Tùi第四十章开始，上帝ê灵带领先知以西结看tio̍h新ê耶路撒冷，就是tùi东门开始，然后tùi外面一直绕进了内院到至圣所等，án-ne绕了一kho͘-á了后，koh tńg来到chia记载ê，mā是tùi东门开始讲起。

Chit章开始beh谈ê是kah祭典有关ê事物。

Chit段讲出上帝tùi圣殿内发出命令，表示上帝已经tńg来到他启示hō͘先知以西结看见ê新ê耶路撒冷圣殿。旧ê圣殿是污秽、败坏ê，现在这新ê圣殿是圣洁ê，有上帝khiā起tī其中。

第1到2节，「以色列上帝ê荣耀tùi东方来」，chit句话表示上帝已经tī圣殿中，因为现tī先知以西结是hō͘带到「朝东ê门」，mā就是圣殿正门口ê所在。Chia所提起ê「上帝ê荣耀」，表明ê是上帝显现。Chia mā讲上帝出现ê时有「声音像海浪澎湃；大地因伊ê荣耀而发出显（hiáⁿ）目ê光辉」，这是四个活物phah动翼股所发出ê声音，ná亲像大海tī澎湃，mā像庞（pâng）大军队tī喊hoah（参考一：24）。

第3到5节，chìn前上帝离开，是因为以色列人民弃sak上帝，而且犯上帝看做siōng严重ê罪，就是污秽了圣殿ê圣洁，众祭司tī圣所内拜偶像（参考以西结书第八章）。现在是新ê耶路撒冷圣殿，是圣洁ê，上帝重新tńg来到「圣殿」里，而且是tùi「东门」（正门）进入。然后上帝ê灵带领先知以西结进入圣殿内院，伊看见圣殿「充满上主ê荣耀」。

第6节，chit位带领先知以西结丈量耶路撒冷圣殿ê人，就「khiā tī」先知以西结ê「边á」，chit时chūn，先知以西结听见上帝tùi圣殿内对伊传出信息。

第7到9节，tùi第7节开始是上帝传达hō͘先知以西结ê信息。

上帝真清楚hō͘先知以西结知影圣殿是伊ê「宝座」，而且上帝beh透过圣殿tòa「tī以色列人中间」，上帝beh治理in，这表示他已经koh一pái接纳以色列人民，恢复kah in之间ê关系。Á以色列人民kah in ê君王。而且圣殿kah王宫之间kan-taⁿ一墙之隔，mā无koh允准有任何国王被葬tī耶路撒冷城内，以维护耶路撒冷kah圣殿ê圣洁，án-ne就ē-tàng彻底kā圣kah俗之间ê差别显现出来。

第10到14节，上帝beh先知以西结kā圣殿设计ê特殊性kah意义传达hō͘所有以色列人民知影。主要目的，就是hō͘ in知影为过去所犯ê错误「感觉见笑」，án-ne mā就ē-tàng避免重蹈覆辙。特别是beh hō͘以色列人民知影圣殿ê建造kah内部ê布置lóng是「按照条例规则执行」，连一点点á马虎ê态度mā bē-tàng。Ná亲像早年上帝ài摩西带领以色列人民建造圣幕仝款，一切lóng tio̍h按照上帝ê命令去做（参考出埃及记第三十九到四十章）。