耶利米书 26章1节 到 26章11节   背景资料  上一笔  下一笔
Tùi chit章经文中thang看kah真清楚,先知耶利米ê信息kah其他先知ê信息lóng teh强调信仰kah社会生活是一体ê两面,无法度分开。若是tī社会生活行为上欺压穷困者,然后koh再去敬拜上帝,he是严重侮辱上帝ê行为,mā是teh污秽圣殿ê神圣。所以先知运动中有一项,就是ài大家改正chit种恶质ê社会生活行踏。M̄-koh众先知chit种呼吁m̄-nā无得tio̍h人民ê尊重,颠倒ê,却是惹来hiah-ê有权势者ê忿怒kah讨厌,in用真chē理由想beh堵住先知ê口。

Ná亲像主前第八世纪ê先知阿摩司,伊当时是遇tio̍h大祭司亚玛谢ê恐吓,而先知耶利米chit-má则被掠审问,官员起诉伊beh判伊死刑。先知耶利米被掠了主要原因,是伊宣告掌权者恶质ê社会行为,会hō͘耶路撒冷圣殿像北国以色列早期ê宗教中心示罗仝款被毁灭(参考廿六:9),in认为先知耶利米chit种讲法是teh恐吓人民。

Koh讲,tùi先知运动中mā thang看tio̍h一个事实:一个国家ê兴亡,一个民族ê兴衰,并m̄是在tī物质生活是m̄是富裕,以及该国ê硬体建设有chē进步,却是在tī in心灵是m̄是纯洁。

Chit段经文记述先知耶利米听从上帝ê指示,去khiā tī耶路撒冷圣殿ê庭园,传达上帝beh伊讲ê信息hō͘进出圣殿ê犹大人民听。伊ài犹大人民听从上帝ê话,若无,圣殿会亲像以前以色列人民ê宗教圣地示罗仝款被上帝拆毁。M̄-koh当chiah-ê犹大ê权贵阶层听tio̍h先知耶利米传出chit种信息后,反应真激烈,in kā伊掠,然后开庭审问,并要求kā先知耶利米判处死刑。

第1到3节,「约西亚ê kiáⁿ约雅敬做王开始」,「约雅敬」是tī主前609 á是608年做王统治犹大,伊原本ê名叫以利亚敬,被当时宗主国埃及国王尼哥改名成做约雅敬。伊总共统治犹大国长到十一年。Tī chit段统治期间,伊确实是背负了庞(pâng)大ê国家战争债务,m̄-koh伊并无怜悯人民ê苦难,却是加重人民ê税赋(参考列王记下廿三:33—35)。Koh khah恶质ê是伊挪用了chiah-ê庞(pâng)大税收建造华丽ê宫殿来自己享受(参考耶利米书廿二:13—14、17)。伊「仿效伊祖先ê pháiⁿ模样,做上主看做邪恶ê事」(参考列王记下廿三:37)。会「做邪恶」ê tāi-chì ê王,chiah会对上帝奴仆所传出ê信息不理睬,甚至会对上帝ê奴仆采取严厉制裁ê态度。因为án-ne,上帝ài先知耶利米去「khiā tī圣殿ê庭园里」,然后对tio̍h「tùi犹大各城镇来礼拜」ê犹大人民传讲上帝ê信息,并且是「一句mā bē-tàng省略」,这是真严厉ê警语。先知耶利米讲,如果犹大人民「肯听,肯弃sak邪恶ê道路」,上帝会「取消因为in ê恶行beh加hō͘ in ê毁灭」。这ná亲像先知以西结所讲ê,上帝宁可罪人悔改而存活,mā无愿意看见罪人死亡(参考以西结书三十三:11)。

第4到5节,真清楚,犹大人民并无想beh遵守摩西ê律法,mā m̄听上帝奴仆先知ê苦劝。因为án-ne,先知耶利米警告耶路撒冷ê毁灭会亲像以前上帝毁灭示罗仝款,彻底摧毁耶路撒冷,hō͘伊成做各国咒骂ê城市。

第7到9节,包括「祭司、先知」在内ê犹大民众lóng听tio̍h了先知耶利米ê信息,m̄-koh chiah-ê权贵阶层ê「祭司、先知」就掠tiâu先知耶利米,对伊咆哮,讲伊「该死」,讲伊预言上帝beh摧毁耶路撒冷圣殿ê事,明明是就是一种咒骂,因为án-ne,群众就án-ne包围了先知耶利米,情势有危kah性命安全之虑。

第10到11节,chit时chūn,有「犹大国ê官员听见chit项事就tùi王宫赶到圣殿」来,in tī耶路撒冷ê「新门」,mā就是「便雅悯门」ê所在(参考二十:2)开庭审理chit件案子。Chiah-ê犹大ê祭司kah众先知指控先知耶利米ê预言ē-sái民心惊恐,「应该处死」。

重新查询 专卷研经 耶利米书系列
错误回报,请联系