧化祭」ê条例。烧化祭ê祭品以厝内饲养ê动物为主,包括牛、羊、粉鸟á是斑鸠等,m̄-koh田里ê野兽,水中ê鱼类lóng bē-tàng用来做烧化祭ê祭品。所谓「烧化祭」,就是beh kā kui只祭牲全部烧化bē-tàng存留。

第1到2节a句,chit段话ē-sái讲是tùi第一章2节b到第六章7节ê引言。

「召唤」,这mā是希伯来文为tio̍h án-ne kā卷经册号名ê由来。

上帝tùi他ê「圣幕」里召唤摩西,chia ê圣幕,就是出埃及记中有关摩西带领以色列人民建造起来敬拜上帝ê「圣幕」。上帝tī chia「吩咐」伊转告以色列人民照规定应该办理ê事项。

第2节b句到9节,chit段经文先讲tio̍h有关献公牛当「烧化祭」ê规定。Siōng基本ê要件,就是beh「选用无残缺ê公牛」当做牲礼(第3节)。Chit句话ē-sái讲是所有献祭ê基础。

注意第2节b句chia ê「献」字,原本是teh指「接近」,然后teh beh献祭ê动物带到「上主ê圣幕门口」。「接近」ê意思是teh指接近敬拜上帝ê圣幕,有含透过献祭礼仪,hō͘人接近上帝ê意思。

第3到4节,讲献祭牲ê主人tio̍h「Kā手hē tī祭牲ê头壳顶」,chit种样式是teh表示两种意思:一是表示chit-ê献祭ê人kah祭品之间有相当密切ê关系,因为祭牲teh代表主人,因为án-ne,当用火烧掉这牲祭ê时,表示献祭者kā家己奉献hō͘上帝。二是透过献牲祭tī上帝面前,表示赎罪。因为chit种作法是上帝会「欢喜接纳」ê方式,mā就ē-tàng「替伊赎罪」。

第5到9节,chit时chūn,祭司tio̍h tī圣幕门口宰杀祭牲,然后kā祭牲ê「血hiù tī圣幕门口ê祭坛四周」,尤其是一定tio̍h抹tī祭坛四个凸起ê角,因为chit-ê角有赦免罪行ê功用,然后点火烧掉祭品。因为内脏kah后腿比较khah lah-sap,可能会污秽土á是肠肚内有秽物,lóng需要经过洗荡了后chiah ē-tàng献hō͘上帝。


重新查询 专卷研经 利未记系列
错误回报,请联系