读雅各书ē-tàng清楚ê看tio̍h作者提起真chē生活层面上非常实际ê问题。Tī雅各书作者ê看法中，若是一个人讲伊信上帝，m̄-koh却无tī每工ê生活中kā伊ê信仰见证出来，chit种信仰并无实在，反tńg是hō͘人感觉只不过是嘴巴讲讲而已。伊tī chit本书信中，先tùi强调为甚么beh kā听tio̍h ê真理tī实际生活中用行动铺陈出来，续落来就讲tio̍h一个人siōng容易tī信仰上失去见证ê，就是讲话无算数。然后伊koh提起做一个人beh见证上帝ê救恩ê时，一定tio̍h会记得tùi诚实ê心开始。Tī伊ê看法里，做一个人心中怀有诡诈ê念头ê时，无论伊jōa-ni̍h-á会讲话，á是kā家己装饰得真敬虔，lóng是虚假ê，因为上帝看人ê心内。因为án-ne，做一个人beh见证福音ê信息ê时，就tio̍h tùi有真实ê心开始。有真实ê心，chiah会结出美好ê信仰果子来。

	Tī雅各书第四章，作者特别提醒两件事，一是人ê欲望问题，二是谦卑ê心chiah是真正有信心ê表现。

第1到3节，kāchit三节经文用来对照第二章14到17节，就会koh khah明白作者为甚么tī chia一开始就提起冲突冤家ê事。

「Lín中间ê冲突冤家」，chit句话已经讲出早期教会内部ê问题，信徒之间出现严重ê纷争kah bē爽快。Tī作者ê看法里，有冲突争战，是因为人ê「欲望」。Chia所用ê chit-ê「欲望」一词，是teh指放纵家己，意思是teh指一个人只想tio̍h家己ê需要，不管别人ê困难á是需要。这mā就是tī第三章16节所提起ê：「凡是有嫉妒kah自私ê所在，就有纷乱kah各种邪恶ê行为。」这欲望所表现出来ê具体行动就是「贪婪」，是teh指对物质生活方面过份倚赖，chit种人ê祈祷是无用ê，因为上帝赏赐hō͘人ê已经够额、不缺乏（参考路加福音十二：29—31）。使徒保罗讲「贪婪」等于拜偶像（参考以弗所书五：5，歌罗西书三：5）。Chit种人祈求当然bē得tio̍h真神上帝ê应允。

第4节，「不忠m̄信」，意思原本是teh指一个妇女到处kah别ê cha-po͘人苟合。圣经ê作者不时譬喻上帝kah他ê子民之间ê关系，ná亲像丈夫kah bó͘仝款亲密（参考以赛亚书五十四：5，耶利米书三：20）。因为án-ne，「不忠m̄信」是teh指弃sak上帝kah这「世界作朋友」，chia所讲ê「世界」，指ê是财富、金钱ê意思。Án-ne意思真清楚，teh说明一个只关心金钱，kā钱财当做神明一般ê供奉ê人，chit种人等于拜偶像仝款，就是「对敌上帝」，是「上帝ê敌人」。

第5节，chit节讲是引用自圣经，m̄-koh咱Tī圣经中确实chhōe bē-tio̍h「上帝安置tī咱内面ê灵有强烈ê欲望」chit句话。Chit句「安置tī咱内面ê灵」，指ê乃是上帝创造人了后，对tio̍h人吹入他性命ê气息，hō͘人成做有性命ê人。M̄-koh上帝án-ne做，是希望人ē-tàng忠实地仰赖他，遵行他ê教示。Ē-sái讲是人却弃sak了上帝ê教示，hō͘上帝艰苦心。Chit种艰苦心就是chia所讲ê「嫉妒」ê意思。因为án-ne，上帝无希望受造ê人去拜别ê神明，á是用别ê神明取代他。Chia所讲「强烈ê欲望」，是teh指上帝希望每一个人lóng有纯洁ê心灵，因为他创造人类ê时，就是赐hō͘人类一粒纯洁ê心。

第6节，tú好kah第5节成相对ê意义；第5节讲上帝是一个嫉妒ê上帝，因为án-ne，他安置tī人心内深处ê是一个嫉妒ê灵，为tio̍h beh hō͘人对他有绝对忠实ê态度。Á第6节就是说明做一个人对上帝绝对忠实ê时，chit种人一定会谦卑为怀，而上帝会加倍加添恩典tī chit种谦卑ê人身上。作者teh强调一个基本信念：做一个人jú谦卑，伊所领受ê恩典就会jú丰富。只有对上帝无够忠实ê人，chiah会想tio̍h beh koh再tùi其它ê神明身上得tio̍h koh khah chē ê赏赐，m̄-koh hiah-ê假ê神明并bē-tàng赏赐hō͘人甚么，kan-taⁿ会带领人行向灭亡而已。

