雅各书 1章19节 到 1章27节   背景资料  上一笔  下一笔
作者tùi chit段开始beh进入伊写本书信ê主要论述,就是信仰需要用实际ê行动表达出来chiah是正确ê。因为án-ne,听道kah行道是一体ê两面,无法度分开。

    第19节,chit节thang参考箴言第十七章27节。类似án-ne劝人寡言、多听ê句话,tī箴言中真chē(参考箴言十:19、十五:1、十七:27—28)。雅各书作者后来tī第三章1到12节中,有koh khah详细ê论述。

    第20节,「上帝公义ê目的」,意思是teh指上帝ê疼,特别是teh指第27节所讲ê,关心hit-ê些孤儿寡妇。M̄-koh人ê「受气」并无ē-sái上帝ê疼加添,因为「受气」是teh指批评、责备,chiah-ê对tī显示上帝眷顾hiah-ê生活tī困苦中ê人ê慈爱,一点á帮助mā无。

    第21节,「挣脱」,表示替换ê意思。作者tī chia讲beh kā「一切不良ê习惯kah邪恶ê行为」,改用「顺服ê心来接受上帝种tī lín心内ê道」。前者是因为无上帝ê「道」,chiah会有「不良ê习惯kah邪恶ê行为」。后者讲用顺服来接受上帝ê「道」,这「道」是teh指天国之「道」,是上帝ê信息,上帝ê话。这真清楚teh表示:只有上帝ê话ē-tàng改变人ê心思意念,ē-tàng改变人ê行为准则。

    第22到25节,chit段经文真清楚teh表明一个重要事实,就是若是认为「只要听道就有够」,chit种讲法kah想法lóng是一种「欺骗」,就是不实在ê事。Á是beh kā听tio̍h ê道实践出来chiah是真正。若是无án-ne去遵行,就kah-ná人teh看「镜子」仝款,离开镜子了后,就看bē-tio̍h「家己ê面目」,bē记得「家己ê长相」à。

    「严密」koh「完整」,而且会hō͘人「得自由ê法则」,若是chiâⁿ实「谨守」,chit种人是「切实行道ê人」,chit种人tī伊所做ê事顶面「一定蒙上帝赐福」。

    耶稣基督bat教导门徒讲「只有实行我天父旨意ê」人,ē-tàng进入上帝ê国(参考马太福音七:21)伊koh讲:「遵照上帝旨意ê 人就是我ê 兄弟、姊妹kah 老母。(全民版)」(马可福音三:35)

第26到27节,chia作者为虔诚下了定义,第一,就是知影会「管束家己ê嘴舌」,chit-ê意思真清楚,就是诚实。若是无án-ne,就m̄是真正虔诚。第二,是对人ê苦oh得有爱ê行动,特别是对hiah-ê「孤儿寡妇」会hō͘ in「照顾」。第三,是知影「保守家己无受世界ê腐化」。使徒保罗mā tī罗马书第十二章2节án-ne讲:「M̄ -thang koh hō͘ 世俗同化,tio̍ h hō͘ 上帝 kā lín 改造,心志得 tio̍ h 换新,hō͘ lín thang 明白甚么是上帝ê 旨意,甚么是良善、纯全,上帝所欢喜ê。(全民版)」





重新查询 专卷研经 雅各书系列
错误回报,请联系