以西结书 2章1节 到 2章10节   背景资料  上一笔  下一笔
Tī第一章用真长ê篇幅(第4到28节)绍介先知以西结所看见ê四个活物,其实,若详细看经文内容就会发现,chit种异象无论描述jōa-ni̍h-á详细,lóng真oh用笔墨描绘出其样式,就算照内容画出来,mā会是一种真奇怪ê图案。以西结书就是tùi先知以西结所看见ê异象开始记载,而且先kā chit异象描述过了后,chiah说明上帝对伊讲ê话,而续落来chit段记载上帝对伊讲ê话,篇幅真长,一直到第三章27节chiah结束。

第1节,「必朽ê人!」,chit句话是以西结书ê特色,一再地出现kui卷经册中,共计出现93次。Tī中文《和合本》是用「人子」,chit-ê词tī但以理书第七章13节是用来表达上帝差派ê拯救者ê意思。因为án-ne,tī新约福音书中,耶稣不时以「人子」自称。作者用「必朽ê人」取代「人子」,就是koh khah清楚teh表明一个基本观念:即使是上帝所拣选ê仆人,mā是人,而且是上帝卑微ê仆人。

「khiā起来!」这是一句真严肃ê命令用词。会出现chit种用词,真可能就是因为当时先知以西结看见出现tī伊目睭前ê异象后,kui个人就瘫tī hia动不à。因为án-ne chit句「khiā起来」mā有命令ê用意,ài先知以西结注意听上帝对伊「讲话」。

第2节,「上帝ê灵进入我内面」,上帝ê灵mā代表上帝ê气力,是性命ê活力,chit种tùi上帝来ê气力kā先知以西结「扶起来」,表示上帝kā会kah先知以西结同在,会帮助伊,赐hō͘伊够额ê气力。

第3节,chit节讲上帝差派先知以西结「到以色列人hia去」,chit种差派已经清楚说明一件事:先知以西结ê工作会真危险。因为当人敢「背叛」上帝ê时,表示连上帝ê话kah诫命lóng m̄惊惶,任何人去传讲上帝ê信息mā无用,甚至kan-taⁿ会面临性命ê危险而已。

Chit节特别强调以色列人民是tùi in ê「祖先」开始,就有背叛上帝ê事发生(参考耶利米书三十一:32),并无因为过去历代先知ê提醒、劝勉而悔改,却是继续不断来做出违背上帝旨意ê事,一直到先知以西结时代都无改变。

第4节,chit节讲tī上帝眼中ê以色列人民,是「固执刚硬」,chit-ê词表示m̄知见笑,厚面皮ê意思,mā thang做顽劣解释(参考出埃及记三十二:9、三十三:3、5、三十四:9)。Koh讲,刚硬mā teh表明心内麻痹,听bē落去上帝ê声音。先知以赛亚、耶利米lóng有tùi上帝来仝款ê信息(参考以赛亚书六:9—10,耶利米书五:2—3)。这teh表示以色列人民根本就不「不尊重」上帝ê话,无kā上帝ê话khǹg tī心里,拒绝听从。

第5节,「不管」以色列人民「听m̄听」,先知以西结lóng一定tio̍h去传。伊去传,表示伊尽了责任,若伊m̄去,就表示伊怠忽职守(参考以西结书三十三:1—6)。

「in就知影bat有一位先知tī in中间」,chit句话会被记起,就beh tī tāi-chì过了后chiah会显明出来(参考以西结书三十三:33)。先知耶利米mā bat强调,一个人是m̄是真正先知,tio̍h等伊传讲ê信息实现ê时,chiah ē-tàng判断(参考耶利米书廿九:9)。Mā因为án-ne,先知tī伊传讲预言ê信息ê时,lóng是孤独ê。因为in lóng是讲未来ê事,大家iáu看bē-tio̍h、摸bē-tio̍h甚至无法度想像会tio̍h。

第6到7节,chit节讲出先知以西结会面临ê遭遇,就是hō͘「反抗」、「看bē起」。上帝甚至提醒伊,差派伊去,ná亲像ài伊进入「蝎子中间」,随时lóng会有死亡ê危险。M̄-koh上帝拣选仆人出去传达信息ê时lóng会ài in「mài惊」(参考约书亚记一:9,以赛亚书四十一:10,耶利米书一:8、17)。同时「mā mài惊in讲ê话」,chit节重复两pái chit句话,表示当时ê hiah-ê人对先知传达ê信息,lóng会用非常讽刺ê话语hō͘ in侮辱。Á siōng好ê回应方式,就是无beh chhap。Mā有两pái强调「不管」以色列人民「听m̄听」,伊lóng tio̍h kā上帝ê话「转告in」,这就是第5节所提起过ê,就算tī siōng恶质ê环境下,mā tio̍h传达上帝ê信息。因为「in是一阵叛逆ê人」,表示in就算听见了上帝ê仆人ê声音,mā bē认错,kan-taⁿ会狡辩。

第8到9节,「注意听」,这是上帝提醒先知以西结tio̍h注意听他所beh hō͘伊ê信息。Teh注意听了后,就beh「开嘴」,kā上帝beh hō͘伊ê「物件食落去」,这真清楚teh说明一件事:上帝ê仆人,只有ē-tàng听从上帝,bē-tàng违逆上帝ê命令。因为án-ne,chit句「bē-tàng亲像in仝款叛逆」之言,真可能是因为先知以西结听tio̍h上帝beh伊食下「一轴册卷」ê时,心中有所踌躇。

第10节,chia讲先知以西结tī食落去chit轴册卷chìn前,是「看见册卷ê正反面lóng写字」,其实古代ê册卷,真少正反面lóng写字,一般来讲lóng只有写tī正面上,因为当时ê纸lóng是用蒲草做ê,tī正面写ê墨水,真容易渗透到背面。现在chia讲正反面lóng写字,表示beh传达ê内容siuⁿ chē。Chia强调讲所写ê内容充满tio̍h「哀悼、吐气,kah悲痛ê话」,chiah-ê内容lóng是kah悲惨ê性命有关。

重新查询 专卷研经 以西结书系列
错误回报,请联系