何西阿书 9章1节 到 9章17节   背景资料  上一笔  下一笔
Tī前一章先知何西阿提起以色列「掖种ê是风,收割ê是暴风」(参考八:7),这是上帝对in背叛「约」ê严厉惩罚。上帝会án-ne惩罚in,主要是in kā原本敬拜上帝ê祭坛,lóng变成拜偶像ê所在,hō͘本来建造ê祭坛,lóng成了犯罪ê记号。这就是先知何西阿所指责ê「祭坛jú chē,犯罪ê所在mā jú chē」(参考八:11)。以色列人民因为tī迦南地学习tio̍h拜巴力神明,误认巴力ē-tàng帮助in ê土地增加生产,hō͘ in tī物质生活上koh khah富裕。M̄-koh in chit种行为就kah其它列国人民ê态度仝款,会失去上帝拣选in ê神圣意义。上帝绝对bē随在他拣选ê子民继续án-ne悖逆而去,一定会严厉惩罚in。

无论是先知何西阿á是阿摩司、弥迦等,lóng仝款提出警告,就是人心ê堕落并无会因为经济、物质生活ê富裕有改善,颠倒ê,往往是因为经济繁荣所带来富裕ê物质生活,加快人心败坏ê速度,chit点chiah是值得大家省思ê所在。

第1节,tio̍h以色列人民「m̄-thang狂欢,mài kah异教徒仝款庆祝lín ê节期」,为甚么先知何西阿会传出上帝chit种话语?因为早期社会siōng可能举行节期庆祝、狂欢ê,应该是kah收割后ê收藏节期(指Tòa棚节)有关。利未记第廿三章39到40节记载有关以色列人民举行Tòa棚节ê时,除了有各项敬拜、献祭ê礼仪之外,mā tio̍h有「欢欣庆祝」ê活动。而且这庆祝活动长到七工之久。现在何西阿传出上帝ê信息,讲不tio̍h以色列人民koh再庆祝Tòa棚节,因为已经无koh是以前ê样式,却是参杂迦南地人祭拜巴力神明ê活动tī内面。有ê甚至是根本分bē清楚到底是teh向上帝献上感恩,á是teh对巴力神明献祭。Á迦南人teh庆祝祭拜巴力神明ê时,不时有ê方式之一,就是进行男女欢爱。In是利用chit节期hō͘男女青年做伙进行选择喜爱ê对象,mā因为án-ne teh庆祝节期活动中不时会有淫乱ê行为发生。因为án-ne,当有异教徒入来参加这庆祝节期活动ê时,真可能就陷入了chit种危险,hō͘以色列ê cha-bó͘-gín-á「像妓女」仝款,tī巴力神明前庆祝了后kah异教徒苟合,有淫乱行为出现。

第2节,圣经真清楚kā咱讲,万物tùi上帝来ê创造kah赏赐,因为án-ne,应该感谢ê对象是上帝。M̄-koh以色列人民teh进入迦南地了后,跟tòe当地原住民学习拜巴力、向巴力献祭,因为án-ne先知何西阿提醒以色列人民知影:上帝赏赐kā in赐福五谷、杂粮、美酒等民生用品,in既然the̍h chiah-ê去拜巴力神明,讲he是巴力神明所赏赐ê,上帝必定bē hō͘ án-ne恶质ê信仰行为继续落去,他一定会采取行动,有一工会kā所有ê恩赐收tńg来。Án-ne,in bē koh再有「五谷kah橄榄油」,以及「美酒」thang用。

第3到4节,真清楚提起以色列人民会hō͘亚述帝国侵犯,并且会被带去亚述帝国做奴隶。所谓「beh tī亚述食无清气ê食物」,意思就是以色列人民kā成做亚述帝国ê奴隶,食亚述主人提供ê食物。In会亲像以前以色列人民ê祖先tī埃及做奴隶仝款,会失去自由,只有ē-tàng tī哀哭中过日子。

Koh讲,以色列人民如果被俘虏到亚述帝国去做奴隶,食ê方面就无法度随心所欲,只有ē-tàng听从主人ê指示。亚述人民当然会ài chiah-ê以色列人民去做平时一般人无jōa想beh做ê事,包括运送尸体,以及死去ê牛、羊等动物ê尸体。M̄-nā án-ne,亚述人iáu会kā chiah-ê tī以色列人民看起来是属tī无清气ê食物kā in赐福食。In如果m̄食,会饿;beh食,却是宗教礼仪上属tī无清气ê食物。问题是:in恐惊连tio̍h讲「不」ê机会mā无,原因真间单,如果m̄食,饿一pái、二次,á是允准以,总无法度ta̍k工腹肚挨饿。Á chiah-ê属tī无清气ê食物,koh khah无法度用来献祭。

第5节,「上主ê节期」,指ê就是「Tòa棚节」ê节期活动。Chit-ê节日是以色列人民三大节期之一(另外两个节期是Pôaⁿ过节、五旬节)。Tòa棚节是teh庆祝收割后举行,mā是以色列人民siōng kah意ê节期,因为chit节期是一个庆祝、欢欣ê节期(参考利未记廿三33—43)。先知何西阿tī chia提出chit种反问:如果有一工in亡国了,被俘虏到亚述去了,án-ne,tī chit庆祝ê节期内,「in ē-tàng做甚么?」其实甚么lóng无法度做。

