以西结书 47章1节 到 47章23节   背景资料  上一笔  下一笔
以西结书第四十七到四十八等chit两章lóng提起有关土地ê问题,tī chia概略地叙述以色列民族各支派重新分配土地ê事,而且chit种分配是每一个支派lóng仝款。Chit种描述lóng隐含tio̍h一个用意:一个全新性命ê开始,是充满tio̍h上帝ê赐福。

Chit段经文讲述圣后面有泉水涌流出来,有水ê所在,就会有性命出现。就亲像上帝创造ê伊甸园仝款,有四条河流源源不断灌溉了kui个田园。当先知以西结讲出伊看见chit种异象ê时,对以色列人民来讲,有非常重大ê意义。因为水,一直是大家所渴望得tio̍h维护性命ê重要资产。因为án-ne,当先知以西结看见有泉水不断来tùi圣殿涌流出来,而且水深到一定tio̍h siû水chiah ē-tàng渡过,这mā说明新ê耶路撒冷有上帝奇异ê恩典而且丰富有chhun,无koh有欠缺ê烦恼,hiah-ê人会充满感谢。

第1到2节,chia讲「圣殿ê门口」,是teh指圣殿ê东门,mā就是正门。M̄-koh正门现在是关闭ê,因为án-ne,先知以西结是tùi圣殿ê「北门出来」,然后行到外面「转到朝东ê外门」。Tī chia,伊看见「有泉水tùi门入口所在下底涌出,流向东方」,ná亲像启示录作者讲ê,这泉水是tùi圣殿ê宝座涌流出来ê,而tī诗篇第四十六篇4节讲,这道河流ê水是「喜乐」,是tī上帝居所chiah有ê。

Tī「圣殿南面」有水tùi「地下流出来」,chiah-ê水流「经过祭坛南边」,然后tùi「门ê南边流出来」。这lóng teh说明chiah-ê水,是经过上帝ê赐福而流出。注意chia讲水流经祭坛,是teh表示祭坛随时随地lóng thang清洗保持洁净,无论是teh献祭chìn前,á是献祭ê后ê洁净工作,lóng ē-tàng真轻易完成。这teh表明以后献hō͘上帝ê礼物lóng是siōng洁净ê。

第3到5节,chit三节讲tio̍h水ê深度,是tùi siōng浅只有到「脚踝」,然后jú往前行,水ê深度jú深,到à「脚头u」,然后到à「腰部」,直到「深到无法度涉足过去,只好siû水chiah ē-tàng过去」,chiah-ê lóng teh象徵上帝ê恩典是丰富到无法度估计、衡量。

第6节,「留意这一切」,thang想像会tio̍h chit条河流并无任何支流注入,m̄-koh却是tùi圣殿ê「下底涌出」,而且是jú来jú深,表示这是永远bē缺乏、永远bē干涸ê水源。

第7节,「看见两岸有真chē树」,这kah创世记第二章15到17节,kah启示录第廿二章1到2节所提起ê,这河流所经过ê所在,两旁lóng栽种tio̍h「性命树」,树á顶是结果子累累。

第8到12节,Tī chit段经文中,chit-ê导览者kā先知以西结讲chit条tùi圣殿流出泉水而成ê河渠,水流经过ê所在生机盎然,hō͘原本lóng无性命ê迹象ê死海地区,变成一片活跃、新有性命力ê海。这kah以西结书第三十七章1到14节所提起ê,hiah-ê已经枯干ê骸骨,会因为为上帝ê灵注入,而呈现全新ê性命,甚至thang马上成做ē-tàng进攻敌人阵营ê精兵有异曲同工ê所在。

Chia讲tùi圣殿流出来ê泉水带来ê各种变化如下:
一是当chit条河渠ê水,tùi「向东流,经过约旦河,进入死海」,致使原本是「咸水」ê「死海」之水,变成「淡水」。这是非常奇异ê改变,大大超过人ê能力所想像会tio̍h。

二只要是chit条河渠所流过ê所在,lóng会「各种生物kah鱼类」,m̄-nā án-ne,这河渠ê水会「hō͘死海ê水新鲜,水流过ê所在lóng有性命」。

三是原本无可能有生物存在ê死海,会因为chit条水源ê水注入,而变成「像地中海仝款有各种鱼类」,而且是「非常chē」。「海边会有讨海人tī曝渔网」,chit句话mā teh暗示来chia掠鱼ê人真chē。

四是「河ê两岸会有各种树木生长结实」,chiah-ê树ê「果子thang做食物」外,它ê「叶á thang做药材」。

注意第11节特别提起,这河流所经过ê所在,特别是死海有大改变,「沿岸ê沼泽kah池塘ê水犹原是咸ê」,án-ne就ē-tàng提供日常生活上所需要盐。

「隐・基底」,这是tī死海西岸中部ê一个城镇,现在iáu-koh保持chit-ê名。Chia有一个深泉。

「隐・以革莲」,真可能是设tī死海西北面,tī昆兰附近,mā有深泉。

Tùi chia开始直到第四十八章,lóng是谈起有关以色列民族十二支族分配ê土地范围。

第13到14节,chia讲tio̍h以色列民族「十二支族」ê「地界」,特别强调讲「约瑟支族会得两份」,这kah雅各临终前ê吩咐有关(参考创世记四十八:5),后来十二支派就是由约瑟ê kiáⁿ以法莲kah玛拿西两个取代约瑟kah利未。

Chia强调「tio̍h公平分配土地」,这是上帝「赐kā in赐福做产业」ê土地。表示in tńg去巴比伦故乡后,重新分配土地ê时,就无koh像所罗门王死后,国家分裂为南北二国。却是合一ê国家kah十二支族。

第15到20节,chit段经文谈起东、西、南、北等四面ê范围。Chit段有关分配土地ê事,mā thang参考民数记第三十四章1到12节。

第15到17节,事(tāi)先谈及ê是「北pêng ê地界」。

第18节,这是「东边ê地界」。

第19节,这是「南边ê地界」。

第20节,这是「西边ê地界」。圣经时代,西边是siōng安全ê所在,因为西边就是靠近地中海防守khah容易,敌人若beh tùi海路攻击,一定会有真好ê船只、运输等交通工具装备,否则无法度攻击。

第21到23节,「各族beh分chit块土地」,chit句话已经teh表示无甚么人比较khah特别,而且值得注意ê,就是「外侨kah in tī chia出世ê kiáⁿ lóng tio̍h分得土地」,m̄-nā是in,iáu包括tī in中间出世ê子女,mā lóng tio̍h kah以色列人民仝款,享受土地分配权,chit点是过去所无ê。Chit种信息mā是先知以赛亚所传出来ê,上帝应允所有归属他ê人,lóng被同等看待(参考以赛亚书五十六:3—8)。

重新查询 专卷研经 以西结书系列
错误回报,请联系