Chit章主要teh说明tńg去故乡耶路撒冷ê犹大人民，in怎样重新开始敬拜ê礼仪。无圣殿ê日子，in先tùi起造祭坛开始，mā就是先tī一个简单ê所在开始敬拜上主，m̄-koh一切献祭礼仪lóng遵照摩西律法ê指示。

第1到2节，「七月」，这是teh指主前537年，mā就是in回乡ê hit年。In已经回乡，而且已tī家己ê家乡安顿了后，就「同心一意」去耶路撒冷聚集，为tio̍h是beh讨论有关重建圣殿ê事。当in聚集后，就tī耶书亚、所罗巴伯等领袖ê带领下，决定先起造祭坛敬拜上帝。

第3节，这是比较困扰ê问题，m̄知为甚么in会「惊惶当地ê居民」？所谓当地ê居民，就是hiah-ê原住民，mā就是早to̍h tī in chìn前就khiā起tī迦南地ê人，in后来因为以色列人民攻入，并且占领迦南地，而成做奴隶，á是hō͘ in变成「顺民」。M̄-koh因为巴比伦帝国ê侵入，hō͘ in成做被「解放ê子民」。Taⁿ看tio̍h in tńg去，是m̄是对in抱tio̍h报复之心？有可能是in过去无好款待原住民，chit-má家己mā成做波斯统治下ê「顺民」，地位仝款，惊惶就koh khah明显。因为长到半世纪，in ê身分是hō͘巴比伦俘虏ê奴隶，地位显然比chiah-ê无被俘虏ê原住民低。另外一点，chiah-ê人mā可能m̄是迦南地ê原住民，却是被亚述帝国á是巴比伦帝国tùi外地引入来，beh kah以色列民族「通婚」ê族群，想beh藉这消灭以色列民族家己认为是「圣洁子民」ê优越感（参考十：2—4）。

第4到6节，chit段经文讲回乡了后ê以色列人民，in lóng真敬虔地遵守摩西律法所规定ê礼仪守节期，而且mā照规定献祭。虽然in iáu未开始建造圣殿，m̄-koh已经有祭坛，就先tùi献祭ê事办理，一点mā不含糊。

第7到9节，chit段经文描写回乡ê以色列人民开始进行建造圣殿ê工程。因为建造圣殿乃是非常神圣ê大事，因为án-ne，包括祭司、利未人lóng全部投入建造圣殿ê计画。而且是所有二十岁以上ê利未人lóng被派来监督重建圣殿ê工程。

Chit pái建造圣殿ê地点就是tī原本圣殿ê所在，mā就是tī原址重建，而且以当年所罗门建造ê圣殿规格，当做koh一pái重建ê根据。第7节讲in进口黎巴嫩ê香柏树，kah所罗门当年仝款，in用民生物件向泰尔kah西顿人换来黎巴嫩ê香柏木，然后经过海运辗转经过约帕运到耶路撒冷圣殿ê所在地址，可见建造圣殿ê工作必定需要一段真久长ê时间chiah ē-tàng完成，除了先进行奠基工作外，koh来就是久长ê施工。M̄-koh拖延圣殿ê重建是无好ê现象，tùi先知哈该ê作品就thang看出chit种问题（参考哈该书一：2—5）。

第10到11节，记载圣殿建造是tùi奠基礼拜开始，礼拜是非常隆重地照大卫时代传落来ê o-ló上帝之礼仪方式举行。

第12到13节，chit两节thang看出in渴望重建圣殿ê迫切kah使命感。特别是对tī hiah-ê被俘虏ê人，尤其是bat亲目见证过去圣殿荣耀ê老年人来讲，taⁿ koh一pái看见重建圣殿工程开始，必定感触真深。对chiah-ê人来讲，重建圣殿mā是一种赎罪ê心，in希望ē-tàng因为án-ne hō͘ kiáⁿ孙tī信仰上ê态度ē-tàng koh khah敬虔，mā期待ē-tàng因为án-ne得tio̍h上帝ê怜悯，脱离伊族顺民ê身分。