Chit章有几个主题，一是tùi第1到6节ê经文继续谈起关系利未人生活ê关怀，二是第7到17节，有关君王应该遵守ê规则，三是第18到25节，谈起Pôaⁿ过节应该ê献祭礼仪。

Tùi chit章第5节开始，一直到第四十六章18节止，chit段经文lóng是上帝对先知以西结启示所做ê记录。

先知以西结有一个非常重要ê观念，就是beh kā圣kah俗分别清楚。Tùi圣殿ê规划kah祭祀礼仪ê规定，到祭司ê工作lóng是án-ne。现在chit段经文提起beh koh再kā土地划分出一块地是专门供圣殿祭司使用ê。

其实chit段落mā是为第四十七到四十八两章记载有关分配土地ê事，tī chia预留伏笔。

第1到2节，「分配土地hō͘各支族」了后，「tio̍h留一块献hō͘上主」，意思是teh指保留做圣殿ê用途。Chit块土地是「十二公里长，十公里阔」。续落来beh tùi顶面所讲chit块土地中koh「划出一个四箍围做圣殿用地」，chit块圣殿用地是每边「长两百五十公尺」，然后koh加上「二十五公尺阔ê空地」，这表示圣殿ê外围iáu有片空地，chit片空地就是hō͘神圣之地kah世俗之地有一个缓冲地带。

第3节，续落来是tī chit块ài做圣殿用地ê土地，koh划出「一半，长十二公里半，阔五公里」当做「建造圣殿ê路用」，chit块建造圣殿用ê土地，就kā它称做「至圣ê地」。这mā是第四十二章16到20节所提起ê圣殿范围。

第4节，chit块特别划分出来当做「至圣ê地」，是beh做建造圣殿外，mā是kā它「划归hō͘ tī圣殿供职ê祭司」，因为án-ne，chit块土地会建造祭司专用ê厝。这tī第四十章45到46节lóng有记载，而且强调祭司lóng是「撒督ê后代」，chit点tī第四十八章11节mā koh一pái提起。

第5节，chia mā特别提起tio̍h另外划出一块地hō͘利未人，in是「tī圣殿供职ê利未人」，内面mā有利未人ê「住宅区」，这mā说明一个重要转变，就是tī先知以西结以前，利未人是无土地ê，m̄-koh tī先知以西结ê异象中，利未人thang拥有一块特定范围ê土地。这mā讲出了祭司kah利未人之间ê差别，因为祭司并无土地。

第6节，chit节讲出「以色列人」mā thang tòa tī圣区ê「隔邻」ê所在，chit块地比利未人拥有ê范围会细一半，只有「长十二公里，阔两公里半」。

有关这部分tùi第四十七章13节起，直到第四十八章35节有koh khah详细ê说明。