以斯拉记 2章1节 到 2章70节   背景资料  上一笔  下一笔
Chit章主要是记录tùi巴比伦tńg去故乡耶路撒冷kah犹大ê宗族名单总人数,这第一批人数共计有四万二千三百六十名。另外iáu有男女奴仆是七千三百三十七名,以及男女歌手二百名。Tī尼希米记第七章mā有一份仝款ê名单。不过两份名单中ê领袖人物无仝;tī以斯拉记只记载十一名,尼希米记则记载十二名,有意表明he是「十二支派」ê意思。Koh讲,chit份名单所提供ê人数mā kah尼希米记第七章所提供ê数目无仝。

第1到2节,tùi chia看tio̍h真chē人tùi开始就准备回乡。Chia mā提供了所罗巴伯等十一位领袖人物ê名单。若是对照尼希米记第七章7节ê名单,mā á是发见有差别,而且尼希米记提供ê名单是十二名,多了一位「拿哈玛尼」,其他人名ê差别,真可能是kah拼音ê方式有关。

第3到20节,chit份名单主要是用家族单位记录落来参与回乡行列ê人数。

第21到35节,chit份名单是用祖籍,mā就是khiā起ê城市当做登录基准。

第36到54节,chit段真重要,说明回乡行列中,有一阵人是专为tio̍h重建圣殿而加入。In是祭司kah利未族人,以及圣殿ê工别人族。Thang án-ne了解:kui个亡国事件所beh说明ê意义是弃sak上帝所带来ê结果。因为án-ne,回乡siōng重要ê工作之一,就是beh重建信仰。Á tī in看起来,重建信仰ê第一步就是重建耶路撒冷圣殿,hō͘伊成做敬拜ê中心。希望透过圣殿,koh一pái连结以色列民族,并且tńg来到上帝ê面前。

第55到58节,chia特别提起「所罗门奴仆」ê宗族,以及「圣殿工人」ê后代,kā chit两族群连结做伙,原因是当以色列人民进入迦南地了后,无消灭ê迦南人。Chiah-ê人包括有亚摩利人、赫人、比利洗人、希未人,kah耶布斯人等,所罗门kā in徵召当劳工,参与建造耶路撒冷圣殿ê工作(参考列王记上九:20-21)。Chiah-ê人真可能lóng是怀有特别ê技能。人数有「三百九十二人」。

第59到60节,有趣味ê是tī chia有一阵人,in是「无法度证明家己是以色列人ê后代」。M̄-koh却参与犹大人民回乡ê行列,这真亲像当年出埃及ê时,mā有一阵外族人kah以色列人民同行(参考出埃及记十二:38)。Á chit-má chiah-ê人共计有「六百五十二名」。

第61到63节,chit段经文是讲tio̍h有关一kóa chhōe bē-tio̍h族谱来证明in是属tī祭司家族ê人,in是哈巴雅、哈哥斯、巴西莱等。因为án-ne,无法度参与祭司ê工作。因为摩西律法有真严格规定,「若m̄是亚伦ê后代绝对bē-tàng到祭坛向上主烧香」(参考民数记十六:40)。因为tī摩西时代,bat发生过「可拉事件」。等到祭司透过「乌陵kah土明」来证明in确实ē-tàng参与祭司ê行列chiah thang。

第64到67节,chit段经文除了提供总人数外,mā提供了运输用ê动物,包括马、骡、骆驼,kah驴á等。Chit对回乡交通有真大ê帮助。

第68到69节,chia真清楚说明in tńg到了故乡耶路撒冷,而且到已经被烧毁ê圣殿旧址,必定是看见变成废墟ê圣殿,beh tī hit-ê荒废ê土地顶面重建圣殿,带有非常特别ê性命意义。因为án-ne,真chē族长lóng纷纷献上「自愿祭」ê礼物,回乡ê民众mā热烈参与捐献,共计有chē kah「金子五百公斤,银á两千八百公斤,iáu有一百件hō͘祭司ê礼服」等。Tùi chia mā thang看tio̍h chit群回乡ê犹太人并m̄是sàn-chhiah者,应该thang讲是经济富裕ê人。因为án-ne,chiah会有第65节所提起ê「男女奴仆」chē kah「七千三百三十七名」,占kui个回乡人数ê「四万二千三百六十名」是六比一,应该是真koân ê比例。

第70节,chit节mā大略说明回乡后,chiah-ê无仝家族kah族群,就各自tńg去家己ê故乡、城镇。Á祭司kah利未人,mā有一部ê人是tòa tī耶路撒冷。

重新查询 专卷研经 以斯拉记系列
错误回报,请联系