何西阿书 8章1节 到 8章14节   背景资料  上一笔  下一笔
先知何西阿讲:上帝kah人之间ê关系是形同「夫妻」一般ê亲密切bē-tàng分割。因为án-ne,做一个人对上帝不忠ê时,就表示对上帝不诚实,chit种人,即使用各种kāu枝叶ê敬拜礼仪,mā是枉然,因为这m̄是上帝所喜爱ê方式。先知何西阿就bat kā以色列人民讲,m̄-thang想beh用献牲祭hō͘上帝欢喜,因为上帝根本就无ài人án-ne回应他。上帝所喜爱ê,就是以色列人民有「坚定ê疼」,永远bē改变、而且用忠实ê疼回应上帝对in拣选ê疼。可能是主前第八世纪ê北国以色列,人民lóng有chit种心态,就是想用各种祭典礼仪来hō͘上帝欢喜,m̄-koh另外一方面却走去拜偶像,而且tī社会生活上根本就无活出「圣洁」ê样式,án-ne m̄-nā无见证出上帝ê疼,反tńg亵渎了上帝「圣洁」ê名。因为án-ne,先知以赛亚、阿摩司、弥迦等人lóng为chit种背叛上帝之行踏,提出严重ê谴责(参考以赛亚书一:11—17,阿摩司书五:21—24,弥迦书六:6—8)。

第1节,「吹警号」,古早时看守城墙ê士兵看tio̍h有敌人来临ê时,一定tio̍h吹警号,负责吹警号ê人就是「守望者」(参考以西结书三十三:1—10)。「敌人kah-ná la̍h-hio̍h突击」,chia先知何西阿所讲ê「敌人」是teh指亚述,它会来攻击上帝所赏赐hō͘以色列人民,并且beh占领以色列人民所khiā起ê土地,原因是以色列人民「违背」了in kah上帝之间所「订立ê约,讨厌」上帝ê教导。

第2到3节,说明以色列人民怎样背叛kah上帝之间所立ê约。一是in并无确实「认bat」上帝。Chit-ê「认bat」,指ê是ná亲像「夫妻」相好仝款,thang「同房」(参考创世记四:1)般ê亲密。Á若ài有chit种亲密关系,基本ê要件是彼此之间一定tio̍h绝对忠实,否则无可能ê。二是以色列人民「拒绝良善」,这是teh指in并无照上帝ê教示,好款待hiah-ê贫困孤寡ê人,颠倒地,in欺负chiah-ê生活贫困ê人。只知影累积财富tī家己ê身上,甚至为tio̍h beh掠夺koh khah chē ê财富,无惜kā困苦无法度还债务ê sàn-chhiah人卖做奴隶(参考阿摩司书二:6—8,弥迦书二:1—2)。

第4节,已经讲出tùi耶罗波安二世死后ê北国以色列政局,确实是一个动荡不安ê时代,tī短短ê二十年间,就发生五次军事政变,而且每pái政变lóng是用谋杀国王篡夺王位ê方式,tùi列王记下第十五章thang看tio̍h chit种历史背景。Tùi耶罗波安二世死后,伊ê kiáⁿ撒迦利亚续接王位chiah不过半年就被沙龙谋杀;沙龙mā只做一个月ê王就hō͘人谋杀,刣伊ê是米the̍h现;伊为tio̍h巩固谋杀得来ê政权,the̍h「三万四千公斤ê银á」hō͘亚述皇帝提革giú・比列色,请求亚述保护伊。然后伊ê kiáⁿ比加辖继承王权。M̄-koh伊统治ê时间mā只有一年而已,就被比加谋杀夺去王位;然后是何细亚mā用仝款方式谋杀了比加,篡夺王位。M̄-koh in都无照上帝ê旨意形式,lóng是拜「用家己ê金银铸造」ê「偶像」,结果为北国以色列带来灭亡。因为人民lóng跟tòe学习弃sak了上帝。

第5到6节,清楚讲tio̍h以色列人民拜「金牛像」,表示in已经kah迦南人学习信仰,认为「牛」是帮助in农作物增产ê神明,因为án-ne,用金子á是银á铸造金牛敬拜,而这是tùi开国之君耶罗波安就开始了(参考列王记上十二28)了,而且是后代君王lóng跟tòe学习。