第7节，chit节经文继续teh说明真正teh敬拜上帝，尊崇上帝为性命之主ê人，就应该对上帝beh绝对忠实。Chit种人会知影「tio̍h顺服上帝」，会「抗拒魔鬼」ê诱惑，án-ne，魔鬼就chhōe bē-tio̍h机会诱惑人犯罪。

第8节，chia讲beh「洁净lín ê手」，chit句话是teh指犹太人teh献祭chìn前，祭司一定tio̍h先洗手，ē-tàng kā teh-beh献祭hō͘上帝ê祭品带到祭坛顶。洗手表示洁净ê规定tī摩西律法中规定得真清楚（参考出埃及记三十：19—21，利未记十六：4）。M̄-koh tio̍h注意ê是，上帝并无重视chiah-ê看会tio̍h ê礼仪，他看人ê心内。人无法度kan-taⁿ用洗手来表明洁净，却是一定tio̍h有真诚ê心内chiah行。

第9节，作者提起tio̍h用「悲伤、哀恸、啼哭」ê方式敬拜上帝。雅各书作者认为一个人若是真正遇tio̍h了上帝ê救恩ê时，伊第一个反应就是感受家己是一个罪过真深ê人，甚至会为家己án-ne大ê罪过而感觉悲伤，哀恸、啼哭。

「悲伤」，这是teh指一个人发见家己是一个有罪ê人ê时chūn，就会为家己ê罪而感觉悲伤。

「哀恸」，这通常lóng是因为有亲人往生ê时，心中真oh过而出现ê情绪。用tī chia，是teh指一个人会因家己犯下严重ê罪，真诚忏悔ê时ê真诚态度。耶稣基督讲chit种人，会得tio̍h上帝ê安慰（参考马太福音五：4）。

「啼哭」，这是带有「同情」ê意思。当看tio̍h有人遇tio̍h苦难ê时，出tī心内ê悲悯，对苦难者发出同情ê心。

第10节，chit节mā是teh回应第6节所讲ê「上帝赐恩典hō͘谦卑ê人」。因为án-ne，只要会tī「主面前谦卑」，chit种人必定会得tio̍h上主ê「提升」。

第11节，chia讲「m̄-thang互相批评」，chit-ê「批评」ê字，希腊文是「katalalete」，是teh指故意在别人ê背后讲不实在ê话。Án-ne就包括两个层面ê意思，其一是teh指讲话不诚实，二是故意陷害人。因为这是违背十诫中ê第九诫「bē-tàng做假证陷害人」（参考出埃及记二十：16）。Chit种行为是上帝所无欢喜、讨厌ê（参考诗篇一○一：5）。

第12节，作者tī chia真清楚提起一个信仰上基本ê观念：性命ê主权tī上帝。任何人都无权力主宰别人ê性命。因为性命tùi上帝来，无人有资格对别人ê性命造成伤害。雅各书ê作者认为故意用无正确ê话伤害别人，这kah对敌上帝是仝款ê严重。

第13到16节，chit段经文读起来真有「智慧文学」ê韵味。像第14节chit种对性命ê观点，tī每一个民族中是不时会听tio̍h ê俗语。人thang为未来提出一个规划，m̄-koh无人ē-tàng把握讲一定会达tio̍h愿望，因为决定未来ê主权是tī上帝，m̄是tī人ê手中。

第14节讲人ê性命「不过像一层雾，出现一下á就phah m̄见去」，tī约伯记中mā有类似chit种句话（参考约伯记七：6—7、十二：10），诗篇chit种句话mā bē少（诗篇三十九：5—6、六十二：9、九十：4—6、一四四：3—4）。

第17节，tio̍h注意「善」chit-ê字，是表示「上帝ê旨意」。换句话讲，做一个人知影应该遵行上帝ê旨意去做，却无愿意án-ne遵行ê时，he就是故意犯罪。先知弥迦特别提醒以色列人，无论用甚么方式献祭，á是献祭jōa-chē，lóng bē是上帝所重视ê，上帝欢喜他ê子民遵行他ê旨意（参考弥迦书六：6—8）。