以赛亚书 36章1节 到 36章12节   背景资料  上一笔  下一笔
以赛亚书tùi chit章开始,一直到第三十九章止ê经文,lóng是teh描述主前705年到701年chit段时间,亚述帝国皇帝西拿基立率领军队攻打耶路撒冷ê经过。

Chit段经文kah列王记下第十八章13节到第二十章19节ê记载内容,thang讲仝款,而且仝款ê历史资料mā记载tī历代志下第三十二章,chit三所在经文lóng是记载亚述帝国准备攻打耶路撒冷,以及希西家王时代ê结束。其中以历代志下ê资料差异siōng大,该书记载有关希西家王ê记事,是tùi第廿九章记载到第三十二章,tī chit四章ê篇幅中,历代志作者对希西家王ê改革宗教信仰有真koân ê评价。

Chit段经文描述ê时间背景是tī希西家王执政ê第十四年,亚述帝国军队渐渐逼近南国犹大首都耶路撒冷。这mā讲出第廿九到三十章ê经文背景,先知以赛亚一再警告南国犹大ê领导者,m̄-thang去kah埃及联盟,tio̍h相信上帝、óa靠上帝,chiah是正途。Chit段经文记载亚述ê军队已经兵临城下,对耶路撒冷造成极大ê威胁。

第1到2节,「希西家王在位ê第十四年」,希西家王在位期间是tùi主前715到686年。因为án-ne,「在位ê第十四年」,就是主前701年。Chit位「亚述皇帝西拿基立」是tī主前705到681年执政。伊率兵「攻打犹大ê设防城镇,kā它占领」了后,就企图占领耶路撒冷。Chia所讲ê「设防城镇」,意思是teh指卫星城镇。其实,tī伊ê部队尚且iáu teh「拉吉」ê时chūn,希西家王就差派特使去求kah,答应hō͘ in「一万公斤ê银á kah一千公斤ê金子」。为tio̍h beh筹募这笔庞(pâng)大ê战争赔偿费,希西家甚至kā圣殿中,镶tī墙壁kah柱á顶ê黄金lóng刮了落来送去。M̄-koh真显然ê,亚述皇帝西拿基立并无因为án-ne而满足。伊下令大将率领tī「拉吉」ê部队去进攻「耶路撒冷」要胁「希西家投降」。

第3到6节,为tio̍h beh解决耶路撒冷被围困ê危机,希西家王派出三位亲信大臣去kah西拿基立谈判。M̄-koh亚述大将质问犹大希西家王派出来ê三位代表讲:希西家王为甚么iáu不投降?伊用轻视而且无客气ê语气,指出犹大ê「军备kah实力」lóng无够额来阻挡亚述大军。伊甚至语带威胁地讲:犹大iáu不投降,等于是想beh「反叛」亚述。伊mā清楚指出,去向埃及求助而不走chhōe上帝ê庇护,chit种念头kah举动,lóng是非常愚戆ê政策。chit-má亚述兵临城下,埃及无可能来救助teh beh被攻破ê耶路撒冷。就算埃及想beh来救助,mā像用「一条破裂ê芦苇当拐杖」,一点帮助mā无,因为自身难保ê埃及,ná亲像已经有破损受伤ê芦苇仝款ê脆弱,却想beh用来当扶持用ê拐杖,ná明明是ná亲像痴人讲梦话仝款。

第7到10节,chit段经文是亚述大将继续对犹大ê三位官方代表讲话。亚述大将讲出严重藐视全能上帝ê话,而这mā是亚述帝国就án-ne跋一下peh bē起来ê主因。Chit段经文中,提起几点:一是希西家王进行ê宗教信仰改革是无用ê。二是伊以非常轻视ê态度看待希西家王,讲伊治理之下ê犹大,根本就无任何军事力量。三是犹大siōng大ê军官lóng khah输亚述小兵ê能力。四是自认有上帝亲自呼召来攻打犹大,beh毁灭犹大chit-ê国家。

第11节,chit节kah列王记下第十八章26节仝款。Chia提起「亚兰语」,这是当时通用ê外交kah商业ê国际语言,就ná亲像今á日ê英语仝款。Á chit节ē-tàng看出当时亚述大将ē-tàng使用「希伯来语」,这thang看出当时亚述帝国的确是有实力ê大国。亚述大将故意用「希伯来语」对chiah-ê代表讲话,主要ê目的就是beh hō͘耶路撒冷城内kah看守城墙ê军兵听tio̍h,hō͘ in心生惊惶,tī正式开战前,就先hō͘敌人ê军心溃散,mā是一种心理战术。

第12节,chit节清楚讲出chit位亚述大将ê用意,就是beh hō͘犹大人民心生惊惶,而chit种方式mā是hō͘犹大ê外交代表无法度隐瞒任何谈判内容。伊讲beh hō͘耶路撒冷城内所有ê人lóng「食家己ê粪,lim家己ê尿」,chit句话已经teh暗示:若无赶紧投降,继续án-ne落去ê结果,就是会发生粮荒,致使人民iau饿难耐,大家只好用家己ê「粪」kah「尿」来充饥解渴。伊án-ne讲,主要原因是伊知影希西家王kā耶路撒冷城内ê犹大人民讲,上帝会救in脱离亚述帝国ê侵犯。因为án-ne,chit位大将án-ne讲就是beh hō͘ in m̄信任希西家王,认为希西家王kan-taⁿ会害死in,hō͘ in饿死、渴死(参考历代志下三十二:11)。

重新查询 专卷研经 以赛亚书系列
错误回报,请联系