第7节,有两句流行tī当时ê俗语。

第一句是「掖种ê是风,收割ê是暴风」。「风」,这tī智慧文学内是代表「bē稳定」、「白做无功」ê意思。「暴风」,就是比一般ê「风」koh khah高层次。换句话讲,以色列人民m̄-nā得bē-tio̍h,iáu会收tio̍h koh khah大ê灾难如饥荒、欠收。

第二句俗语是「无结实ê麦穗做无成面包」,这是teh指严重欠收ê农庄景况。「无结实ê麦穗」,这是麦á teh成长过程中得tio̍h ê病症,致使麦á无法度结成饱穗。

先知何西阿就是beh指出北国以色列ná亲像有病ê麦穗仝款,无法度像作穑人期待ê收成,到最后chiah-ê无结实ê麦穗,只有ē-tàng用来做堆肥,甚至tio̍h用火烧成灰掖tī麦田中做肥料。先知何西阿指出ê现象koh khah惨,就是无结实ê麦穗已经无法度提供hiah-ê人食物ê需要,而即使有一点点á thang食ê麦穗,mā为tio̍h beh向亚述国进贡,致使已经凄惨ê iau饿景况雪上加霜。

第8节,「破裂ê瓶子」,意思是「lóng无路用」,表明已经无存在ê价值à。

第9节,「像倔强ê野驴á任性行家己ê路」,chit句话是teh描述北国以色列根本就不听从上帝ê旨意,kan-taⁿ想beh家己ài怎样行,就怎样行。所谓「野驴á」,就是bē合群、m̄听主人指挥ê驴á。本来驴á是真温驯ê动物。现在变成野驴á,就是teh指无法度驾驭ê驴á,会四界乱走、跳、撞,结果受伤koh khah严重。

第10节,结果就是「当亚述王压迫in ê时chūn,in就beh食尽苦楚」了,因为in m̄听主人ê话,kan-taⁿ会沦落到凶悍ê亚述王手上。

第11节,是chit章经文ê中心,讲述北国以色列真正ê问题是:当国家陷入危机ê时chūn,in从来m̄-bat考虑、mā无想tio̍h走chhōe上帝ê赦免kah怜悯,颠倒ê,拜偶像ê风气反tńg koh khah兴盛。In认为拜巴力jú普及,希望就jú高。一代传一代,传到落尾,北国以色列lóng变成敬拜巴力神明ê祭坛à。甚至iáu kā上帝ê仆人先知刣到只chhun先知以利亚一人(参考列王记上十九:10)。

第12节,讲上帝为以色列人民「写落来真chē教示,in却认为怪异而拒绝」,意思是teh指上帝一再想出所有ê办法beh教导以色列人民该怎样行,而且是写得非常清楚。M̄-koh,in lóng一再拒绝。

第13节,mā就是第六章6节所提起ê,上帝并无欢喜人用献牲祭ê方式来表达对上帝ê疼,上帝所喜爱ê,是人真正「认bat」他。先知何西阿tī chia明白指出,以色列人民献牲祭并m̄是真正beh敬拜上帝,却是想贪食chiah-ê献祭ê肉。甚么人会得tio̍h chiah-ê献祭ê肉?当然是祭司。换句话讲:祭司鼓励人民献祭,并且讲了真chē关系献祭jú chē,上帝jú会祝福等类似ê话,因为án-ne,人民烧热衷tī献祭,就是想beh hō͘上帝欢喜,以求得koh khah chē ê祝福。其实是众祭司贪爱chiah-ê财物,这就是先知何西阿一再指出ê,以色列人民并m̄是真正「认bat」上帝。先知何西阿甚至警告chit种信仰态度,m̄-nā换bē-tio̍h上帝祝福,颠倒ê,kan-taⁿ会带来koh khah惨重ê惩罚,因为上帝beh「Kā in遣tńg来埃及」,hō͘ in重新沦为他国ê奴隶,ná亲像in祖先tī埃及做奴隶ê日子仝款。

第14节,「宫殿」、「城堡」等,chiah-ê lóng teh显示财富kah国防军力,m̄-koh无论是jōa-ni̍h-á堂皇ê宫殿á是jōa-ni̍h-á坚固ê城堡,若无上帝看守,这一切lóng会hō͘摧毁成灰。

重新查询 专卷研经 何西阿书系列
错误回报,请联系