耶利米书 16章1节 到 16章13节   背景资料  上一笔  下一笔
Chit章thang清楚看tio̍h上帝忠实奴仆先知耶利米ê心境是án-ne孤独,其实m̄-nā是先知耶利米án-ne,真chē先知lóng是án-ne。众先知之所以感受tio̍h极大ê孤独,乃是因为in所传出ê信息lóng是kah当时社会hiah-ê人所想beh听ê无仝款。特别是每pái众先知严厉批判当时ê社会,尤其是领导者ê时,就会有chit种遭遇出现。Á真正先知一定会忠实tī上帝ê付托,kā上帝ê信息一五一十地宣扬出来(参考列王记上廿二:14)。只有假先知chiah会尽讲当权者欢喜听ê话,结果是加速了kui个社会ê堕落,并陷人民生活tī不安ê环境中。这mā是为甚么真实ê上帝奴仆先知,会受tio̍h排挤而hō͘家己陷入孤独ê环境中ê原因。Ná亲像先知以利亚仝款,伊面对ê乃是群体ê、御用ê四百五十名先知,以伊单独一个人ê气力beh对抗chiah-ni̍h chē ê先知,koh加上御用先知ê背后是国王teh支持,这thang想像得出伊是jōa-ni̍h-á孤独了。先知耶利米所讲ê「人人lóng诅咒我」(参考耶利米书十五:10)chit句话,mā看出伊心内中hit种极大孤独ê感受kah无奈。
Chit一章ê主要内容,是用先知耶利米被禁止结婚生儿育女来表明伊ê孤独,甚至是连一般喜庆之宴mā tī被禁止之内,作者用chit种方式说明先知耶利米被隔离,以及心内孤独ê情形。Mā用chit种方式teh表明:犹大国ê以色列人民,kā ná亲像先知耶利米被隔离出来仝款,是孤独、无助ê族群。

Chit段经文除了描述先知耶利米被上帝命令bē-tàng结婚,mā不ē-tàng为亲朋好友tú-tio̍h ê悲伤ê事举哀,同时,iáu ài伊tī国家kah同胞面临极大ê苦难中,继续真实地传达上帝beh伊传讲ê信息。上帝就是beh先知耶利米用chit种方式来形容犹大国teh beh面临ê处境,ná亲像伊所tú-tio̍h ê情况仝款。

第1到3节,「tī án-ne ê所在」,表示国家已经面临灭亡ê处境之环境中。Tī国家teh beh面临灭亡ê时,上帝ài先知耶利米「bē-tàng结婚,mā bē-tàng生儿育女」,这真清楚teh表示先知耶利米已经无法度享受tio̍h家庭所带来ê安慰kah支持,伊只有ē-tàng孤独递过一生之日。上帝是beh藉tio̍h伊独身来说明犹大国ê犹大人民会「遭遇」ê灾难。

第4节,chit节说明犹大ê灾难包括有:「疫症死亡」ê,这是teh指瘟疫,m̄-koh lóng「无人好哀悼in,埋葬in」,这有两种原因,一是死亡ê人数siuⁿ chē,差不多每一个家庭lóng有,无人有空去帮助别人(参考以西结书廿四:23)。最后只thang hō͘尸体「像肥料堆tī土脚」,「成做飞鸟行兽ê食物」。

第5到7节,mā thang参考以西结书第廿四章15到17节、22到23节等等。

为死去ê亲人举哀,这是非常基本ê生活伦理。以色列人民ê社会里,若有人来报亲友ê丧讯ê时,亲人á是朋友会马上kā家己身上ê衫裤拆裂,表示非常哀伤,然后kā粗麻制衫裤披在身上,无法度穿内衫,一定tio̍h thǹg掉脚上ê鞋á行路到丧家去。Mā tio̍h kā头巾the̍h掉,披头散发,并tī头壳顶洒灰,kah丧家同齐坐tī土脚哀伤。丧家无法度沐浴,mā不煮饭,lim食lóng由厝边á是亲友供应。Án-ne守斋时间是七工ê时间。上帝确实是决定「无koh赐平安」、「无用慈爱怜悯」对待犹大人民,这是表示上帝beh用chit种方式来表示kah in切断关系。当国家面临灭亡来临ê时,已经无任何人thang例外,「无论贫富仝款」lóng会死亡,mā是仝款,bē有人哀悼,为in哀哭。因为差不多每一个家庭lóng有人死亡,因为án-ne,无办法去「安慰」别人,mā bē有时间去为丧家准备食物kah in「同齐lim食」同齐哀伤。甚至严重到「连丧父á是丧母ê人mā无人表示同情」,chit句话tú好说明每一个家庭lóng有发生,大家lóng teh为家己ê亲人哀伤啼哭。

第8到9节,既然无法度kah哀伤ê家庭同哀伤,相对ê,就算有喜庆ê婚宴,mā仝款lóng tio̍h禁止。因为这是上帝ê惩罚,hō͘「in有生之日会亲身经历chiah-ê事」。

第10到13节,chit段经文thang对照第九章12到16节。

上帝hō͘先知耶利米知影当伊传上帝ê信息ê时,犹大人听了后会反问伊上帝为甚么会chiah-ni̍h「严厉惩罚」in?Mā会问到底in「犯甚么罪」?Chit时chūn,先知耶利米一定tio̍h清楚指出tùi in ê祖先开始,就弃sak上帝,去「服事别ê神明」,「m̄听从」上帝ê教示。Á in chit-ê代ê人比起in ê祖先是「koh khah 可恶」、koh khah「顽劣」,悖逆上帝ê行为koh khah严重。因为án-ne,上帝惩罚ê方式,就是hō͘ in被掠到ná「日瞑拜别ê神明」,而hit所在是in祖先mā m̄-bat去过,是一个生份ê地域。这表示上帝离in koh khah远了,in kā得bē-tio̍h上帝ê「怜悯」。

重新查询 专卷研经 耶利米书系列
错误回报,请联系