约伯记 37章1节 到 37章24节   背景资料  上一笔  下一笔
Chit章开始并无出现像第三十四章kah三十六章1节ê「继续」、á是第三十五章1节ê「koh」,显示chit章经文乃是续接第三十六章ê文脉。主要内容是以利户希望约伯tùi上帝ê伟大创造中看tio̍h家己是jōa-ni̍h-á渺小,并想beh去明白上帝tī伊性命中ê意义。

第1节,chit节kah第三十六章33节相连;tī第三十六章33节a句讲tio̍h雷电预告风暴ê来临,chit节则讲「暴风」已经来临。风暴kah雷电是一体ê两面,两个是分bē开ê,雷电出现ê时,往往总有风雨交加ê景象。Tī第三十六章33节b句讲tio̍h cheng-seⁿ知影逃避雷电kah风暴ê侵袭,chit节则讲tio̍h人tú-tio̍h chit种景象ê时chūn,m̄知往tó位去逃避,心kan-taⁿ会惊惶而「跳跃无停」,这显示出人ê软弱kah无力,远不如cheng-seⁿ。

第2到4节,以利户ài大家lóng「听上帝ê声音」,上帝就是透过chiah-ê「雷轰」、「sìh-nà」、「隆隆ê吼声」、「不断ê闪光」来向人启示他家己。因为án-ne,一个真正有智慧ê人,就会tùi chiah-ê天际上ê景象,知影上帝ê伟大,而谦卑家己。

第5到13节,Tī chit段经文中,以利户用自然界ê景象来表示:所有chiah-ê「雪」、「雷电」、「风暴」、「雨水」、「寒流」、「密云」等等,lóng是听从上帝ê「下令」而行动,这绝对m̄是人ē-tàng「测透ê事」,说明无论是季节á是气候ê变化,lóng kah上帝ê旨意、命令等有密切关系,因为所有受造ê宇宙万物lóng听从上帝ê话而行动。Á chiah-ê行动所表现出来ê意义,就是上帝teh「显示对人ê慈爱」。

第14节,以利户一直表示伊beh代表上帝讲话,因为án-ne,一再ài约伯注意「注意听」伊讲话,因为伊ê话就是上帝ê意思。伊ài约伯「安静一时á」,好好á思考「上帝奇妙ê作为」,这mā是用后上帝直接回答约伯ê时所提ê建议。

第15到18节,Tī chit段经文中,以利户连续提出几个问题,所用ê语句lóng是「你知影mah」chit种句型,chit种句型是带有讽刺ê意味tī其中。Khah强调ê是,伊认为约伯根本就m̄-bat chiah-ê事。换句话讲,以利户虽然是用「你知影mah」,其实伊真正意思是「你根本就m̄知」。伊koh一pái用「云彩」、「sìh-nà」、「南风」等来说明「上帝奇异ê作为」,m̄是人所ē-tàng理解ê。伊强调kui个「穹苍」就是上帝创造ê奥秘。创世记第一章6节讲tio̍h上帝创造「穹苍」,并且称做「天空」(参考创世记一:8),而人只不过是「穹苍」中ê一个小小生物而已。

第19到20节,chit两节表面上看起来,kah-ná以利户真谦卑,ài约伯教导伊,其实伊是teh讽刺约伯。因为约伯一再要求kah上帝对话,因为án-ne,以利户对约伯提出chit种看法。以利户则认为约伯chit种态度明明是m̄知分寸。以利户tī chia讲伊m̄敢「要求kah上帝讲话」,因为伊惊hō͘ 上帝ê忿怒hō͘「毁灭」。

第21到24节,chit段是以利户ê结语。Tī chit段结语中,伊koh一pái引用自然天象,包括「天空ê亮光」、「凉风」、「北方有金色ê光辉」等,来陈述人ê愚拙、渺小kah上帝ê智慧、伟大实在无法度互相比较。

以利户另外一方面mā是teh设法安慰约伯,ài伊m̄免koh再惊惶性命陷入苦难中,因为上帝ê慈爱会hō͘所有苦艰苦心去,了后就会亲像「天空晴朗」仝款,约伯mā会koh一pái重现新ê性命希望。即使上帝ê威严hō͘人敬畏,m̄-koh上帝iáu是公义ê上帝,bē冤枉好人。以利户ê终结iáu是认为:约伯ê苦难,m̄是tùi上帝来。因为上帝是「公义正直」ê,他kan-taⁿ会替好人伸冤,bē「欺压人」。伊提醒约伯m̄-thang「自认为聪明ê人」,beh知影「敬畏」上帝chiah是正确ê态度。

重新查询 专卷研经 约伯记系列
错误回报,请联系