以西结书 23章1节 到 23章21节   背景资料  上一笔  下一笔
第廿三章是第十六章了后,koh一pái用淫妇、娼妓等字词来描写以色列民族。所讲ê两姊妹,就是teh指北国ê以色列kah南国ê犹大。先知以西结用「阿荷拉」来代表北国以色列ê首都撒马利亚,用「阿荷利巴」代表南国犹大首都耶路撒冷。

Chit段经文详细描述以色列民族án怎违背kah上帝之间ê夫妻之约ê关系,用来比并以色列民族kah其它同盟国家间互动ê情景。

第1节,「有一对姊妹」,指ê就是两个城市(á是国家)ê意思。

第2到4节,「tòa tī埃及」,这是teh指以色列民族bat tī埃及做过奴隶ê意思。Chia用「妓女」teh代表以色列民族已经沦落到成做性工作者,任人sńg弄。表示以色列民族过去tī埃及做奴隶,就是埃及人ê sńg物,因为奴隶是无自主权,而且是主人ê「财产」,一定tio̍h服从主人ê命令做tāi-chì,随在主人pái布。

Chia讲「阿荷拉—代表撒马利亚」,chit-ê名字意思是teh指「伊ê帐幕」,这koh说明上帝已经无koh kah in同在à。「阿荷利巴—代表耶路撒冷」,tú好讲出上帝tī以色列人民中间,因为án-ne,mā代表耶路撒冷圣殿ê意思。

「我娶了in姊妹两人」,表示上帝kah南北两国ê以色列人民lóng有立约,chit-ê约是ná亲像夫妻一般。而且in「替我生了gín-á」,表示有真正夫妻之实。

第5节,就明显Kā chit种夫妻间ê婚约关系,引伸到政治盟约ê境况,就是kah上帝(丈夫)ê关系已经薄弱,却强化kah亚述(情郎)ê关系亲密。因为án-ne chia用「结婚后犹原做妓女」,形容对上帝无忠实ê意思。

第6到7节,chit两节讲出亚述当时ê军队非常帅气挺拔,hō͘人看见就会心生迷恋之情,包括「穿紫色制服ê军人、贵族kah高级军官」,而且是看起来ta̍k个lóng「少年iân-tâu」,结果北国以色列人民迷恋到倾心甘愿「做in ê情妇」,这mā表示并无实质ê婚约关系,只不过是hō͘ sńg弄ê对象。

第8节,chit节thang参考第二十章5到8节,thang明确看出北国以色列原本kah亚述立约,后来soah koh想beh背叛亚述,去chhōe埃及帮忙,chit种tī政治上对盟约ê无忠实,to̍h是in对上帝无忠实ê写照。用chit种方式形容北国以色列人民ná亲像「妓女」仝款,欢喜「操淫业」过生活。

第9到10节,这是上帝对北国以色列ê惩罚,kui气就kā北国以色列交hō͘「亚述情郎」,而这是发生tī主前721年(参考列王记下十七:5—12)。亚述极尽所ē-tàng地侮辱in,「Kā伊剥光」衫裤,同时「掠tiâu伊ê cha-bó͘-kiáⁿ」,kā in lóng俘虏去做奴隶(参考列王记下十七:6)。

第11到13节,「小妹阿荷利巴」,是teh指南国犹大ê意思。Chia指出犹大并无tùi北国以色列人民ê惨痛境遇来学习反省,反却是「koh khah堕落,koh khah淫荡」,结果仝款,「伊被玷污了,伊kah伊阿姊仝款淫荡」。这lóng teh说明犹大去chhōe亚述ê协助,in lóng忘记tī tú-tio̍h困境ê时chūn,chhōe kah in立有性命之约ê上帝,却是去chhōe政治上ê伙伴。

第14到15节,头前谈及亚述,现在开始谈起巴比伦帝国。当南国犹大看tio̍h巴比伦渐渐兴盛起来,就koh转向巴比伦帝国靠lóng。Chia用「鲜红ê颜料」之画像,表明巴比伦帝国ê兴起,比起渐渐老迈ê亚述koh khah引人注目。而且chiah-ê高级军官是「腰间lóng系tio̍h腰带,头壳顶带着有垂饰ê礼帽」,chiah-ê用词lóng teh表示装扮得非常亮眼,hō͘人看了lóng会产生迷恋之心。

第16到17节,chia讲出犹大国开始想beh kah巴比伦帝国进行外交盟约关系。M̄-koh结果境遇仝款,ná亲像北国被亚述蹂躏仝款,南国犹大遇tio̍h巴比伦帝国ê摧残情况仝款。

第18节,「伊tī大众面前thǹg-pak-theh,hō͘大家lóng知影伊是娼妓」,这是真大ê侮辱。Chia ê「大众」、「大家」所指ê除了巴比伦帝国之外,iáu有真chē国家mā参与掠夺耶路撒冷有分(参考列王记下廿四:2),大家lóng tī笑南国犹大ê懦弱、不堪一击。

第19到21节,清楚讲tio̍h南国犹大iáu-koh相信埃及是in ê siōng爱(参考耶利米书三十七:5)。In m̄知上帝已经拣选巴比伦帝国当仆人,beh来惩罚犹大(参考耶利米书廿五:8—9)。

重新查询 专卷研经 以西结书系列
错误回报,请联系