Chit段经文记载以法莲、玛拿西、西布伦、亚设、拿弗伊利等支族攻打迦南地其他地区ê情形。
注意chit段经文一再重复ê一句话――in无kā迦南人全部赶出去(参考第28节、第30节、第32节、第33节)。比较特别ê是亚摩利人m̄-nā phah赢了以色列ê「但族」,koh kā in逼上了山区,这表示亚摩利人是有真好ê防御能力,同时mā表示以色列人teh进攻迦南地ê时,tú-tio̍h困难,并m̄是每件军事行动lóng真顺利。唯一值得注意ê是,约瑟家族ê以法莲kah玛拿西两支族攻打伯特利ê时,得tio̍h「上主帮助in」(第22节)。
第22到25节,chit段经文讲约瑟ê kiáⁿ孙以法莲kah玛拿西chit两个kiáⁿ ê支派,去攻打伯特利城ê经过,是利用探á知影怎样进入hit-ê城,并且the̍h落来hit-ê城,攻城ê经过类似约书亚率领以色列军队攻打耶利哥城ê情形,mā是利用探á先进入探虚实,后来得tio̍h妓女喇合帮忙,而约书亚mā无杀害喇合ê厝内人(参考约书亚记第六章)。
第26节,赫人ê土地,这mā是属tī迦南人ê所在地。
第27到28节,chia提起提起玛拿西支派ê人,虽然phah赢,m̄-koh并无亲像约书亚hit种,kā占领区内ê原住民驱离,却是tī后来kā chiah-ê原住民当做奴隶看待。
第29节,这是用法莲支派,mā是仝款,无kā占领区内ê原住民赶离开,而hō͘ in继续留落来。
第30节,这是西布伦支派ê人,in仝款允准占领区ê居民继续tòa tī in中间。
第31到32节,这是亚设支派ê人,仝款允准in占领区内ê原住民继续留tiâu in中间。
第33节,这是拿弗伊利族ê人,in mā是仝款无赶走占领区内ê居民。
第34到35节,但族人tī战事顶面显然并无顺利,in无法度攻落亚摩利人ê城市,反tńg被逼退居到山顶去,无法度落去到平原来。后来亚摩利人是hō͘以法莲kah玛拿西支派ê人hō͘征服,并且奴役in。
第36节,chia所讲ê「以东人」,m̄-koh tī希伯来文是写「亚摩利人」,chit节写关系地区范围,kah前文接不起来。
|