第6节,提起即使in有办法逃到埃及去避难,m̄-koh先知何西阿却指出:直到in死去,mā是无法度tńg来到家己ê故乡,只有ē-tàng客死异乡,甚至埋葬tī异乡。Chia ê「摩弗」,是teh指埃及一个坟地ê名。换句话讲,先知何西阿已经teh警告in,亡国ê日子会来临,而且会有一段真长ê时间,m̄是短短ê几年而已。In ê「家园,储藏财宝ê所在,kā长满刺phè杂草,这意思是国家灭亡了后,故乡土地kā成做废墟,荒凉而无koh有人khiā起、管理。

第7到9节,chit段经文讲出上帝忠实仆人先知ê境遇,就是除了被排斥外,mā会遇tio̍h杀害。

先知何西阿tī chit短短三节经文中,宣布上帝「报应」以色列人民ê「日子到à」,就是头前所讲ê,会沦亡tī亚述帝国之下。因为以色列人民m̄-nā不听从先知ê警告,甚至叫伊「大阿西」,讲伊是「 疯子」、痛恨伊,甚至iáu会设法beh谋害伊。先知何西阿讲上帝指派伊做他ê「代言人」(chit-ê词表示「先知」ê意思)m̄-koh无论伊到「甚么所在」,hit所在ê人「lóng tio̍h谋害」伊,甚至连tī敬拜上帝ê地方mā无法度佳哉免得。Chia特别提起「以前tī基比亚ê时仝款」,chit句话ê背景kah士师记第十九到廿一章ê记载有关;he是讲述有一个利未人ê细姨,被便雅悯族ê基比亚人轮暴致死ê事件,引起其他以色列十一支派人民联合起来攻打便雅悯族人。Mā因为chit-ê事件,便雅悯族差一点á就被消灭。先知何西阿提起这事件为例,主要是tī提醒以色列人民,杀害上帝ê先知、仆人,只有带来koh khah大ê惩罚,而且严重ê时,iáu会有被消灭ê可能。

第10到12节,短短ê三节经文,却讲出两种极大ê对照景象;先知何西阿指出过去以色列kah上帝ê关系是亲密切bē-tàng分割,ē-sái讲是现在kah上帝之间关系却已经恶化到à极点。

Chit句「旷野中发现葡萄」,kah民数记第十三章ê历史背景有关;当以色列人民准备ài进入迦南地chìn前,摩西bat派出探á先去看māi,想beh事先知影到底上帝所讲ê流奶kah蜜之地是一个怎样ê所在。Chiah-ê人tńg来ê报告讲:「In 来到以实各ê 山谷,tùi hia锉葡萄树一支,顶面有一葩葡萄,两人用杠á 来扛,koh 带kóa-á 石榴kah 无花果来。 (全民版)」(民数记十三:23)in看tio̍h chiah-ni̍h大串ê葡萄,确实是hō͘人振奋。

M̄-koh另外一面,m̄-koh以色列人民一到「比珥山」开始拜巴力,chit件事ê记载thang参考民数记第廿五章1到5节ê记载,比珥山是设tī摩押ê某一个座山,chia ê巴力神像siōng出名。以色列人民来到什亭谷扎营ê时chūn,kah摩押ê cha-bó͘人行淫,并且接受hiah-ê摩押cha-bó͘人ê邀请参加in祭拜巴力神明,地点就是tī出名ê比珥山(民数记用「比珥」)地方。Chit件事hō͘上帝非常痛恨,摩西为tio̍h息上帝之怒,kā chiah-ê kah摩押cha-bó͘-gín-á行淫ê以色列领袖判处死刑。上帝ê惩罚就是kā in ê光荣the̍h掉。所谓「光荣」,tī以色列人民看起来就是,kiáⁿ孙像天顶ê星hiah-nih-chē。有能力繁衍下一代,就是性命siōng大ê光荣。先知何西阿讲上帝beh惩罚以色列人民,严重ê程度差不多是到à断绝in ê后代,hō͘ in无法度继续存在chit-ê世界。

第13到14节,讲出以色列人民被掠到亚述去做奴隶ê时,妇女会tú-tio̍h ê惨痛经历。M̄是被杀害,就是hō͘强暴,若beh án-ne,不如无有娠会khah好。

第15节,「吉甲」,这是以色列人民第一位君王扫罗被先知撒母耳膏立为王ê所在。Chit-ê所在mā是以色列ê宗教圣地。M̄-koh扫罗后来一方面拒绝听从上帝ê命令,另外一方面却ài tī吉甲设祭坛,献siōng好ê牲祭hō͘上帝,结果先知撒母耳责备(参考撒母耳记上十五:22)。因为án-ne,吉甲虽然是北国以色列ê宗教圣地,却mā常常常hông当做背叛上帝命令ê记号。

第16到17节,lóng提起上帝bē koh再是以色列人民ê上帝。因为上帝beh拒绝承认以色列人民是他ê子民。无上帝ê眷顾,等于无性命ê保障仝款,生存就会有危险。Chia特别强调失去上帝ê疼,就ná同树无根仝款,真紧会枯干死亡。


重新查询 专卷研经 何西阿书系列
错误回报,请联系