以西结书第四章ē-tàng清楚看tio̍h先知以西结用身躯语言，向犹大人民传达上帝ê信息。第五章继续chit种身躯语言，ài伊kā上帝hō͘犹大人民听ê信息表达出来。Chit种用身躯表达上帝信息ê方式，tī今á日大众传播发达ê时代mā真oh bat，何况是对圣经时代ê犹大人民，in koh khah无容易明白。

Chit章kah第四章仝款，m̄-koh chit章kan-taⁿ用短短4节篇幅，透过身躯语言来传达上帝信息，然后用khah长ê段落来解释上帝beh先知以西结讲ê话。

这四节是续接第四章所用ê身躯语言。Tī这短短四节经文中，上帝beh先知以西结用剃刀kā家己ê胡须、头毛剃掉，然后kā之各分做三分之一，续落来是用无仝ê方式处理chiah-ê胡须kah头毛，包括三分之一用火烧，三分之一用力跺掉，最后ê三分之一hō͘风吹掉，用chit三种无仝方式teh表示耶路撒冷ê犹大人民会遇tio̍h ê结果，意思是in会被火烧、刀刣、赶散（俘虏），koh khah惨ê是连这被赶散ê三分之一，到最后mā会hō͘上帝用「剑tui-jiok」in，这lóng teh表示kui个国家、民族会遇tio̍h严重性ê祸果。

第1节，「the̍h一把利剑当做剃刀」，若是对照以赛亚书第七章20节，上帝就bat用亚述帝国国王当做理发匠，伊beh剃掉以色列国ê胡须、头毛，kah拔尽身上ê每一条汗毛，表示是一种严厉ê惩罚、侮辱kah痛苦ê动作（参考撒母耳记下十：4—5）。Á蓄发、留胡须对犹大人民来讲，认为是一种神圣、誓约ê记号（参考民数记六：5—6a），摩西律法mā清楚规定，cha-po͘人ê胡须kah头壳顶周围ê头毛bē-tàng剃掉（参考利未记十九：27），特别是祭司koh khah是án-ne（参考利未记廿一：5）。只有tī悲伤ê时chūn，chiah会剃掉头毛kah胡须（参考以赛亚书十五：2、耶利米书四十八：37）。因为án-ne，当先知以西结听tio̍h上帝beh伊kā头毛kah胡须剃光ê时，就会感觉真好笑，左邻右舍á是街坊厝边，必定会认为伊精神不正常，会嘲（sau）笑、讥讽伊。

第2节，「城被围困ê日子」是teh指第四章4到5节所提起ê总共三百九十工，á是包含另外iáu koh khah koh加上去ê四十工。续落来继续解释第1节所提起ê ài kā剃落来ê「三分之一ê须发tī城内烧；the̍h另三分之一到城外，边行边剁碎；koh the̍h chhun落来ê三分之一掖tī空中hō͘风吹散」。这真清楚，「tī城内烧」是譬喻耶路撒冷城to̍h是会遇tio̍h ê结果（参考列王记下廿五：9，耶利米书三十九：8），chiah-ê人可能是iau饿到死，á是病死。Á hiah-ê逃离到城外ê人，m̄-nā无佳哉免得受难，却是被巴比伦ê军队tui-jiok，有ê贵族就tī城外被杀害，连国王mā是仝款tī城外被俘虏，另外有人tùi城内被掠到外面杀害（参考列王记下廿五：4—7、18—21）。

Chhun落来ê三分之一teh代表人民会受掠去，被卖到各地去做奴隶。Chiah-ê lóng是teh说明亡国ê日子kah境遇，是非常悲惨ê。

第3节，「留落来几根头毛，用你ê衣角包上」，chit句话真清楚teh说明tio̍h留落来一kóa在身上，mā thang看出其含意，表示虽然上帝tī极大ê忿怒中，m̄-koh á是带怜悯ê心，他会留落来一kóa当做「残存ê子民」，chiah-ê人mā是先知以赛亚、耶利米所讲ê「劫后余生」者（参考以赛亚书十：20、三十七：31—32，耶利米书廿三：3、三十一：2）。

第4节，chit节说明hiah-ê逃离chit pái巴比伦攻击、蹂躏耶路撒冷城ê犹大人民，并m̄是每一个人lóng会听从先知ê话，其中会有人认为只要逃到埃及去，就ē-tàng佳哉免得受难。M̄-koh先知以西结tī chia讲，若是不听从上帝ê话，就算逃到埃及去避难mā无用，因为上帝必定会追讨chiah-ê不听从他话语ê人。