Chit段是先谈及关系圣殿内院ê祭坛之大细，然后续落来就谈及án怎chiah好办理献祭ê礼仪。

第13节，这祭坛ê「四周有槽」，这槽thang用来收集牲祭流落来ê血。

第14到17节，祭坛共计有三层，包括有「底层」、「中层」，kah「上层」等，每上一层，就会往内缩「五十公分」。中层kah上层各高「两公尺」，只有底层是「一公尺高」。Chit座祭坛是用来「烧牲祭」用ê，因为烧牲祭，所有祭坛ê四角处，lóng有「凸出ê角」，chiah-ê角tī早期是用来做避难处ê（参考出埃及记二十：12—14，列王记上一：50—51、二：28—29）。「祭坛ê台阶tī东面」，高度共计有五公尺。Kah出埃及记所规定ê bē-tàng有台阶（参考出埃及记二十：26），免得祭司无小心露出下体，已经无仝款à。

第18节，这祭坛tio̍h用来献「烧化祭」用ê。当刣死beh献祭ê牲祭了后，就kā cheng-seⁿ ê血洒tī祭坛四周，这表示「洒牺牲ê血」，因为血是代表性命，thang为人赎罪。

第19节，chit节koh一pái强调「利未支族、撒都后代ê祭司」是主持献祭者。因为án-ne，只有in chiah thang到祭坛边办理献祭ê礼仪。

第20节，chia说明牲祭ê血用来涂抹tī祭坛「上层凸出ê ná四个角，中层ê四个角」，除了表示「分别它为圣」之外，mā teh表示thang用来做避难，kah走chhōe免tī处死ê所在。

第21到22节，「Kā赎罪祭ê小公牛带到圣殿外面，teh指定ê所在火烧」，而且隔工tio̍h献「无残缺ê公山羊做赎罪祭」，这lóng teh表示完美ê意思。然后用羊ê血洁净祭坛，表示有赎罪ê作用。

第23到24节，续落来tī公山羊了后，tio̍h带「一头无残缺ê小公牛kah公绵羊」当做献祭品。Á chit pái ê献祭品tio̍h「掖盐tī in身上」当做烧化祭献hō͘上帝。根据利未记第二章13节ê记载，「盐」teh代表调kah，mā teh代表kah上帝立约ê意思。

第25到26，án-ne连续七工之久，每工lóng tio̍h办理献祭，每pái献完牲祭了后，祭司就beh kā祭坛洁净，hō͘它「分别为圣」。

第27节，到à「第八工」，iáu koh khah tī最后加上「平安祭」，chit-ê祭是表示庆祝、欢喜。